Yoonasa 4 - ጌሻ ማፃፋ

ዮናሳ ይሎነ ጎዳ ማሮታ

¹ ሽን ሄስ ዮናሳ ዳሮ ኡፋይስቤና። ሄሳ ግሾ፥ እ ይሎትስ።

² ጎዳኮ፥ “አቤት ጎዳዉ ታኒ ኮይሮ ታ ቢታን ደአሸ ግዳይስ ሀይሳ ግደኔ? ታኒ ነ ስንፈ በታዳ ታርሰሳ ባናዉ ኤለስዳይ ሀይሳሳ። ኔኒ ቃይነ ማሮት ኩምዳ ፆሲ ግደይሳ፥ ሀንቆስ ኤለሶናይሳነ ዉሮና ሲቆን ኩምዳይሳ፥ ቃስ ኤሀና ግዳ ኢታባካ ቃታዳ አግያ ፆሲ ግደይሳ ታኒ ካሰካ ኤራይስ።

³ ሀእ አቤት ጎዳዉ፥ ሀያና ታና ዎ፤ ደኦፐ ታዉ ሀይቆይ ሎኦ” ያግድ ዎስስ።

⁴ ጎዳይ እያኮ፥ “ኔኒ ሀይሳ ሸነታናዉ በሲ?” ያግስ።

⁵ ሄሳፈ ጉየ፥ ዮናስ ካታማፐ ጋፃ ከይድ ዶሎሀ ባጋን ኡትስ። ሄሳን ባዉ ሻቃራ ሻቃርድ እ ኩያን ኡትድ ካታማ ቦላ ጋካናዉ ደእያባ ባአናዉ ናጌስ።

⁶ አዋ ሱላፐ ዮናሳ አሻና መላ ጎዳይ እስ ጎሰ ዶልስስ። ሄ ጎሰ ሀይይ ዮናሳ ሁጰ ቦላ ባጋራ ኩያ ግዳና መላ ኦስ። ዮናስ ሄ ጎሰ ጋሶን ዳሮ ኡፋይትስ።

⁷ ሽን ዎንተ ጋላስ ዎንታ ጉራ ፆሳይ ጉፁነ ጊግስስ። ሄ ጉፁንያ ጎሰይ መላና ጋካናዉ ማሱ።

⁸ አዋይ ከይያ ዎደ ፆሳይ ዶሎሀ ባጋፈ ምሻ ጫርኮ የድስ። ዮናስ ላባናና ጋካናዉ አዋይ ዮናሳ ሁጵያ ፁግስ። ያትን እ፥ “ደኦፐ ታዉ ሀይቆይ ሎኦ” ያግድ ሀይቆስ ዎስስ።

⁹ ፆሳይ ዮናሳኮ፥ “ኔኒ ሀ ጎሰ ግሾ ይሎታናዉ በሲ?” ያግስ። ዮናስ፥ “ኤ በሴስ፤ ኡባራካ ሀይቃና ጋካናዉ ይሎታናዉ ታዉ በሴስ” ያግስ።

¹⁰ ያትን ፆሳይ ዮናሳኮ፥ “ዝነ ዶላዳ ሀች መልዳ ጎሴስ፥ ነ ዳቡሮናርስ፥ ነ ድቾናርስ ሀይሳ መላ ቃታዳሳ።

¹¹ ሽን ኡሻችነ ሀድርስ ሻክድ ኤሮና ፄታነ ላታሙ ሙኩሉ አስነ ዳሮ መሄይ ደእያ ሀ ግታ ካታማ ናናወስ ታኒ ቃታናዉ በሰኔ?” ያግስ።