Zakaryaasa 6 - ጌሻ ማፃፋ

ኦይዱ ፓራ ጋረታ ቆንጨ

¹ ቃስ ታኒ ቁ ጋዳ ፄልያ ዎደ ኦይዱ ፓራ ጋረት ናምኡ ናሰ ብራታ ደረታፐ ግዶራ የይሳታ በአስ።

² ኮይሮ ጋርያ ዞኦ ፓራት ጎቾሶና፤ ናምአን ጋርያ ካሬ ፓራት ጎቾሶና።

³ ሄን ጋርያ ቦ ፓራት ጎቾሶና፤ ኦይዳን ጋርያ ዋንጮ ፓራት ጎቾሶና።

⁴ ታኒ ኪታንቹዋኮ፥ “ታ ጎዳዉ፥ ሀይሳቲ አይቤ?” ያጋዳ ኦይቻስ።

⁵ ኪታንቾይ ዛሪድ፥ “ሀይሳቲ ቢታ ኡባ ጎዳ ስንን ኤቅድ ኦያ ኦይዱ ሳሎ ጫርኮታ።

⁶ ካሬ ፓራት ጎችያ ጋረይ ፑደሀ ባጋ ቢታ ቤስ፤ ቦ ፓራት ጎችያ ጋረይ ዉሎሀ ባጋ ቤስ፤ ዋንጮ ፓራት ጎችያ ጋረይ ዱገሀ ባጋ ቤስ” ያግስ።

⁷ ሄ ፓራት ቢታ ዎቻናዉ ከይዳ ዎደ ገደ ሃ ፓችፓሮሶና። ኪታንቾይ ኤንታኮ፥ “ብድ ቢታ ኡባ ዩይድ ዎችተ” ያግስ። ኤንቲ ብድ ቢታ ኡባ ዩይድ ዎችዶሶና።

⁸ ሄሳፈ ጉየ፥ ኪታንቾይ ባ ቃላ ቁ ኦድ፥ “ሄኮ፥ ፑደሀ ባጋ ቢታ ብዳ ፓራት ታ አያና ሄ ቢታን ሸምፕስዶሶና” ያግስ።

እያሱስ ጊግዳ ካላቻ

⁹ ጎዳ ቃላይ ታኮ ሀይሳዳ ያግሸ ይስ፦

¹⁰ “ባብሎነ ድኤተፈ ስምዳ ሄልዳይ፥ ፆበይነ ያዳይ እምያ ብራነ ዎርቃ እሞታ ኤካዳ ሄ ጋላስ ሶፎንያሳ ናኣ እዮስያሳ ሶ ባ።

¹¹ ኤንታፈ ኤክዳ ብራፐነ ዎርቃፈ ካላቻ መዳ እዮሳደቃ ናኣ፥ ካህነ ሀላቃ እያሱ ሁጰን ዎ።

¹² ኡባፈ ዎልቃማ ጎዳይ ሀይሳዳ ያጌስ ጋዳ እያዉ ኦዳ፦ ሄኮ፥ ታሸይ ባ በሳን ዳያ ግሾነ እ ፆሳ ኬ ኬፅያ ግሾ፥ እያ ሱንይ ‘ታሸ ጌተትዳ አደይ ሀይሳ።

¹³ ጎዳ ኬ ኬፃናይ እያ፤ እ ካዎተ ማኡዋ ማእድ፥ አራታን ኡትድ ሃራና። ቃስ እያ አራታ ማታን እስ ካህነይ ኤቃና፤ ኤንታ ናምኣ ግዶን እስፈተ ዳና።’

¹⁴ ሄ ካላቻይ ሄልዳያ፥ ፆቢያ፥ ያዳያነ ሶፎንያሳ ናኣ እዮስያሳ ቆፍሶ ግድድ፥ ጎዳ ፆሳ ኬን ዳና” ያግስ።

¹⁵ ሄ ዎደ ሃሆ በሳን ደእያ አሳት ጎዳ ኬ ኬፅድ ማዳናዉ ያና። ኡባፈ ዎልቃማ ጎዳይ ታና ህንተኮ ኪትዳይሳ ህንተ ሄሳን ኤራና። ጎዳስ፥ ህንተ ፆሳስ ህንተ ፖሎ ኪተትኮ ሄስ ሀናና።