Zaaretho 9 - ጌሻ ማፃፋ

ኪተተ እፆ

¹ ነኖ፥ እስራኤለ ስአ፤ ኔፐ ግታትያነ ዎልቃምያ ካዎተታ፥ ግምበይ ሳሎ ጋክዳ ግታ ካታማታ ላታናዉ ሀች ዮርዳኖሰ ፕናሳ።

² ሄ ቢታን ደእያ አሳይ ምኖነ አዱሰ። ኔኒ፥ “ኦንካ ኤንታራ ኤቀታናዉ ዳንዳኦና አናቀ ኮቻታ” ግሽን ስአዳሳ።

³ ሽን ምያ ታማዳ ኔፐ ስንራ በይ ጎዳ፥ ነ ፆሳ ግደይሳ ሀች ኤራ። እ ኤንታ ይሳናነ ነ ስንን ኤንታ ካዉሻና። ጎዳይ ነዉ ግዳይሳዳ ነ ኤንታ ጎዳዳ ከሳናነ ኤለሳዳ ይሳና።

⁴ ጎዳይ፥ ነ ፆሳይ ኤንታ ነ ስንፈ ጎድዳፐ ጉየ፥ ነ ዎዛናን፥ “ታኒ ፅሎ ግድያ ግሾ፥ ሀ ቢታ ታ ላታና መላ ጎዳይ ታና ኤህስ” ጎፓ። ጎዳይ ኤንታ ነ ስንፈ የደድ ከስዳይ ኤንቲ ኢታ ግድያ ግሾሳ።

⁵ ነ ኤንታ ቢታ ላታናዉ ይዳይ ነ ፅሎነ ሱረ ግድያ ግሾ ግደና። ሽን ጎዳይ፥ ነ ፆሳይ ኤንታ ነ ስንፈ ጎድዳይ ሀ ካዎተት ኢታ ግድያ ግሾነ በን ነ ማይዛታስ አብራሃመስ፥ ይሳቃስነ ያይቆባስ ጫቅዳ ጫቁዋ ናጋናሳ።

⁶ ህዛ ነ ሄሳ አኬካ። ጎዳይ፥ ነ ፆሳይ ሀ ሎኦ ቢታ ነና ላትሰይ ነ ፅሎተ ግሾሳ ግደና፤ ነኒ ዎዛን ሙምዳ አስ።

ዎርቃ ማር

⁷ ጎዳ፥ ህንተ ፆሳ መላ ቢታን ዋትድ ይሎይዳኮ ዶጎፕተ። ህንተ ግብፀ ቢታፈ ከይዳ ጋላሳፐ ዶምድ፥ ሀች ሀ በሳ ጋካናዉ ጎዳ ቦላ ማካልደታ።

⁸ ኮሬባ ዙማ ቦላ ጎዳይ ህንተና ይሳናዉ ደንዳና ጋካናዉ ህንተ ጎዳ ይሎይደታ።

⁹ ጎዳይ ህንተራ ጫቅዳ ጫቆይ ፃፈትዳ ሎቸ ሹቻታ ኤካናዉ ታኒ ዙማ ቦላ ከይዳ ዎደ፥ ያን ካ ሞናነ ሃ ኡዮና ኦይታሙ ጋላስነ ኦይታሙ ቃማ ጋምአስ።

¹⁰ ሄሳፈ ጉየ፥ ፆሳ ብራን ፃፈትዳ ናምኡ ሎቸ ሹቻታ ጎዳይ ታዉ እሚስ። ህንተ ዙማ ፃጶን ሺቅዳ ዎደ ታማ ግዶን ጎዳይ ህንተዉ እምዳ ኪታት ሄ ሎቸ ሹቻ ቦላ ፃፈትድ ኡትዶሶና።

¹¹ ኦይታሙ ጋላሳፐነ ቃማፈ ጉየ፥ ጎዳይ ባ ጫቆ ቃላይ ፃፈትዳ ናምኡ ሎቸ ሹቻታ ታዉ እሚስ።

¹² ሄሳፈ ጉየ፥ ጎዳይ ታኮ፥ “ኤለሳዳ ሀይሳፈ ዱገ ዎ፤ ኔኒ ግብፀፈ ከስዳ ነ አሳይ ቱንስ፤ ኤንቲ ታ ኪታ ኤሶን አግድ፥ ኩሸን ኦሰትዳ ኤቃ ጎይናናዉ ስምዶሶና” ያግስ።

¹³ ቃስካ ጎዳይ ታኮ፥ “ታኒ ሀ አሳ በአስ፤ ኤንቲ ቱማ ዎዛና ሙመ አስ።

¹⁴ ህዛ ታ ኤንታ ይሶና መላነ ኤንታ ሱን ቢታ ቦላፈ ቁቾና መላ ታና ድጎፋ። ታ ነና ኤንታፈ ምኖነ ዳርያ ካዎተ ከሳና” ያግስ።

¹⁵ ታኒ ጫቆ ቃላይ ፃፈትዳ ናምኡ ሎቸ ሹቻታ ታ ኩሸን ኦይካዳ ዙማ ቦላፈ ዎስ፤ ሄ ዎደ ታማ ላጮይ ዙማ ቦላ በንቴስ።

¹⁶ ሄ ዎደ ጎዳ፥ ህንተ ፆሳ ቦላ ህንተ ናጋራ ኦዳይሳ በአስ። ህንተ ማራ ምስለን ኦሰትዳ ዎርቃ ኤቃ ጊግስደታ። ጎዳይ፥ ህንተና ኪትዳ ኦግያፐ ኤሶን ሀራ ሶ ስምደታ።

¹⁷ ታኒ ታ ኩሸን ኦይክዳ ናምኡ ሎቸ ሹቻታ ሆላዳ ህንተ በእሽን መንስ።

¹⁸ ሄሳፈ ጉየ፥ ጎዳ ይሎያናዉ ህንተ እያ ስንን ኢታ ኦሶ ኦድ፥ ናጋራ ኦዳ ግሾ፥ ካሰይሳዳ ኦይታሙ ጋላስነ ኦይታሙ ቃማ ጎዳ ስንን ጉፋናዳ ጋምአስ፤ ሄ ዎደ ታ ካ ማብከ፤ ሃ ኡያብከ።

¹⁹ ጎዳይ ህንተ ቦላ ይሎትድ ይሳናዉ ደንድዳ ግሾ ታኒ ያያስ። ሽን ጎዳይ ዛሪድ ታና ስእስ።

²⁰ ቃስ ጎዳይ ይሎትድ አሮናካ ይሳናዉ ኮይስ፤ ሽን ታኒ ሄ ዎደ አሮናስ ዎሳስ።

²¹ ታኒ ህንተ ናጋራን ኩምዳ ሄ ማራ ምስልያ ኤካዳ፥ ታማን ፁጋስ። እያ ትንቸረ ጋጫዳ ለ ከሳስ፤ ሄ ልያ ዙማፐ ጎግያ ሃራ የዳስ።

²² ቃስ ህንተ ታበራን፥ ማሳሀንነ ቅብሮት-ሀታዋን ጎዳ ይሎይደታ።

²³ ጎዳይ ህንተኮ፥ “ብድ፥ ታኒ ህንተዉ እምዳ ቢታ ላትተ” ያግድ፥ ቃደስ-ባርነፈ የድዳ ዎደካ ህንተ ጎዳ፥ ህንተ ፆሳ ኪታ እፅድ ማካልደታ። እያዉ አማነትበከታ ዎይኮ እያ ቃላስ ኪተትበከታ።

²⁴ ታኒ ህንተና ኤርዳ ዎድያፐ ዶምድ፥ ህንተ ጎዳስ ማካልደታ።

²⁵ ጎዳይ ህንተና ይሳና ግዳ ግሾ፥ ታኒ ኦይታሙ ጋላስነ ኦይታሙ ቃማ ጎዳ ስንን ጉፋናዳ ጋምአስ።

²⁶ ታኒ ጎዳ ፆሳኮ ሀይሳዳ ያጋዳ ዎሳስ፤ “አቤት ኡባ ሃርያ ጎዳዉ፥ ኔኒ ነ ግታ ዎልቃን ዎዝዳነ ነ ምኖ ኩሸን ግብፀፈ ከስዳ፥ ነ ላታ ግድዳ ነ አሳ ይሶፋ።

²⁷ ነ አይለታ፥ አብራሃመ፥ ይሳቃነ ያይቆባ ቆፓ፤ ኤንታ ዎዛና ምኖተ፥ ኤንታ ኢታተነ ኤንታ ናጋራ ታይቦፓ።

²⁸ ሄስ ሀኖና አትኮ፥ ኔኒ ኑና ያፐ ከስዳ ግብፀ አሳይ፥ ‘ጎዳይ ኤንታዉ እማና ግዳ ቢታ ገልሳናዉ ዳንዳእቦና ግሾነ ኤንታ እፅዳ ግሾ፥ መላ ቢታን ዎናዉ ኤንታ ከስስ’ ያጋና።

²⁹ ግዶሽን፥ ሀ አሳይ ኔኒ ነ ግታ ዎልቃንነ ነ ምጨትዳ ቀሰን ግብፀፈ ከስዳ ነ ላታ ግድዳ ነ አሳ” ያጋስ።