Zaaretho 3 - ጌሻ ማፃፋ

ኦገ ፆነተ

¹ ሄሳፈ ጉየ፥ ኑኒ ስሚድ ባሳነ ኤፍያ ኦግያራ ከይዳ። ባሳነ ካዎይ ኦገይ፥ ባ ኦላንቾታ ኡባራ ኤድራአ ጌተትያ በሳን ኑራ ኦለታናዉ ከይስ።

² ሽን ጎዳይ ታኮ፥ “እያዉ ያዮፋ፤ ታኒ እያ፥ እያ ኦላንቾታነ እያ ቢታ ኡባ ነ ኩሸን አዳ እማስ። ሀሰቦናን ኡትድ ካዎትዳ አሞረታ ካዋ ስሆና ቦላ ኦዳይሳዳ ኔኒ እያ ቦላ ኦና” ያግስ።

³ ሄሳ ግሾ፥ ጎዳይ ኑ ፆሳይ ባሳነ ካዋ ኦገነ እያ አሳ ኡባ ኑ ኩሸን አድ እሚስ፤ ኑኒ ኤንታፈ እሱዋካ አሾና ዉርስድ ዎዳ።

⁴ ሄ ዎደ ኑኒ እያ ካታማታ ኡባ ኦይክዳ፤ ኑኒ ኦይክቦና እስ ካታምካ ዴና፤ ሄስካ፥ ባሳነ ካዋ ኦገይ አርጎባ ቢታን አይስያ ኡሱፑን ታሙ ካታማታ ኡባ ኦይክዳ።

⁵ ሀ ካታማት ኡባይ አዱሳ ግምበን ድረትዳይሳታነ ፐንገት ኮበትዳይሳታ። ግምበ ድርስ ባይና ዳሮ ጉታትካ ደኦሶና።

⁶ ሀሰቦና ካዋ ስሆና ቦላ ኦዳይሳዳ ኑኒ ኤንታ ኩመ ይስዳ። ኤንታ ካታማታን ደእያ አደ፥ ማጫነ ናአ አሾና ይስዳ።

⁷ ሽን መሄ ኡባነ ካታማታፐ ድእዳባ ኑስ ኤክዳ።

⁸ ሄ ዎደ ኑኒ አርኖና ዛንጋራፐ ብድ አርሞና ዙማ ጋካናዉ ደእያ ቢታ፥ ዮርዳኖሰ ሻፋፐ ዶሎሀ ባጋራ ደእያ ናምኡ አሞረ ቢታታ ካዎታፐ ኤክዳ።

⁹ (ስዶና ቢታ አሳይ አርሞና ዙማ፥ ስርዮና ግድ ፄግያ ዎደ፥ አሞረ ቢታ አሳይ ሳንራ ግድ ፄጎሶና።)

¹⁰ ኑኒ ደምባ ቢታን ደእያ ካታማታ ኡባ፥ ጋላዳ ቢታ ኡባ፥ ባሳነ ቢታ ኡባነ ባሳነ ቢታን ኦገይ ሃርያ ሳላካነ ኤድራአ ካታማታ ጋካናዉ ደእያ በሳ ኦይክዳ።

¹¹ (ራፋይመታፐ አትዳይ ባሳነ ካዋ ኦገ ፃላላ። እያ አርሳይ ብራታ አርስ፤ ሄ አርሳይ ሀች ጋካናዉ ራባ ጌተትያ አሞነታ ካታማን ደኤስ፤ እያ አዱሳተይ ሆስፑን ዋ፤ ጎምፓይ ኦይዱ ዋ።)

ዮርዳኖሰፐ ሄፍንን ኡትዳ ኮቻታ

¹² ሄ ቢታ ኑኒ ላትዳፐ ጉየ፥ አርኖና ሻፋ ዶናን ደእያ አሮኤራ ካታማፐ ዶምድ ደእያ በሳነ ደረይ ዳርያ ጋላዳ ቢታፈ ባጋ ጉጃዳ እያ ካታማታራ ሮቤላስነ ጋደ ኮቻስ ታኒ እማስ።

¹³ ጋላዳፐ አትዳይሳነ ኦገይ ሃርያ ባሳነ ቢታ ኡባ ምናሰ ኮቻ ባጋስ እማስ፤ ሄስካ፥ አርጎባ ካዎተ። (ሄ ባሳነ ቢታይ ኡባይ ራፋይመታ ቢታ ጌተትድ ፄገቴስ።

¹⁴ ምናሰ ኮቻፈ ያእር ኩመ አርጎባ ቢታ ላትስ፤ ሄስካ ጌሹረታነ ማእካታ ቢታ ጋፃ ጋካናዉ ደእያ ባሳነ ቢታ። እ ሄ ካታማታ ባ ሱንን ፄገታና መላ ኦስ፤ ሄሳ ግሾ፥ ኤንቲ ሀች ጋካናዉ፥ ያእራ ካታማታ ጌተትድ ፄገቶሶና።)

¹⁵ ጋላዳ ቢታ ምናሰ ኮቸ ግድዳ ማክራስ እማስ።

¹⁶ ሮቤላነ ጋደ ኮቻስ ጋላዳፐ ብድ አርኖና ሻፋ ማታ ጋካናዉ ደእያ ቢታ እማስ። ዱገሀ ባጋራ አርኖና ሻፋፐ ባጋይ ኤንታ ዛዋ፤ ቃስ ፑደሀ ባጋራ አሞነታ ቢታስ ጋፃ ግድዳ ያቦቃ ሻፋይ ዛዋ።

¹⁷ ዉሎሀ ባጋራ፥ ኤንታ ዛዋይ አራባን ደእያ ዮርዳኖሰ ሻፋ ጋኬስ፤ ሄስካ ጋልላ አባፈ ዶምድ ፕስጋ ዙማ ፃጶን ደእያ ማፅነ አባ (ሃይቆ አባ) ጋካናሳ።

¹⁸ ሄ ዎደ ታኒ ህንተና ሀይሳዳ ያጋዳ ኪታስ። “ጎዳይ ህንተ ፆሳይ ሄ ቢታ ህንተ ላታና መላ ህንተዉ እሚስ። ህዛ ህንተዉ ደእያ ቶራንቾታ ኡባ ኦላ ሚሸ ዳንጭስድ፥ ህንተ እሻታ ግድዳ እስራኤለ አሳፐ ስን አተ።

¹⁹ ህንተዉ ዳሮ መሄይ ደኤይሳ ታኒ ኤራይስ፤ ሄሳ ግሾ፥ ህንተ ማቸት፥ ህንተ ናይትነ ህንተ መሄይ ታኒ ህንተዉ እምዳ ካታማታን ደእሾና።

²⁰ ጎዳይ ህንተና ሸምፕስዳይሳዳ ህንተ እሻታ ሸምፕሳና ጋካናዉነ ዮርዳኖሰ ሻፋፐ ሄፍንን ጎዳይ፥ ህንተ ፆሳይ ኤንታዉ እምያ ቢታ ኤንቲ ኤካና ጋካናዉ ኤንታዉ ኦለትተ። ሄሳፈ ጉየ፥ ታኒ ህንተዉ እምዳ ቢታ ስመታ” ያግስ።

²¹ ታኒ ሄ ዎደ እያሱ ሀይሳዳ ያጋዳ ኪታስ። “ጎዳይ፥ ህንተ ፆሳይ ሀ ናምኡ ካዎታ ቦላ ኦዳባ ኡባ ኔኒ ነ አይፈን በአዳሳ፤ ህንተ ኦይካናዉ ብያ ካዎተታ ኡባ ቦላ ጎዳይ ሄሳዳ ኦና።

²² ህንተዉ ኦለተይ ጎዳ ህንተ ፆሳ ግድያ ግሾ፥ ኤንታዉ ያዮፍተ” ያጋስ።

ሙሰይ ካናነ ገልቤና

²³ ሄ ዎደ ታኒ ሀይሳዳ ያጋዳ ጎዳ ምንዳ ዎሳስ።

²⁴ “ኡባ ሃርያ ጎዳዉ፥ ነ ግታተነ ነ ምኖ ኩሽያ ታና፥ ነ አይልያ በሳናዉ ዶማዳሳ። ነ ኦያ ዎልቃማ ኦሶታ ኦናዉ ዳንዳኤይ ሳሎን ግድን ሳአን ሀራ ፆሲ ደኢ?

²⁵ ጎዳዉ፥ ታኒ ባዳ ዮርዳኖሰ ሻፋፐ ሄፍንን ደእያ ደረይ ዳርያ ሎኦ ቢታነ ልባኖሰ ደርያ በአና መላ ታና የዳርክ” ያግስ።

²⁶ ሽን ጎዳይ ህንተ ጋሶን ታና ሀንቀትድ ስኦናን እፅስ። ጎዳይ ታኮ፥ “ህዛ ነዉ ግዳና፤ ሀ ኦዳ ናምአን ደንዳ ሃሳዮፓ።

²⁷ ሄሳ አጋዳ ደንዳ፤ ፕስጋ ዙማ ቦላ ከያ፤ ያን ኤቃዳ ሄ ቢታ ዉሎሀ ባጋ፥ ፑደሀ ባጋ፥ ዱገሀ ባጋነ ዶሎሀ ባጋ ነ አይፍያ ቁ ኦዳ ፄላ። ኔኒ ሀ ዮርዳኖሰ ሻፋ ፖሎ ፕናካ።

²⁸ ሽን ኔኒ እያሱ ኪታ፤ እያ ዞራነ ምን። እ ሀ አሳ ካለድ ፕንናነ ሀ ኔኒ በእያ ቢታ ኤንታ ላትሳና” ያግስ።

²⁹ ሄሳ ግሾ፥ ኑኒ ቤት-ፓኦራ ስንን ደእያ ዛንጋራን ጋምእዳ።