Taybo 7 - ጌሻ ማፃፋ

ጌሻ ዱንካንያ አንጅሶ እሞታታ

¹ ሙሰይ ጌሻ ዱንካንያ ቶክድ ኦንግዳ ዎደ ሄ ዱንካንያነ እያ ሚሽያ፥ ያርሾ በሳነ እያ ሚሽያ ኡባ ዛይተን ትይድ ጌሽስ።

² ሄሳፈ ጉየ፥ እስራኤለ አሳ ኮቻን ኮቻን ታይብድ ካለያ ዎደ ሀላቃ ግድዳ ኡባይ፥

³ ጎዳስ እሞታ ሺሽዶሶና። ኤንቲ እምዳ እሞታይ ናምኡ ሀላቃ ሱንን እስ ፓራ ጋረ፥ ቃስ እስ እስ ሀላቃ ሱንን እስ እስ ቦሩ ኦድ፥ ኡሱፑን ጋረታነ ታማነ ናምኡ ቦራታ ጌሻ ዱንካንያ ኤህዶሶና።

⁴ ጎዳይ ሙሰኮ፥

⁵ “ጌሻ ዱንካንያ ኦሱዋስ ጎአና መላ ኔኒ ሄ እሞታ ኤንታፈ ኤካዳ፥ ኤንታ ኦሱዋስ ኦሱዋስ ኮሸይሳዳ ሻካዳ ሌወታስ እማ” ያግስ።

⁶ ሄሳ ግሾ፥ ሙሰይ ጋረታነ ቦራታ ኤክድ ሌወታስ እሚስ።

⁷ ገድሶና ኮቻስ ኮሸይሳዳ ሻክድ ኤንታ ኦሱዋስ ናምኡ ጋረታነ ኦይዱ ቦራታ እሚስ።

⁸ መራራ ኮቻስ ኮሸይሳዳ ሻክድ፥ ኤንታ ኦሱዋስ ኡይዱ ጋረታነ ሆስፑን ቦራታ እሚስ። ኤንታ ኦሱዋ አዋተን ካለይ ካህንያ አሮና ናኣ እታማራ።

⁹ ሽን ቃሃታ ኮቻ ኦሶይ ዱንካንያ ጌሻ ሚሸታ ሀሸን ቶሆ ግድያ ግሾ ሙሰይ ኤንታዉ ፓራ ጋረነ ቦሩ እምቤና።

¹⁰ ሙሰይ ያርሾ በሲ ጎዳስ ዱማይዳ ጋላስ ሀላቃት ያርሾ በሳ ስን ባንታ እሞታ ኤህዶሶና።

¹¹ ጎዳይ ሙሰኮ፥ “እስ እስ ጋላስ እስ እስ ሀላቃይ ያርሾ በሲ ጎዳስ ዱማያናዉ ባ እሞታ እሞ” ያግስ።

¹² ኮይሮ ጋላስ ባ እሞታ ኤህዳይ ይሁዳ ኮቻፈ አምናዳበ ናኣ ናአሶና።

¹³ ናአሶን ኤህዳ እሞታይ ጌሻ ዱንካነን ኤረትዳ ምዛነን 1,500 ግራመ ብራፐ ኦሰትዳ ፕጫ ሳነ፥ 800 ግራመ ብራፐ ኦሰትዳ ኦላትያ ሳነ፥ ናምኣካ ካ ያርሾ ያርሻናዉ ዛይተራ ዋላከትዳ ሎኦ ለ ኩምዳይሳ፤

¹⁴ ቃስ 110 ግራመ ዎርቃፈ ኦሰትዳ እፃነይ ኩምዳ ሻተ፤

¹⁵ ፁሳ ያርሾስ፥ እስ ዎፋኖ፥ እስ ማራዘ፥ እስ ላይ ኡርገ ዶርስ፤

¹⁶ ናጋራ ያርሾስ እስ ኮለ፤

¹⁷ እስፈተ ያርሾስ ናምኡ ቦራታ፥ እቻሹ ማራዘታ፥ እቻሹ ኮለታነ እቻሹ ኡርገ ዶርሳታ ኤህስ። ካልያ ሀንኮ ሀላቃትካ አምናዳበ ናአይ ናአሶን እምዳይሳዳ ባንታ እሞታ ኤህዶሶና።

^18-23 ናምአን ጋላሳን ይሳኮራ ኮቻፈ ዙአራ ናአይ ናትናኤል ባ እሞታ ኤህስ።

^24-29 ሄን ጋላሳን ዛብሎና ኮቻፈ ሄሎና ናአይ ኤልኣብ ባ እሞታ ኤህስ።

^30-35 ኦይዳን ጋላሳን ሮቤላ፥ ኮቻፈ ሻደኡራ ናአይ ኤልዙር ባ እሞታ ኤህስ።

^36-40 እቻሻን ጋላሳን ስሞና ኮቻፈ ዙርሻዳያ ናአይ ሳሉምኤል ባ እሞታ ኤህስ።

^41-47 ኡሱፑን ጋላሳን ጋደ ኮቻፈ ራጉኤላ ናአይ ኤልያሳፍ ባ እሞታ ኤህስ።

^48-53 ላፑን ጋላሳን ኤፍሬማ ኮቻፈ አምሁዳ ናአይ ኤልሻማእ ባ እሞታ ኤህስ።

^54-59 ሆስፑን ጋላሳን ምናሰ ኮቻፈ ፓዳዙራ ናአይ ጋማልኤል ባ እሞታ ኤህስ።

^60-65 ኡዱፉን ጋላሳን ብንያመ ኮቻፈ ግዳኦና ናአይ አብዳን ባ እሞታ ኤህስ።

^66-71 ታማን ጋላሳን ዳነ ኮቻፈ አምሳዳያ ናአይ አክኤዘር ባ እሞታ ኤህስ።

^72-77 ታማነ እስን ጋላሳን አሴራ ኮቻፈ ኦክራና ናአይ ፓግኤል ባ እሞታ ኤህስ።

^78-83 ታማነ ናምአን ጋላሳን ንፍታለመ ኮቻፈ ኤናና ናአይ አክራ ባ እሞታ ኤህስ።

⁸⁴ ያርሾ በሳይ ትየትያ ዎደ ጎዳስ ዱማያናዉ እስራኤለ ሀላቃት ኤህዳ እሞታይ ሀይሳፈ ካልድ ደኤይሳ። ብራፐ ኦሰትዳ ታማነ ናምኡ ፕጫ ሳነታነ ኦላትያ ሳነታ፤ ዎርቃፈ ኦሰትዳ ታማነ ናምኡ እፃነይ ኩምዳ ሻተታ ኤህዶሶና።

⁸⁵ እሶይ እሶይ 1,500 ግራመ ብራፐ ኦሰትዳ ፕጫ ሳነ፤ ቃስ እሶይ እሶይ 800 ግራመ ብራፐ ኦሰትዳ ኦላትያ ሳነ፥ ጌሻ ዱንካነን ኤረትዳ ምዛነን ሄ ኡባ 28 ክሎ ግራመ ኤህዶሶና።

⁸⁶ እፃነይ ኩምዳ ታማነ ናምኡ ዎርቃ ሻተታ 1.4 ክሎ ግራመ ጌሻ ዱንካነን ኤረትዳ ምዛነን ሺሽዶሶና።

⁸⁷ ፁሳ ያርሾስ ሺቅዳ መሄይ ካ ያርሹዋራ ዎላ ታማነ ናምኡ ዎፋኖታ፥ ታማነ ናምኡ ማራዘ፥ ታማነ ናምኡ እስ ላይ ኡርገ ዶርስነ፥ ታማነ ናምኡ ኮለታ ናጋራ ያርሾስ ሺሽዶሶና።

⁸⁸ እስፈተ ያርሾስ ላታማነ ኦይዱ ቦራት፥ ኡሱፑን ታሙ ማራዘታ፥ ኡሱፑን ታሙ ኮለታ፥ ኡሱፑን ታሙ እስ ላይ ኡርገ ዶርሳታ ሺሽዶሶና። ጌሻ ዱንካንያ ዱማያናዉ ትያ ዎደ ሺቅዳ ያርሾት ሀይሳታ።

⁸⁹ ሙሰይ ጎዳራ ኦደታናዉ ጌሻ ዱንካንያ ገልያ ዎደ ጫቆ ታቦትያ ካማ ቦላ ደእያ ናምኡ ክሩበታፐ ግዶን ግድድ ጎዳይ ኦድሽን ስእስ።