Taybo 8 - ጌሻ ማፃፋ

ፆምፐታ ኡተ ማራ

¹ ጎዳይ ሙሰኮ፥

² “አሮን ላፑን ፆምፐታ ኮጫ ቦላ ዎያ ዎደ ፖኦይ ስን ባጋራ ደእያ ሄራ ፖእሳና መላ ኦድ ዎ ጋዳ ኦዳ” ያግስ።

³ ጎዳይ ሙሰ ኪትዳይሳዳ፥ አሮን ፆምፐታ ኮጫ ቦላ ዎድ ስን ባጋራ ደእያ ሄራ ፖእሳና መላ ኦስ።

⁴ ፆምፐ ዎያ ኮጫይ፥ ጎዳይ ሙሰ በስዳይሳዳ ቶማፐ ብድ ቦላ ጪሻ ጋካናዉ ቆፀትዳ ዎርቃፈ ኦሰትስ።

ሌወታ ጌሾ ዎጋ

⁵ ጎዳይ ሙሰኮ፥

⁶ “እስራኤለ አሳ ግዶፈ ሌወታ ሻካዳ ዎጋዳ ኤንታ ጌሻ።

⁷ ኔኒ ኤንታ ጌሻናዉ ሀይሳዳ ኦ፤ ጌሽያ ሃ ኤካዳ ኤንታ ቦላ ዉርፃ፤ ኤንቲ ባንታ አሳተ ኡባ ሜደቶ፤ ባንታ ማኡዋ ሜጮ፤ ያንድ ኤንቲ ዎጋዳ ጌሽ ግዳና።

⁸ ካልድ ኤንቲ እስ ዎፋኖነ ካ ያርሾስ ግድያ ዛይተራ ዋላሄትዳ ሎኦ ለ ኤኮ፤ ቃስ ኔኒ ናጋራ ያርሾስ ሀራ እስ ዎፋኖ ኤካ።

⁹ ሄሳፈ ጉየ እስራኤለ አሳ ኡባ ሺሻዳ፥ ሌወታ ጌሻ ዱንካንያ ስን ኤሀዳ ኤሳ።

¹⁰ እስራኤለ አሳይ ኤንታ ሁጵያ ቦላ ባንታ ኩሽያ ዎ።

¹¹ ሌወት እስራኤለ አሳ ግዶፈ ታዉ ዱማትድ ኦና መላ ዩሾ ያርሾ ኦድ አሮን ታ ስን ሺሾ።

¹² ሌወት ባንታ ኩሽያ ናምኡ ዎፋኖታ ሁጰን ዎ። ሌወታ ናጋራ አቶተስ እሱዋ ናጋራ ያርሾ፥ ቃስ ሀንኩዋ ፁሳ ያርሾ ኦዳ ጎዳስ ያርሻ።

¹³ “ሌወታ ሻካዳ ታዉ ዱማያ፤ አሮናነ እያ አደ ናይታ ኤንታ ቦላ ሹማ።

¹⁴ ሄሳዳ ኦዳ ሌወታ እስራኤለ አሳፐ ታዉ ዱማያ፤ ኤንቲ ታባ ግዳና።

¹⁵ “ኔኒ ኤንታ ጌሽዳፐነ ዱማይዳፐ ጉየ ሌወት ጌሻ ዱንካንያን ባንታ ኦሱዋ ኦናዉ ዮ።

¹⁶ እስራኤለ አሳ ግዶፈ ኩመ ኤንቲ ታዉ እመትዶሶና፤ እስራኤለን ባይራ የለትዳ አደ ናይታ በሳን ሌወታ ታዉ ኤካስ።

¹⁷ እስራኤለ አሳ ግዶን ባይራ የለትዳ አሰ ግድን መሄ ግድን ኡባይ ታባ። ታኒ ግብፀ ቢታን ባይራ ኡባ ዎዳ ዎደ ኤንታ ታዉ ዱማያስ።

¹⁸ እስራኤለን ባይራ የለትዳ አደ ናይታ በሳን ታዉ ሌወታ ኤካስ።

¹⁹ እስራኤለ አሳ ግዶፈ ሌወታ አሮናስነ እያ አደ ናይታስ እማስ። እስራኤለ አሳይ ጌሻ ዱንካንያኮ ሺቅድ ቆሄቶና መላ ሌወት እስራኤለ አሳ ግሾ ጌሻ ዱንካንያን ኦናዉነ ናጋራ አቶተ ኤሀናዉ ዶረትዶሶና” ያግስ።

²⁰ ጎዳይ ሙሰ ኪትዳይሳዳ፥ ሙሰይ፥ አሮንነ እስራኤለ አሳ ኡባይ ሌወታ ዱማይዶሶና።

²¹ ሌወት ባንታና ጌሽዶሶና፤ ባንታ ማኡዋ ሜጭዶሶና። አሮን ኤንታ ጎዳስ ዱማ እሞ ኦድ ሺሽስ፤ ኤንታዉ ናጋራ አቶተስ ያርሽድ ኤንታ ጌሽስ።

²² ሄሳፈ ጉየ፥ ሌወት አሮናነ እያ አደ ናይታ አዋተ ጋርሳን ግድድ ጌሻ ዱንካንያ ግዶን ባንታ ኦሱዋ ኦናዉ ይዶሶና። ጎዳይ ሙሰ ሌወታ ዱማያናዉ ኪትዳይሳዳ ኤንቲ ኦዶሶና።

²³ ጎዳይ ሙሰኮ፥

²⁴ “ሀይስ ሌወት ኦና ዎጋ፤ ላይ ላታማነ እቻሻነ እያፐ ቦላ ግድዳ ሌወ አደ ኡባይ ጌሻ ዱንካንያን ኦናዉ ዮ።

²⁵ ሽን ላይ እሻታሙ ግድያ ዎደ ባንታ ኦሱዋፐ ሸምፖ፤ ዛር ኦፎ።

²⁶ ኤንቲ ጌሻ ዱንካንያን ኦያ ባንታ እሻታ ኦ ማዳናዉ ዳንዳኦሶና። ሽን ኤንቲ ባንታዉ አይ ኦሶካ ኦፎ። ህዛ ኔኒ ሌወታ ሀይሳዳ ኦስሳ” ያግስ።