Zaaretho 5 - ጌሻ ማፃፋ

ታሙ ኪታታ

¹ ሙሰይ እስራኤለ አሳ ኡባ እስፈ ፄግድ፥ ሀይሳዳ ያግስ፤ “ህንተኖ፥ እስራኤለ አሳዉ ታኒ ሀች ህንተዉ ኦድያ ዎጋነ ህግያ ስእተ፤ ኤንታ ታማርተ፤ ምንድ ናግተ።

² ጎዳይ፥ ኑ ፆሳይ ኮሬባ ዙማ ቦላ ኑራ ጫቅስ።

³ ጎዳይ ሄ ጫቁዋ ጫቅዳይ ኑ አዋታ ፃላላራ ግዶናሽን፥ ሀች ደኦን ደእያ ኑ ኡባራ ጫቅስ።

⁴ ሄ ዙማ ቦላ ኤፅያ ታማ ግዶን ግድድ፥ ጎዳይ ሶምኦን ህንተራ ሃሳይስ።

⁵ ታኒ ሄ ዎደ ጎዳይ ግያባ ህንተዉ ኦዳናዉ፥ ጎዳፐነ ህንተፈ ግዶን ኤቃስ። ህንተ ታማስ ያይድ ዙማ ቦላ ከይበከታ። ጎዳይ ሀይሳዳ ያግስ።

⁶ “ግብፀ ቢታፈ፥ አይለተ ኬፈ ነና ዎዝዳይ ታኒ ጎዳ፥ ነ ፆሳ።

⁷ “ታፐ አትሽን፥ ሀራ ፆሳት ነዉ ደኦፖ።

⁸ “ቦላ ሳሎን ደእያባ ግድን፥ ጋርሳ ሳአን ደእያባ ግድን፥ ዎይኮ ሃ ግዶን ደእያባ ግድን፥ አይ ምስለ ነዉ ኤቃ ኦፋ።

⁹ ነ እያዉ ሆኮፋ ዎይኮ እያዉ ጎይኖፋ። ታኒ ታና እፀይሳታ አዋታ ናጋራ ግሾ፥ ናይታ ሄንነ ኦይዳን የለታ ጋካናዉ ሴራይስ። ታኒ፥ ጎዳይ፥ ነ ፆሳይ ቃናትያ ፆሳ።

¹⁰ ሽን ታኒ ታና ሲቀይሳታነ ታ ኪታ ናገይሳታ ሙኩሉ የለታ ጋካናዉ ታ መርና ሲቁዋ በሳይስ።

¹¹ “ጎዳ፥ ነ ፆሳ ሱን ጮ ፄጎፓ። ጎዳይ ባ ሱን ጮ ፄግያ ኡራ ሴሮና አገና።

¹² “ጎዳይ፥ ነ ፆሳይ ነና ኪትዳይሳዳ ሳምባታ ጋላሳ ጌሽ ኦዳ ናጋ።

¹³ ኔኒ ነ ኦሶ ኡባ ኡሱፑን ጋላሳን ኦ።

¹⁴ ሽን ላፑን ጋላሳይ ጎዳስ፥ ነ ፆሳስ ሳምባታ። ሄ ጋላስ አይ ኦሶካ ኦፋ። ኔኒ ዎይኮ ነ አደ ናአይ ዎይኮ ነ ማጫ ናእያ ዎይኮ ነ ኦሳንቾይ ዎይኮ ነ ኦሳንችያ ዎይኮ ነ ቦራይ ዎይኮ ነ ሀረይ ዎይኮ ነ ሀራ መሄት ዎይኮ ነ ካታማን ደእያ በተ አስ ሄ ጋላስ አይ ኦሶካ ኦፕተ። ኔኒ ሸምፐይሳዳ ነ አደ አይለይትነ ማጫ አይለት ሸምፖ።

¹⁵ ኔኒ ግብፀ ቢታን አይለ ግዳዳ ደእዳይሳ ዶጎፓ። ጎዳይ፥ ነ ፆሳይ ባ ዎልቃማ ኩሽያንነ ባ ምጨትዳ ቀስያን ያፐ ነና ከስዳይሳ ዶጎፓ። ጎዳይ፥ ነ ፆሳይ ሳምባታ ጋላስ ኔኒ ናጋና መላ ኪትዳይ ሄሳ ግሾሳ።

¹⁶ “ጎዳይ፥ ነ ፆሳይ ነዉ እምያ ቢታን ነ ላይይ አዱቃና ማላነ ነዉ ሎአና መላ ጎዳይ፥ ነ ፆሳይ ነና ኪትዳይሳዳ ነ አዋነ ነ አይዉ ቦንቻ።

¹⁷ “ዎፓ።

¹⁸ “ላሞፋ።

¹⁹ “ካይሶቶፓ።

²⁰ “ዎርዶ ማርካቶፋ።

²¹ “ሀራ አሳ ማቾ አሞቶፋ፤ እያ ኬ፥ እያ ሾቃ፥ እያ አደ አይልያ ዎይኮ እያ ማጫ አይልዉ ዎይኮ እያ ቦራ ዎይኮ እያ ሀርያ ዎይኮ እያዉ ደእያባ አይባካ አሞቶፋ” ያግስ።

²² ዙማ ቦላ ታማ፥ ሻራነ ማ ግዶፈ ጎዳይ ቁ ግዳ ግርሳን ዱላታ ኡባስ ኦድዳ ቃላት ሀይሳታ። እ ኤንታ ቦላ አይባካ ጉጅቤና፤ ኤንታ ናምኡ ሎቸ ሹቻታ ቦላ ፃፍድ ታዉ እሚስ።

²³ ዙማይ ታማን ፁገትሽን፥ ማ ግዶፈ ግርሳ ህንተ ስእዳ ዎደ ህንተ ኮቻ ሀላቃትነ ጭማት ታኮ ይድ፥

²⁴ ሀይሳዳ ያግዶሶና፤ “ኑኒ ጎዳ፥ ኑ ፆሳ ግርሳ ታማ ግዶፈ ስእዳ ዎደ ጎዳይ፥ ኑ ፆሳይ ባ ቦንቹዋነ ባ ግታተ ኑና በስስ። ፆሲ አሳራ ሃሳይን ስእድ አስ ደኦን ዳናዉ ዳንዳኤይሳ ሀች ኑኒ በእዳ።

²⁵ ሽን ሀ ዎልቃማ ታማይ ኑና ይሳናዉ ዳንዳኤስ፤ ያትን፥ ኑኒ አይስ ሀይቃኔ? ጎዳ፥ ኑ ፆሳ ቃላ ኑኒ ናምአን ስእኮ ሀይቃና።

²⁶ አሾ ማእዳ አሳን ኑኒ ስእዳይሳዳ ታማ ግዶን ግድድ ኦድሽን፥ ደኦ ፆሳ ቃላ ስእድ ደኦን ደእዳ አስ ኦኔ?

²⁷ ሄሳ ግሾ፥ ኔኒ ሺቃዳ ጎዳይ፥ ኑ ፆሳይ ግያባ ኡባ ስአ፤ ጎዳይ፥ ኑ ፆሳይ ነዉ ኦድያባ ኑስ ኦዳ፤ ኑካ ስእድ ኪተታና” ያግደታ።

²⁸ ህንተ ታዉ ኦድሽን ጎዳይ፥ ህንተ ግያባ ስእድ፥ ታኮ ሀይሳዳ ያግስ፤ “ሀ አሳይ ነዉ ኦድያባ ኡባ ስአስ፤ ኤንቲ ግዳባ ኡባይ ልከ።

²⁹ ኤንታዉነ ኤንታ ናይታስ መርናዉ ኡባባይ እንጀታና መላ ታዉ ያያናዉነ ታ ኪታ ናጋናዉ ኤንታዉ ኡባ ዎደ ሄሳ መላ ዎዛን ደኤረነ።

³⁰ ሀእ ኔኒ ባዳ ኤንቲ ባንታ ዱንካንያ ስማና መላ ኦዳ።

³¹ ሽን ኔኒ ሀይሳን ታ ማታን ጋምአ። ኤንቲ ላታና መላ ታኒ ኤንታዉ እምያ ቢታን ኤንቲ ኦናባ ኔኒ ኤንታ ታማርሳና ታ ኪታ፥ ታ አዋጁዋነ ታ ህግያ ኡባ ታ ነዉ ኦዳና” ያግስ።

³² ህንተኖ፥ እስራኤለ አሳዉ፥ ጎዳይ፥ ህንተ ፆሳይ ህንተና ኪትዳባ ኡባ ኦናዉ ናገትተ፤ እያፐ ኡሻች ዎይኮ ሀድርስ ጎፕተ።

³³ ህንተ ደኦን ዳና መላ፥ ኡባይ ህንተዉ እንጀታና መላነ ህንተ ላትያ ቢታን ህንተ ላይይ አዱቃና መላ፥ ጎዳይ ህንተ ፆሳይ ህንተና ኪትዳ ኪታ ናግተ።