Zakaryaasa 10 - ጌሻ ማፃፋ

ፆሳይ ይሁዳ አንጃና

¹ ባልጎይ ጋክያ ዎደ ጎዳይ እራ እማና መላ ዎስተ። ጎዳይ እራ ቶክዳ ሻራ ኪቴስ፤ አሳስ እራ እሜስ፤ ጎሻን አታክልተ ዶልስስ።

² ኤቃት ሀዳባ ኦዶሶና፤ ማሮት ዎርዶ ቆንጨ በኦሶና፤ አሙሄይሳት ዎርዶ አሙሆ ኦዶሶና፤ ሀዳ ምን ምንሶና። ሄሳ ግሾ፥ አሳይ ይዳ ዶርሳዳ ቶይላቶሶና፤ ኤንታ ሄምያ አስ ባይና ግሾ፥ ኤንቲ ቆሄትዶሶና።

³ ጎዳይ ሀይሳዳ ያጌስ፦ “ታ ሀንቆይ ሄንንቾታ ቦላ ኤፅ ከይስ፤ ሄ ካለይሳታ ታኒ ሴራና። ኡባፈ ዎልቃማ ጎዳይ ባ ዉድያ ይሁዳ ሄሜስ። እ ኤንታ ኦላስ ጊግዳ ዎልቃማ ፓራ መላ ኦና።

⁴ ይሁዳ አሳ ግዶፈ ቁስተ ሹቻ መላ፥ ዱንካነ ሸ መላነ ኦላ ቶራ መላ ሀንዳ ካለይሳት ከያና።

⁵ ባንታ ሞርከታ ኦግያ ኡርቃዳ የያ ምኖ ኦላንቾታ መላ ግዳና። ጎዳይ ኤንታራ ደእያ ግሾ፥ ኤንቲ ኦለትድ ፆናና።

⁶ “ታኒ ይሁዳ አሳ ምንና፤ ዮሰፋ አሳ አሻና። ታኒ ኤንታዉ ቃትያ ግሾ፥ ኤንታ ዛራዳ ኤሀና። ኤንቲ ታኒ ካሰካ ኤንታ የጋቦና አሳ መላ ግዳና። ታኒ ጎዳ ኤንታ ፆሳ ግድያ ግሾ፥ ኤንታ ዎሳ ስአና።

⁷ እስራኤለ አሳይ ምኖ ኦላንቾ መላ ግዳና፤ ዎይነ ኡይዳ አሳዳ ኤንታ ዎዛናይ ኡፋይታና። ኤንታ ናይት ሄሳ በእድ፥ ሀሹ ጋና፤ ኤንታ ዎዛናይ ጎዳን ኡፋይታና።

⁸ “ታኒ ታ አሳ ሱይቃዳ ፄጋና፤ ኤንታ እስፈ ሺሻና። ታኒ ኤንታ ዎዛና፤ ኤንቲ ካሰይሳዳ ዳራና።

⁹ ታኒ ኤንታ ካዎተታ ግዶን ላልኮካ ኤንቲ ባንታ ደእያ ሃሆ ቢታን ግድድ ታና ሀሳያና። ቃስ ኤንትነ ኤንታ ናይቲ ደኦን ዳናነ ባንታ ቢታ ስማና።

¹⁰ “ታኒ ኤንታ ግብፀ ቢታፈ ዛራና፤ አሶረ ቢታፈ ኤንታ ሺሻና። ኤንታዉ ኡትያ በሲ ያና ጋካናዉ ታኒ ኤንታ ጋላዳ ቢታንነ ልባኖሰ ቢታን ኩንና።

¹¹ ኤንቲ መቶ አባ ግዶራ አያ ዎደ ታኒ ጎዳይ አባ ሴራና። ጪሞ ግድዳ ናይለ ሻፋይ መላና። አሶረ ቢታ ኦቶሮይ ካዉያና፤ ግብፀ ካዎተ ፃምአይ መቃና።

¹² ታኒ፥ ኤንታ ጎዳይ ኤንታ ምንና፤ ኤንቲ እያ ሱንን ሄመታና። ታኒ ጎዳይ ሀይሳ ኦዳይስ” ያጌስ።