Zakaryaasa 9 - ጌሻ ማፃፋ

እስራኤለ ሞርከት ፕርደታና ፕርዳ

¹ አሳ አይፈይነ እስራኤለ አሳ ኡባ አይፈይ ጎዳ ፄልያ ግሾ፥ ሳድራካ ቢታይነ ዳማስቆ ካታማይ ያናይሳ፥ ጎዳይ ኦድዳ ፕርዳ ቃላይ ሀይሳ።

² ቃስ ሀ ፕርዳይ ሀድራካ ዛዋ ግድዳ ሀማታ ካታማነ ቃራ ግድዳ ፅሮሳነ ስዶና ካታማታ ቦላ ሀ ፕርዳይ ጋካና።

³ ፅሮሳ ካታማይ ባዉ ምኖ ሚፃ ግምብስ። ቃስ ብራነ ዎርቃ ቢታዳ ዶርስ።

⁴ ሽን እ ሺሽዳባ ኡባ ጎዳይ ኤካና፤ እያ ሻሉዋ አባን ሆላና፤ ካታማይ ታማን ሜተታና።

⁵ አስቃሎና ካታማይ ሄሳ በእድ ያያና፤ ጋዛ ካታማይ ኡንኤታና፤ ኤቅሮና ካታማይ ኡፋይስ ያና። ጋዛ ካዎይ ያና፤ አስቃሎና ካታማይ ካይሳ ግዳና።

⁶ አሽዶዳ ካታማን ዋላሀ አሳይ ዳና። ጎዳይ ሀይሳዳ ያጌስ፦ “ፍልስፄመታ ኦቶሩዋ ታኒ ዉርሳና።

⁷ ታኒ ኤንታ ዶናፐ ሱ፥ ኤንታ አቻፈ ቱናባ ድጋና። ኤንታፈ አትዳይሳት ኑ ፆሳ አስ ግዳና፤ ቃስ ይሁዳ ያራፐ እሱዋ ግዳና። ኤቅሮና አሳይ ያቡሰ አሳዳ ታ አሰ ግዳና።

⁸ ሄሳፈ ጉየ፥ ኦላንቾት ኦይኮናዳ፥ ታኒ ታ ኬ ናጋና። ታኒ ታ ሁጰን ናግያ ግሾ፥ ዛሪድ ኦንካ ታ አሳ ኡንኤና” ያጌስ።

ፅዮነ ካዋ ዩሳ

⁹ ነኖ፥ ፅዮነ ካታመ፥ ኡፋይታ! ነኖ፥ የሩሳላመ ካታመ፥ እልላ! ሄኮ፥ ፆንዳ ነ ፅሎ ካዎይ ኔኮ ዬስ። ነ ካዎይ አሽከ ግድድ፥ ሀረ ቦላ፥ አድ ሀረ ማራ ቦላ ኡትድ ኔኮ ዬስ።

¹⁰ ታኒ ፓራ ጋረታ እስራኤለፐ፥ ኦላ ፓራታ የሩሳላመፐ ይሳና፤ ኦላ ዶንግያ መንረና። ነ ካዎይ ካዎተታስ ሳሮ አዋጃና፤ እ አባስ ጋፃፐ ህን ጋፃ ጋካናዉ ኤፍራፂሳ ሻፋፐ ዶምድ ሳኣ ጋፃ ጋካናዉ ሃራና።

¹¹ ታኒ ኔራ ሱ ጫቁዋ ግሾ፥ ቃሸትዳ ነ አሳታ ሃ ባይና ኦላፈ ከሳና።

¹² ህንተኖ፥ ስንን ኡፋይስ ደእያ ቃሾ አሳቶ፥ ህንተ ሚፃ ስምተ። ካሰይሳ ግሾ ዳኮ ሻሎ ህንተዉ እማናይሳ ሀች ታኒ ህንተዉ አዋጃይስ።

¹³ ታኒ ይሁዳ ዶንገዳ፥ እስራኤለ ዶንገ ቶራዳ ጎኤታና። ፅዮነ፥ ታኒ ነ ናይታ ግርከ ናይታ ቦላ ደንና፤ ነና ዎልቃማ ኦላንቹዋ ማሻ መላ ኦና።

¹⁴ ሄ ዎደ ጎዳይ ኤንታ ቦላ ቆንጫና፤ እያ ዶንገ ቶራይ ዎልአንዳ ዎልአማና። ኡባ ሃርያ ጎዳይ ሞይዘ ፑናና፤ ዱገሀ ባጋ ጎተዳ ደንዳና።

¹⁵ ኡባፈ ዎልቃማ ጎዳይ ኤንታ ግሾ ኦለታና። ኤንቲ ባንታ ሞርከታ ዉርሳና፤ ያምባርሻን ኦለይሳታ የና። ኤንቲ ባንታ ሞርከታ ሱ ዎይነ ኡሻዳ ኡያና፤ ሱ ከረን ኩምያዳ ኩማና፤ ኤንቲ ያርሾ በሳን ጉክያ ሱዳ ጉካና።

¹⁶ ሄ ጋላስ ሄንንቾይ ባ ዶርሳታ አሸይሳዳ ጎዳይ ኤንታ ፆሳይ ኤንታ አሻና። ካላቻ ቦላ ደእያ አሌቆዳ ኤንቲ ጎዳ ቢታን ጶላና።

¹⁷ ኤንቲ ዋንድ ሎኦነ ፑላንቾ ግዳንደሻ! ናአተ ናይታ ካይ፥ ጌላኦ ናይታ ዎይነ ኡሻይ አጭሳና።