Zakaryaasa 11 - ጌሻ ማፃፋ

¹ ነኖ፥ ልባኖሰ፥ ታም ነ ዝጋታ ማና መላ፥ ነ ፐንገታ ዶያ!

² ነኖ ፂዳዉ፥ ዝጋይ ኩንድዳ ግሾ፥ ቦንቾ ምት ይዳ ግሾ፥ ዪ ጋዳ ዬካ! ህንተኖ ባሳና ዎላቶ፥ ሄ ስከትዳ ዎራይ ማንኤትዳ ግሾ፥ ዪ ግድ ዬክተ።

³ ኤንታ ሎኦ ሄን በሳይ ይዳ ግሾ፥ ሄንንቾታ ዘለልሳ ስእተ፤ ዮርዳኖሰ ዎራይ ይዳ ግሾ፥ ጋሞት ጉደይሳ ስእተ።

ናምኡ ሄንንቾታ

⁴ ጎዳይ ታ ፆሳይ ታኮ ሀይሳዳ ያግስ፦ “ሹከታናዉ ደእያ ዶርሳ ዉድያ ሄማ።

⁵ ኤንታ ሻመይሳት ሹኮሶና፤ ሽን ሴረቶኮና። ባይዘይሳት፥ ‘ኑኒ ዱረትዳ፤ ጎዳይ ጋላተቶ’ ያጎሶና፤ ሀር አቶሽን፥ ኤንታ ሄንንቾት ኤንታዉ ቃቶኮና” ያግስ።

⁶ ጎዳይ ሀይሳዳ ያጌስ፦ “ታኒ ህዛፐ ጉየ ሀ ቢታን ደእያ አሳስ ቃትከ። ታኒ እስ እስ አሰ እያ ሾሩዋስነ እያ ካዋስ አዳ እማና። ኤንቲ ቢታ ይሳና፤ ታኒ እስ አስካ ኤንታ ኩሽያፐ አሽከ” ያጌስ።

⁷ ሄሳ ግሾ፥ ታኒ ሹከታናዉ ደእያ ዶርሳታ፥ አዳ ቃስ ዉድያ ግዶን ኡንኤትዳይሳታ ሄመይሳ ግዳስ። ያታዳ ዶርሳታ ሄማናዉ ናምኡ ፃምአታ ኤካዳ፥ እሱዋ “ዶሰትዳይሳ” ጋዳ ፄጋስ፤ ናምአንዋ “እስፈተ” ጋዳ ፄጋስ።

⁸ ታኒ እስ አጌናን ሄ ሄንንቾታ ይሳስ። ኤንታ ሀኖተይ ታዉ ዳንዳኤተና፤ ኤንትካ ታና እፅዶሶና።

⁹ ያታ ስማዳ ታ ዶርሳታኮ፥ “ታኒ ህንተና ናምአን ሄምከ፤ ሀይቀይስ ሀይቆ፤ የይስ ዮ፤ አትዳይሳት እሶይ እሱዋ ሞ” ያጋስ።

¹⁰ ሄሳፈ ጉየ ታኒ “ዶሰትዳይሳ” ጌተትያ ፃምአ ኤካዳ መንስ። ሄሳ ታ ኦዳይ ካዎተታራ ገልዳ ጫቆይ ዱፅዳይሳ በሳናሳ።

¹¹ ሄ ጋላስ ጫቆይ መእስ፤ ሄ ዎደ ዶርሰ ሻመይሳትነ ባይዛይሳት ታና በእድ፥ ሄስ ጎዳ ቃላ ግደይሳ ኤርዶሶና።

¹² ታኒ፥ “ህንተ ዶስኮ ታ ዳሞዝያ እምተ፤ እፃስ ጊኮ አጋግተ” ያጋስ። ያትን ኤንቲ ታዉ ሀስታሙ ብራ ሳንትመ እምዶሶና።

¹³ ጎዳይ ታኮ፥ “ኤንቲ እምዳ ቦንቾ ሚሽያ ኤፋዳ ፆሳ ኬን ደእያ ኦቱዋን የጋ” ያግስ። ታኒ ሄ ሚሽያ ኤፋዳ ፆሳ ኬን ደእያ ኦቱዋን የጋስ።

¹⁴ ሄሳፈ ጉየ፥ ታኒ ይሁዳስነ እስራኤለስ ግዶን ደእያ እሻተይ ይዳይሳ በሳናዉ “እስፈተ” ጌተትያ ታ ናምአን ፃምኣ መንስ።

¹⁵ ቃስካ ጎዳይ ታና፥ “ናምአን ባዳ ፓና ሄንንቾታ ሚሽያ ኤካ።

¹⁶ ታኒ ሀ ቢታን እስ ሄንንቾ ደንና። እ ቆሄትዳ ዶርሳታ ማደና፤ ላለትዳ ዶርሳታ ሺሸና፤ መቅዳ ዶርሳታ ኮለና፤ ፓፃ ደኤይሳታ ሄመና። ሽን እ ሄሳ አግድ፥ ሞታ ሹክድ ሜስ፤ ኤንታ ኮልዝያ ጌስ።

¹⁷ ዶርሳ ዉድያ የግ ይዳ ሄ ፓና ሄንንቾታ አየ! እያ ቀስያነ እያ ኡሻቻ አይፍያ ቦላ ማሽ ዎ። እያ ኡሻቻ ኩሸይ ስሎ፤ እያ ኡሻቻ አይፈይ ቆቆ” ያግስ።