Zakaryaasa 1 - ጌሻ ማፃፋ

ጎዳይ ባ አሳ ፄጌስ

¹ ዳርዮስ ካዎትዳ ናምአን ላይን፥ ሆስፑን አጌናን፥ ጎዳ ቃላይ እዶ ናኣ፥ ባራካ ናኣ፥ ናብያ ዛካርያሳኮ ይስ።

² “ጎዳይ ህንተ ማይዛታ ቦላ ዳሮ ሀንቀትስ።

³ ሽን ሀእ አሳስ ሀይሳዳ ያጋዳ ኦዳ፦ ‘ታኮ ስምተ፤ ታኒ ህንተኮ ስማና’ ያጌስ ኡባፈ ዎልቃማ ጎዳይ።

⁴ ካሰ ናበት፥ ህንተ አዋታኮ፥ ‘ህንተ ኢታ ኦግያፐነ ኢታ ኦሱዋፐ ስምተ’ ያግድ ኦድን፥ ስኦና እፅድ፥ ባንታ ኢታ ኦግያፐነ ኦሱዋፐ ስሞና እፅዳ፥ ህንተ ማይዛታዳ ሀኖፕተ” ያጌስ ኡባፈ ዎልቃማ ጎዳይ።

⁵ ህንተ ማይዛት ሀእ አዉን ደኦና? ሄ ናበት መርናዉ ፓፃ ደኦና?

⁶ ግዶሽን፥ ናበታ፥ ታ አይለታ ባጋራ ታኒ ኦድዳ ኪታትነ ህገት ኡባይ ህንተ ማይዛታ ቦላ ጋክቤኔ? ያትን፥ ኤንቲ ባንታ ናጋራ ፓፅድ፥ “ኡባፈ ዎልቃማ ጎዳይ ኑ ኦግያዳነ ኑ ኦሱዋዳ ኑስ እማና ግዳይሳዳ ባ ኦሱዋ ኦስ” ያግዶሶና።

ፓራታ ቆንጨ

⁷ ዳርዮስ ካዎትዳ ናምአን ላይን፥ ሻባፃ ጌተትያ ታማነ እስን አጌናን፥ ላታማነ ኦይዳን ጋላሳን፥ ጎዳ ቃላይ እዶ ናኣ፥ ባራካ ናኣ፥ ናብያ ዛካርያሳኮ ይስ።

⁸ ታኒ ቃማ ቆንጨን፥ ዞኦ ፓራ ቶግዳ እስ አስ በአስ። እ ዛንጋራን ደእያ ባርሰኔተ ጌተትያ ምታ ጋርሳን ኤቅስ፤ እያፐ ጉየ ባጋራ ዞኦ፥ ዳማነ ቦ ፓራት ደኦሶና።

⁹ ያትን ታኒ፥ “ታ ጎዳዉ፥ ሀይሳቲ አይቤ?” ያጋዳ ኦይቻስ። ታራ ሃሳያ ኪታንቾይ፥ “ሀይሳቲ አይበኮ ታኒ ነና በሳና” ያግስ።

¹⁰ ባርሰኔተ ም ጋርሳን ኤቅዳ ኡራይ፥ “ሀይሳቲ ሳኣ ኡባ ዩይድ ዎቻና መላ ጎዳይ ኪትዳይሳታ” ያግስ።

¹¹ ኤንቲ ባርሰኔተ ም ጋርሳን ኤቅዳ ጎዳ ኪታንቹዋኮ፥ “ኑኒ ሳአ ኡባ ዩይድ ዎችዳ፤ ሳእ ዎፑ ግድ ሳሮ ደኤስ” ያግዶሶና።

¹² ሄሳፈ ጉየ፥ ጎዳ ኪታንቾይ፥ “አቤት ኡባፈ ዎልቃማ ጎዳዉ፥ ኔኒ ሀንቀትን ሀእ ላፑን ታሙ ላይ ኩምስ፤ ያትን፥ ኔኒ የሩሳላመነ ይሁዳ ካታማታ ማሮና አዉደ ጋካናዉ ጋምአኔ?” ያግስ።

¹³ ጎዳይ ታራ ሃሳያ ኪታንቻዋስ ሎኦነ ምንያ ቃላን ዛሮ እሚስ።

¹⁴ ታራ ሃሳያ ኪታንቾይ ታኮ፥ “ሀ ቃላ አዋጃ! ኡባፈ ዎልቃማ ጎዳይ፥ ‘ታኒ የሩሳላመስነ ፅዮነስ ዳሮ ምሸታይስ።

¹⁵ ኑኒ ሳሮ ደኦስ ግድ ቆፕያ ሀራ ካዎተታ ቦላ ታኒ ዳሮ ሀንቀታስ። ታኒ ታ አሳ ቦላ ጉራ ሀንቀታስ፥ ሽን ኤንቲ አድ ታ ደርያ ቆህዶሶና።’

¹⁶ ሄሳ ግሾ፥ ታኒ የሩሳላመኮ ማሮታን ስማና፤ ታ ኬይ ዛሪድ ያን ኬፀታና፤ የሩሳላመ ካታማ ቦላ ዋ ዎዶሮ የጋና” ያጌስ ኡባፈ ዎልቃማ ጎዳይ።

¹⁷ ጉጃዳ ሀይሳዳ ያጋዳ አዋጃ፦ “ታ ካታማታ ዱረተይ ኩምድ ፓላሀና፤ ታኒ ጎዳይ ፅዮነ ዛራ ምንና፤ የሩሳላመ ዛራ ዶራና” ያጌስ ኡባፈ ዎልቃማ ጎዳይ።

ኦይዱ ካጨታ ቆንጨ

¹⁸ ታኒ ቆንጨን ኦይዱ ካጨታ በአስ።

¹⁹ ታራ ሃሳያ ኪታንቹዋ፥ “ሀይሳቲ አይቤ?” ያጋዳ ኦይቻስ። እ ዛሪድ፥ “ሀ ካጨት ይሁዳ፥ እስራኤለነ የሩሳላመ ላልዳ ካዎተታ” ያግስ።

²⁰ ሄሳፈ ጉየ፥ ጎዳይ ታና ብራታ ቆፅያ ኦይዱ ሂላንቾታ በስስ።

²¹ ታኒ፥ “ሀይሳቲ አይ ኦናዉ ይዶና?” ያጋዳ ኦይቻስ። እ ዛሪድ፥ “ሀይሳቲ ኦንካ ዛር ደንና መላ ይሁዳ ቢታ ላልዳ ካጨታ ካዉሻናዉነ ይሳናዉ ይዶሶና። ኤንቲ ይሁዳ ቢታ ላላናዉ ባንታ ካጭያ ደንዳ ሀራ ካዎተታ ካጭያ ሾጭድ ሳአን የጋናዉ ይዶሶና” ያግስ።