Zaaretho 1 - ጌሻ ማፃፋ

እስራኤለት ሲናፐ ደንድዶሶና

¹ ሀ ማፃፋን ፃፈትዳ ቃላ ኡባይ ዮርዳኖሰ ሻፋፐ ሄፍንን ደእያ መላ ቢታን ኤንቲ ደእሽን፥ ሙሰይ እስራኤለ አሳስ ኦድዳ ቃላ። ሄ ዎደ ኤንቲ ሱፋፐ ስን ባጋራ ፓራና ካታማስ እስ ባጋራ፥ ቃስ ቶፌላ፥ ላባና፥ ሀፀሮታነ ድዛባ ካታማታ ግዶን ደእያ ዮርዳኖሰ ዛንጋራን ደኦሶና።

² ሳይረ ደርያ ባጋራ ኮሬባ ዙማፐ ብድ ቃደስ-ባርነ ጋካናዉ ቶሆን ታማነ እስ ጋላሳ ኦገ።

³ ግብፀፈ ኤንቲ ከይዳ ኦይታማን ላይን፥ ታማነ እስን አጌናን፥ ኮይሮ ጋላሳን፥ ጎዳይ ኤንታባ ሙሰ ኪትዳባ ኡባ እስራኤለ አሳስ ኦድስ።

⁴ ሄስ ሀንዳይ ሀሰቦና ካታማን ካዎትድ አሞረታ ሃርያ ስሆናነ አስታሮታንነ ኤድራአን ካዎትድ ባሳነ ሃርያ ኦገ፥ ሙሰይ ፆንዳፐ ጉየና።

⁵ አሳይ ዮርዳኖሰፐ ዶሎሀ ባጋራ፥ ሞአበን ደእሽን፥ ሙሰይ ሀ ህግያ ሀይሳዳ ያግድ ኤንታዉ ቆንጭሰ ዶምስ።

⁶ ኑኒ ኮሬባ ዙማ ቦላ ደእሽን፥ ጎዳይ፥ ኑ ፆሳይ ኑኮ ሀይሳዳ ያግስ። “ህንተ ሀ ደርያ ቦላ ዳሮ ጋምእደታ።

⁷ ዱንካንያ ላልተ፤ ደንድድ ደረይ ዳርያ አሞረታ ቢታነ አራባን ደእያ ኤንታ ዩሹዋን ደእያ ቢታ ኡባ ቢተ። ሄስካ ዮርዳኖሰ ዛንጋራ፥ ገዘነ ጋ ቢታ፥ ነገባነ መደትራነ አባ ጋፃ አተ። ካናነ ቢታ ቢተ፤ ልባኖሰ ደረታ ካንድ፥ ኤፍራፂሳ ሻፋ ጋካናዉ ቢተ።

⁸ ሄኮ፥ ታኒ ህንተዉ ሀ ቢታ እማስ። ብድ ህንተ አዋታስ፥ አብራሃመስ፥ ይሳቃስ፥ ያይቆባስነ ኤንታ ሼሻስ እማናዉ ጎዳይ ጫቅዳ ቢታ ላትተ” ያግስ።

ሙሰይ ሀላቃታ ሹምስ

⁹ ሙሰይ አሳኮ፥ “ሄ ዎደ ታኒ ህንተዉ ሀይሳዳ ያጋዳ ኦዳስ፤ ታኒ ታርካ ህንተና ቶካናዉ ዳንዳእከ።

¹⁰ ጎዳይ፥ ህንተ ፆሳይ ህንተ ታይቡዋ ሳሎ ፆልንቶዳ ዳርስስ።

¹¹ ጎዳይ ህንተ አዋታ ፆሳይ፥ ህንተና ሀይሳፈ አድ ሙኩሉ ቶሆ ጉጅድ ዳርሶነ እ ግዳይሳዳ ህንተና አንጆ።

¹² ሽን ህንተ መቱዋ፥ ህንተ ቶሁዋነ ህንተ ኦሻ ኡባ ታኒ ታርካ ዋታ ቶካናዉ ዳንዳአይና?

¹³ ህንተ ኮቻታፐ ጭንጫ፥ አኬካንቾነ ቦንቸትዳ አሳታ ዶርተ፤ ታኒ ህንተ ቦላ ኤንታ ሀላቃ ኦና” ያግስ።

¹⁴ ህንተ ዛሪድ፥ “ነ ቆፋይ ሎኦ” ያግደታ።

¹⁵ ሄሳ ግሾ፥ ታኒ ህንተ ኮቻፈ ጭንጫነ ቦንቸትዳ አሳታ ኤካዳ፥ ሻላቃ፥ ማቶ ሀላቃ፥ ሀምሳላቃነ አስራላቃ፥ ህንተና አይሰይሳታ ኦዳ ህንተ ቦላ ሹማስ።

¹⁶ ታኒ ኤንታ፥ “ህንተ እሻታ ግዶን ደእያ ኦዳ ስእተ፤ ሄ ኦዳይ እስ እስራኤለ አሳፐነ እያ እሻፐ ግዶን ዎይኮ እስራኤለ አሳፐነ ሀራ ደረ አሳፐ ግዶን ደእያባ ግድኮካ፥ ኦዳ ስእድ ሱረ ፕርድተ።

¹⁷ ፕርድ ፆሳባ ግድያ ግሾ፥ ህንተ ፕርዳን እስ ባጋ ማዶፍተ፤ ግታ ስኤይሳዳ ጉ ስእተ፤ አሳ ሶምኦስ ያዮፍተ። ዳሮ ዴፆ ግድዳ ኦዳታ ታኮ ኤህተ፤ ሄሳ ታኒ ስአና።”

¹⁸ ህንተ ኦናባ ኡባ ታ ሄ ዎደ ህንተና ኪታና።

ካናነ ዎቻናዉ ኪተትዳ አሳታ

¹⁹ ሄሳፈ ጉየ፥ “ኑኒ ኮሬባ ዙማፐ ደንድዳ፤ ጎዳይ ኑ ፆሳይ ኑና ኪትዳይሳዳ፥ ደረይ ዳርያ አሞረታ ቢታ ብያ ኦገን ደእያ ሄ ህንተ በእዳ ግታነ ያሽያ መላ ቢታ ካንድ ቃደስ-ባርነ ጋክዳ።

²⁰ ጎዳይ ኑ ፆሳይ ኑና ላትስያ፥ ደረይ ዳርያ አሞረታ ቢታይ ሀይሳ።

²¹ ጎዳይ ህንተ ፆሳይ ሀ ቢታ ህንተዉ እሚስ። ጎዳይ ህንተ አዋታ ፆሳይ ህንተዉ ኦድዳይሳዳ ከይድ፥ ሀ ቢታ ላትተ፤ ያዮፍተ፤ ኡፋይስ ቃንፆፍተ” ያጋስ።

²² ህንተ ኡባይ ታኮ ይድ፥ “ሄ ቢታ ፆሞስድ፥ ኑ ባናዉ በሲያ ኦግያባነ ገላና ካታማታ ሀኖታ ነዉ ኤህያ አሳታ ኑፐ ስን የዶስ” ያግደታ።

²³ ሄ ቆፋይ ታዉ ሎኦ ዳንን፥ ህንተፈ ታማነ ናምኡ አሳ፥ ኮቻፈ ኮቻፈ እስ አስ ዶራስ።

²⁴ ኤንቲ ብድ፥ ሄ ደረይ ዳርያ ቢታ ካንድ፥ ኤሽኮላ ዛንጋራ ጋካናዉ ደእያ ቢታ ዎችዶሶና።

²⁵ ሄ ቢታን ዶልያባፐ ጉ አይፈ ባንታ ኩሸን ኦይክድ ኑኮ ይዶሶና። ቃስ፥ “ጎዳይ ኑ ፆሳይ ኑስ እምያ ቢታይ ሎኦ ቢታ” ግያ ዎረ ኤክድ ይዶሶና።

²⁶ ሽን ህንተ ጎዳ ህንተ ፆሳ ኪታ እፃስ ግድ ያ ቦና እፅደታ።

²⁷ ህንተ ዱንካንያ ግዶን እሶይ እሱዋራ ሀይሳዳ ያግድ ዙዙምደታ። “ጎዳይ ኑና እፅዳ ግሾ፥ ይሳናዉ አሞረ ቢታ አሳታ ኩሸን አድ እማናዉ ግብፀ ቢታፈ ከስስ።

²⁸ ያትን ያ አይስ ባኔ? ኑ እሻት፥ ‘ሄ ቢታን ደእያ አሳት ኑፐ ዳሮሶናነ አዱቆሶና። ካታማትካ ግታነ ሳሎ ጋካናዉ ግምበትዳይሳታ። ሄሳ ቦላ ቃስ አናቀ ጌተትያ ዳሮ አዱሳ አሳታ ያን በእዳ’ ያግድ፥ ኑ ዎዛና ትልእስዶሶና” ያግደታ።

²⁹ ያትን ታኒ፥ “ያዮፍተ ዎይኮ ዳጋሞፍተ።

³⁰ ህንተ ስንራ ብያ ጎዳይ ህንተ ፆሳይ ካሰ ግብፀን ህንተ አይፍያ ስንን ህንተዉ ኦዳይሳዳ ሀእካ ህንተዉ እ ኦለታና።

³¹ ቃስ ህንተ ሀ መላ ቢታ ጋካናዉ ይዳ ኦገ ኡባን አስ ባ ናአ ቶከይሳዳ ጎዳይ ህንተ ፆሳይ ህንተና ቶክዳይሳ በእደታ” ያጋስ።

^32-33 ሀ ኡባይ ሀንንካ፥ ህንተ ዱንካናና በሳነ ህንተ ባና ኦግያ በሳናዉ ቃማ ታማ ቱሳን፥ ጋላስ ሻራ ቱሳን ህንተና ካለዳ ጎዳ ህንተ ፆሳ አማንበከታ።

³⁴ “ጎዳይ ህንተ ሃሳያ ስእድ ሀንቀትስ፤ ሀይሳዳ ያግድ ጫቅስ፤

³⁵ ታኒ ህንተ ማይዛታስ እማና ጋዳ ጫቅዳ ሀ ሎኦ ቢታ፥ ሀ ኢታ የለተፈ እሶይካ በኤና።

³⁶ ሀ ቢታ በአናይ ዮፎና ናኣ ካለባ ፃላላ። እ የዳ ቢታ እያስነ እያ ኮቻስ እማና፤ እ ባ ኩመ ዎዛናፐ ጎዳ ካልስ” ያግድ ጫቅስ።

³⁷ ህንተ ጋሶን ጎዳይ ታ ቦላካ ሀንቀትድ፥ ሀይሳዳ ያግስ፤ “ሀር አቶሽን፥ ነካ ሄ ቢታ ገላካ።

³⁸ ሽን ነና ማድያ ናወ ናአይ፥ እያሱይ ሄ ቢታ ገላና። እ እስራኤለ አሳ ሄ ቢታ ላትሳናዉ ደእያ ግሾ ኔኒ እያ ምን።

³⁹ ህንተ፥ ኑ ናይት ድኤታና ግዳ ጉት፥ ኢታነ ኬሀ ሻክድ ኤሮና ህንተ ናይት ሄ ቢታ ገላና። ታኒ ሄ ቢታ ኤንታዉ እማና፤ ኤንትካ ላታና።

⁴⁰ ሽን ህንተ ጉየ ስሚድ፥ ዞኦ አባ ኤፍያ ኦግያ ኦይክድ፥ መላ ቢታ ቢተ” ያግስ።

⁴¹ ህንተ ዛሪድ፥ “ኑኒ ጎዳ ቦላ ናጋራ ኦዳ፤ ሀእ ኑኒ ጎዳይ ኑ ፆሳይ ኪተይሳዳ፥ ከይድ ኦለታና” ያግደታ። ህንተ ኡባይ ኦላ ሚሸ ዳንጭድ፥ ደረይ ዳርያ ቢታ ከይድ ኦለታናይሳ ላፋባ ኦድ ቆፕደታ።

⁴² ሽን ጎዳይ ታኮ፥ “ታኒ ኤንታራ ዶና ግሾ፥ ኤንቲ ከይድ ኦለቶና መላ ኦዳ። አካይ፥ ጊኮ፥ ኤንታ ሞርከት ኤንታ ፆናና” ያግስ።

⁴³ ያግን፥ ታኒ ህንተዉ ኦዳስ፥ ሽን ህንተ ጎዳ ኪታ እፅደታፐ አትሽን፥ ታ ኦደይሳ ስእቤከታ፤ ያትድ ኦቶሮን ደረይ ዳርያ ቢታ ከይደታ።

⁴⁴ ሄ ደረይ ዳርያ ቢታን ደእያ አሞረት ህንተራ ኦላ ጋሄትድ፥ ህንተና ማ ጎደይሳዳ ጎድድ፥ ሳይረ ቢታፈ ብድ ሆርማ ጋካናዉ ሾጭዶሶና።

⁴⁵ ህንተ ጉየ ስሚድ፥ ጎዳኮ ዬክደታ፤ ሽን ጎዳይ ህንተ ዬሁዋ ስእቤና ዎይኮ ሀይዝቤና።

⁴⁶ ሄሳ ግሾ፥ ህንተ ቃደሳን አዱሳ ዎደ ጋምእደታ።