Zakaryaasa 2 - ጌሻ ማፃፋ

የገ ዎዶሮ ኦይክዳ ኡራ

¹ ሀራ ቆንጨን ባ ኩሸን ዋ ዎዶሮ ኦይክዳ እስ አስ በአስ።

² ታኒ፥ “ኔኒ አዉ ባይ?” ያጋዳ ኦይቻስ። እ ዛሪድ፥ “ታኒ የሩሳላመ ዳልጋተይነ አዱሳተይ አይ መለኮ ዋናዉ ባይስ” ያግስ።

³ ሄሳፈ ጉየ፥ ታራ ሃሳያ ኪታንቾይ ከይድ ብስ፤ እያራ ጋሄታናዉ ሀራ ኪታንቾይ ይስ።

⁴ ይዳ ኪታንቾይ፥ “ዎፃ ባዳ፥ ናአተ አድያኮ፥ ‘የሩሳላመን ዳሮ አስነ ዳሮ መሄይ ዳና ግሾ፥ ካታማ ዩሾን ግምበ ድርስ ኮሸና።

⁵ ታኒ እያ ዩሹዋን ታማ ድርስ ግዳና፤ ታኒ እያዉ ቦንቾ ግዳና’ ያጌስ ጎዳይ።

⁶ “ታኒ ህንተና ቢታ ኦይዱ ባጋ ላልዳ ግሾ፥ ያፐ ከይተ፤ ኤለ ከይተ፤ ፑደሀ ባጋ ቢታፈ ባቃትተ” ያጌስ ጎዳይ።

⁷ “ነኖ፥ ፅዮነ ከያ፤ ባብሎነ ማጫ ናይታ ግዶን ደእያረ፥ ኤንታ ግዶፈ ባቃታ” ያጌስ ጎዳይ።

⁸ ኡባፈ ዎልቃማ ጎዳይ እያ ቦንቹዋ ቆንጭሳና መላ፥ ባ አሳ ቦንቅዳ ካዎተታኮ ታና ኪትድ፥ “ህንተና ቦችያ ኡራይ እያ አይፍያ ቡሉዋ ቦቼስ።

⁹ ታኒ ታ ኩሽያ ኤንታ ቦላ ደንና፤ ኤንታ አይለት ኤንታ ዛሪድ ቦንቃና። ሄ ዎደ ህንተ ኡባፈ ዎልቃማ ጎዳይ ታና ኪትዳይሳ ኤራና።”

¹⁰ “ታኒ ያዳ ህንተ ግዶን ዳና ግሾ፥ ፅዮነ አሳዉ፥ ዛማርተ፤ ኡፋይትተ!” ያጌስ ጎዳይ።

¹¹ ሄ ዎደ ዳሮ ካዎተት ጎዳራ ጋሄትድ እያ አሰ ግዳና። እ ህንተ ግዶን ዳና፤ ኡባፈ ዎልቃማ ጎዳይ ታና ህንተኮ ኪትዳይሳ ሄ ዎደ ህንተ ኤራና።

¹² ጌሻ ቢታን ይሁዳ፥ ባና ጋክዳ ግሾ ኦድ ላታና፤ የሩሳላመ ዛሪድ ዶራና።

¹³ ጎዳይ ባ ደእያ ጌሻ በሳን ደንድዳ ግሾ፥ አሾ ማእዳ ኡባይ እያ ስንን ስእ ጎ!