Uruuto 2 - ጌሻ ማፃፋ

ኡሩታ ቦኤዛ ጋደን

¹ ኑሃምስ እ አዝና አበመለከ ባጋራ ዳቦያ፥ ቦኤዛ ጌተትያ እስ ኤረትዳ ዱረ አደይ ደኤስ።

² እስ ጋላስ ሞአበ ኡሩታ ኑሃሞ፥ “ታዉ ቃትያ አስ ካላዳ ቡ ቆራናዉ ካ ጫክያ በሲ ቦሻ?” ያጋሱ። እያካ፥ “ኤ ታ ናተ ባ” ያጋሱ።

³ ሄሳ ግሾ፥ ኡሩታ ባዳ ካ ጫክያ አሳ ጌዱዋፐ ቡ ቆሮ ዶማሱ። ፕኮ መላ ቡያ ቆርያ ጋደይ አበመለከ ዳቡዋ ቦኤዛ ጋደ ግድስ።

⁴ ሄኮ፥ ጉ ዎደፐ ቦኤዝ ቤተለመፐ ጋደ ብድ፥ ካ ጫክያ አሳ፥ “ጎድ ዎልቃ እሞ” ግድ ሳሮስ። ኤንቲ ዛሪድ፥ “ጎድ አንጆ” ያግዶሶና።

⁵ ያትን፥ ቦኤዝ ካ ጫከይሳታ ካፑዋ፥ “ሀና ናአተ ማጫስያ ኦኔ?” ያግድ ኦይችስ።

⁶ ካ ጫከይሳታ ካፖይ ዛሪድ፥ “ሀና የገልስያ ኑሃምራ ሞአበ ቢታፈ ይዳ ሞአበ ማጫስ።

⁷ እያ ታና፥ ‘ካ ጫከይሳታ ጌዱዋ ካላዳ ምርቅያ ግዶፈ ቡ ቆሮ?’ ጋዳ ኦይቻሱ። ሀእ ቡሮ ሸምፓናዉ ኡታውስ፤ ዎንታ ጉራ ዮደፐ ሀኖ ጋካናዉ ሀይሳን ቆራሸ ጋምአሱ” ያግስ።

⁸ ቦኤዝ ኡሩቶ፥ “ታ ናተ ስአ፤ ህዛፐ ቡ ቆራናዉ ሀራ ጋደ ቦፓ። ቃስ ሀይሳፈ አዉካ ቃፆፋ። ታ ማጫ አይለታራ ሀይሳን ፔአ።

⁹ አሳይ ካ ጫክያ በሳ ፄላ ፄላዳ ማጫ አይለታራ ግዳዳ ኤንታ ጌዶ ካላዳ ቆራ። አደ አይለት ነና ቦቾናዳ ታኒ ኤንታዉ ኦዳስ። ቃስ ነና ሳምኮ፥ አደ አይለት ትክድ ዎዳ ሃፈ ፓቃዳ ኡያ” ያግስ።

¹⁰ ኡሩታ ሾጫ ዝጋዳ፥ “ታኒ አላጋ ግድክና? ኔኒ ሀይሳ መላ ታዉ ቃትዳይ አይባሰ?” ያጋሱ።

¹¹ ቦኤዝ ዛሪድ፥ “ነ አዝናይ ሀይቆሳፐ ዶምን፥ ኔኒ ነ አዝና አየስ ኦዳባ ኡባ፥ ኔኒ ነ አይዉ፥ ነ አዋነ ነ የለትዳ ቢታ አጋዳ፥ ነ ኤሮና ደርያራ ዳናዉ ይዳይሳ ታኒ ጌሻዳ ስአስ።

¹² ኔኒ ኦዳባስ ጎድ ነዉ ኩሸ ዛሮ። ኔኒ እያ ቀፍያ ጋርሳን አታና ጋዳ ይዳ፥ እስራኤለ ጎዳይ ፆሳይ ነዉ ኩመባ እሞ” ያግስ።

¹³ ኡሩታ፥ “ታ ጎዳዉ፥ ኔኒ ታዉ ዳሮ ቃታዳሳ፤ ታኒ ነ አይለታፐ እስንዉካ ጋክከ፥ ሽን ታዉ ኬሀባ ሀሳያዳ፥ ታና ምንዳሳ” ያጋሱ።

¹⁴ ቁማ ምያ ዎደ ቦኤዝ፥ “ሃ ሺቃ፤ ኡይ ኤካዳ ዎይንያን ቱሻዳ ማ” ያግስ። እያካ ካ ጫክያ አሳ ማታን ኡታሱ። ቦኤዝ እዉ ባንጋ ሻሽ እሚስ፤ እያ ማዳ ካልን ካይ ግድድ ፓላህስ።

¹⁵ እያ ቡ ቆራናዉ ደንድያ ዎደ፥ ቦኤዝ ባ አይለታ፥ “ምርቅያ ግዶፈካ እያ ቆርኮ እዮ ዬላዮፕተ።

¹⁶ ኡባካ ምርቅያፈ ሾድድ እዉ የግተ እያ ኤኮ፤ እዮ ካጮፍተ” ያግስ።

¹⁷ ሄሳን ኡሩታ ኦማርስ ጋካናዉ ቆራሱ። እያ ቆራ ፐእዳይሳ ቆፅን፥ ታሙ ክሎ ግራመ ባንጋ ግደይሳ ኤካሱ።

¹⁸ እያ ሄ ካ ባአ ኤካዳ ካታማ ስማሱ፤ እያ አይ መላ ቆርዳኮ ኤሀዳ ባ አዝና አይዉ በሳሱ። ቃስ እያ ምሽን አትዳ ካ ኤህዳይሳ ከሳዳ እዉ እማሱ።

¹⁹ እ አዝና አይያ፥ “ሀች ሀይሳ አዉፐ ቆራዲ? አዉን ኦ ፔአዲ? ነዉ ሀይሳዳ ኬህዳ ኡራይ አንጀቶ” ያጋሱ። ያግን ኡሩታ እያ ባ ኦ ፔእዳ ጋድያ ጎዳባ ባ አዝና አየስ ኦዳሱ። “ታኒ ሀች ኦዳ ፔእዳ ጋድያ ጎዳ ሱንይ ቦኤዛ ጌተቴስ” ያጋሱ።

²⁰ ኑሃማ ዛራዳ፥ “ሀይቅዳይሳታስነ ደኦን ደኤይሳታስ ባ ኬሀተ አግቦና ጎዳይ እያ አንጆ” ያጋሱ። ጉጃዳካ፥ “ሀ አደይ ኑስ ማታ ዳቦ፤ ኑና ኡባ ዎዛናዉ ጋያ አሳታፐ እሶይ እያ” ያጋሱ።

²¹ ሞአበ ኡሩታ፥ “እ ታና፥ ‘ታ ካይ ጫከትድ ዉራና ጋካናዉ፥ ታ ኦሳንቾታፐ ሻከቶናሽን ያዳ ቡ ቆራ’ ያግስ” ያጋሱ።

²² ኑሃማ ባ ናአ ማቸ ኡሩትኮ፥ “ታ ናተ፥ ቱማካ ቦኤዛ ጋድያን ኦያ ማጫሳታራ ቢኮ ነዉ ሎኦ። ሀራ አሳ ጋደ ቢኮ ነና መቶና” ያጋሱ።

²³ ሄሳ ግሾ፥ ባንጋይነ ግስትያ ጫካይ ዉራና ጋካናዉ ኡሩታ ቦኤዛ ማጫ አይለታኮ ሺቃዳ፥ ቡያ ቆራሸ ጋምአሱ። ቃስ ባ አዝና አየራ እስፈ ደአሱ።