Mazmure 107 - Geeshsha Maxaafa

Ichashantho Maxaafa ( Maz 107—150 ) Meto Wode Elle Gakiya Xoossaa

¹ I keeha gidiya gishonne iya siiqoy merinaasa gidiya gisho; Godaa galatite

² Goday ashshidaysati, morke kushepe kessi ekidaysati haysada yaagidi odeto.

³ Enti Dolohapenne wulohape, pudehapenne dugehape biitta ubbaafe shiiqidaysata.

⁴ Entafe issoti issoti mela biittan yuuyidosona. Banta de7iya katamaa biya ogiya demmanaw danda7ibookona.

⁵ Enti koshatidosona; saamotidosona; enti un7etidosona.

⁶ Enti metootida wode, Godaako waassidosona; I enta waayiyape enta ashshis.

⁷ Enti daana katama gakanaw, enta suure ogen kaalethis.

⁸ Merina iya siiquwa gishonne I entaw oothida malaalsiya oosuwa gisho enti Godaa galato.

⁹ I saamotidaysata alisees; koshatidaysata lo77oba kalsees.

¹⁰ Issoti issoti sakana dhuman uttidosona; birata santhalaatan waayidosona.

¹¹ Hessi haniday enti Ubbaafe Dhoqa Xoossaa, kiita bolla makallida gishonne iya zoriya kadhida gishosa.

¹² I enta waaye ooson daaburisis; enta maaddiya asi dhayin kundidosona;

¹³ Enti metootida wode, Godaako waassidosona; I enta waayiyape enta ashshis.

¹⁴ I enta sakana dhumape kessis; enti qashetida santhalaata duuthis.

¹⁵ Iya siiquwa gishonne I entaw oothida malaalsiya oosuwa gisho enti Godaa galato.

¹⁶ I naase birata pengeta menthis; birata kasota qanxis.

¹⁷ Issoti issoti eeya gididosona; banta oothida nagara gaason banta iitatetha gaason metootidosona.

¹⁸ Enti kathi ixida gisho hayqos gakidosona.

¹⁹ Enti metootida wode, Godaako waassidosona; I enta waayiyape enta ashshis.

²⁰ I ba qaala kiittidi enta pathis; duufope enta ashshis.

²¹ Iya siiquwa gishonne I entaw oothida malaalsiya oosuwa gisho enti Godaa galato.

²² Enti iyaw galata yarsho shiisho; ufaysa yethan iya oosuwa odo.

²³ Issoti issoti markaben abba bollara bidosona; abba bolla banta oosuwa oothidosona.

²⁴ Enti Godaa oosuwa be7idosona; ciimmo abban oothida malaalsiyaba xeellidosona.

²⁵ I kiitida wode gotey dendis; abba zuley qaaxis.

²⁶ Enti pude dendidosona; duge ciimmon wodhidosona; iita metoy gakin enta wozanay til7is.

²⁷ Enti mathotida asada dhubetidi gandigaridosona; enta eray maayis.

²⁸ Enti metootida wode, Godaako waassidosona; I enta waayiyape enta ashshis.

²⁹ I gotiya si77i oothis; abba beeta sirphi oothis.

³⁰ Si77i gida gisho ufaytidosona; enti koyida katamaa Goday gathis.

³¹ Iya siiquwa gishonne I entaw oothida malaalsiya oosuwa gisho enti Godaa galato.

³² Deriya shiiquwan iya gitatetha awaajo; cimata duulatan iya galato.

³³ Goday shaafata melisis; pultoti goggonnaada teqis.

³⁴ He bessan de7iya asaa iitatethaa gisho, aradda biitta quu7e kessis.

³⁵ I mela biittan haathe eelisis; mela biittan pultoy dhuuqanaada oothis.

³⁶ Koshatida asaa he bessan wothis; bantaw daana katamaa yan keexidosona.

³⁷ Enti banta goshshan zeridosona; woyne tokidosona; daro muruuto shiishidosona.

³⁸ I enta anjin enti daridosona; enta mehiya taybuwa guuthibeenna.

³⁹ Enti xoonetiya wodenne un7etiya wode, metoninne azzanon kawuyiya wode,

⁴⁰ Goday enta halaqata kawushis; mela biittan toylatana mela oothis.

⁴¹ Shin manqota metope kessis; enta soo asaa dorsa wudeda darsis.

⁴² Suure asay hessa be7idi ufaytoosona; shin iita asay yeellatidi si77i goosona.

⁴³ Cincati haysa ubbaa akeeko; Godaa siiquwa qopo.