Zakaryaasa 7 - ጌሻ ማፃፋ

ሱረ ፕርዳነ ማሮተ

¹ ዳርዮስ ካዎትዳ ኦይዳን ላይን፥ ክሲላ ጌተትያ ኡዱፉን አጌናን፥ ኦይዳን ጋላሳን፥ ዛካርያሳኮ ይዳ ጎዳ ቃላይ ሀይሳ።

² ቤተለ ካታማ አሳይ ሳረዜራ፥ ረገም-መለካነ ኤንታራ እስፈ ደእያ አሳታ ጎዳ አንጆይ ያና መላ ዎሳናዉ ኪትዶሶና።

³ ቃስ ኡባፈ ዎልቃማ ጎዳ ኬን ኦያ ካህነታነ ናበታ፥ “ዳሮ ላይ ኦሸ ጋምእዳይሳዳ ኑኒ ሀእካ እቻሻን አጌናን ዬካናዉነ ፆማናዉ በሲ?” ያግድ ኦይቻና መላ ኪትዶሶና።

⁴ ሄሳፈ ጉየ፥ ኡባፈ ዎልቃማ ጎዳ ቃላይ ሀይሳዳ ያግድ ታኮ ይስ፦

⁵ “ቢታን ደእያ አሳ ኡባስነ ካህነታስ ሀይሳዳ ያጋዳ ኦዳ፦ ‘ህንተ ሀ አዳ ላፑን ታሙ ላይን እቻሻን አጌናንነ ላፑን አጌናን ፆምዳይነ ዬክዳይ ታና ቦንቻናሴ?

⁶ ህንተ ምያ ዎደነ ኡያ ዎደ ህንተዉ ሜታነ ኡዬታ።

⁷ የሩሳላመ ካታማይነ እያ ዩሹዋን ደእያ ካታማታን ደእያ አሳይ ሸምፖንነ እንጀን ደእዳ ዎደነ ነገባንነ ጋን አሳይ ዎፑ ግድ ደእዳ ዎደ ጎዳይ ባ ናበታ ባጋራ ኦድዳ ቃላይ ሀይሳ ግደኔ?’ ያጋ” ያግስ።

⁸ ጎዳ ቃላይ ዛካርያሳኮ ሀይሳዳ ያግድ ይስ፦

⁹ “ኡባፈ ዎልቃማ ጎዳይ ካሰ እምዳ ኪታይ፥ ‘ሱረ ፕርዳ ፕርድተ፤ ህንተ እሶይ እሱዋስ ኬሀተነ ማሮተ ኦተ።

¹⁰ አምኤታ፥ ይኦታ፥ በተ አሳነ ማንቆታ ናቆፍተ። ቃስ ህንተፈ ኦንካ ባ እሻ ቦላ ኢታባ ኦናዉ ባ ዎዛናን ቆፖፎ።’

¹¹ “ሽን ኤንቲ ስኦና እፅዶሶና፤ ዞኮ ዛሪድ ባንታ ሀይ ቱጭዶሶና።

¹² ኡባፈ ዎልቃማ ጎዳይ ባ አያናን ካሰ ባ ናበታ ባጋራ ኪትዳ ህግያነ ቃላ ስኦና እፅድ ባንታ ዎዛና ዛላዳ ምንዶሶና። ሄሳ ግሾ፥ ኡባፈ ዎልቃማ ጎዳ ማታፐ ግታ ሀንቆይ ኤንታ ቦላ ይስ።

¹³ ታኒ ፄግያ ዎደ ኤንቲ ስኦና እፅዳይሳዳ ኤንቲ ፄግያ ዎደ ታኒ ስእከ” ያጌስ ኡባፈ ዎልቃማ ጎዳይ።

¹⁴ “ታኒ ጎተ ኤሀዳ ኤንቲ ኤሮና ካዎተታ ግዶን ላላስ። ቢታይ አስ ያነ ሃነ ስመረቶና ካይሳ ቢታ ግድስ፤ ሀ ሎኦ ቢታይ ባይሳ ግድስ” ያጌስ ኡባፈ ዎልቃማ ጎዳይ።