Taybo 4 - ጌሻ ማፃፋ

ቃኣታ ኮቻስ እመትዳ ኦሶ

¹ ጎዳይ ሙሰነ አሮና ሀይሳዳ ያግስ፤

² “ሌወ ኮቻታፐ ቃሃታ ኮቻታነ ኤንታ ሶ አሳ አሳ ሻካዳ ታይባ።

³ ላይ 30-50 ጋክዳ አደ ኡባ ጌሻ ዱንካንያን ኦናዉ ዳንዳኤይሳታ ታይባ።

⁴ ቃሃታ ኮቻት ጌሻ ዱንካንያን ኦና ኦሶይ ዱንካንያን ጎኤትያ ጌሻ ሚሸታ አዋተን ናጎ።

⁵ “አሳይ ጉታፐ ባናዉ ደንድያ ዎደ አሮንነ እያ አደ ናይት ጌሻ ዱንካንያ ግዶ ገልድ፥ ጫቆ ታቦትያ ስንን ደእያ ማጋራጁዋ ዎስድ ሄ ጫቆ ታቦትያ እያራ ፃፆ።

⁶ ሄ ካማ ቦላ ሊቆ ጋልባ ካሞ፤ እያ ቦላ ጉጅድ ካሎሰ ጫርቀ ካሞ፤ ቶክያ ካሶታ ሳጋዮታን አ።

⁷ “ጎዳስ ሺቅያ ኡይ ዎያ ፃርጴዛ ቦላ ካሎሰ ጫርቀ ካሞ። ፃርጴዛ ቦላ ሳነታ፥ ጭልፓታ፥ ፁአታነ ዎይነ ኡሻ ያርሹዋ ዱቅያ ኦቶታ ዎና። ኡይይ ኡባ ዎደ ፃርጴዛ ቦላ ደኦ።

⁸ ሄ ኡባ ቦላ ዞኦ ጫርቀ ካምድ እያ ቦላ ቃስ ሊቆ ጋልባ ካሞ፤ ሄሳፈ ካልድ ቶክያ ካሶታ ሳጋዮታን አ።

⁹ “ካሎሰ ጫርቀ ኤክድ ፆምፐ ዎያ ኮጫ፥ እያ ፆምፐታራ፥ እያ ቃጰታራ፥ ብዶ ከስያ ከረታራነ ዛይተ ትግያ ፃሮታራ ኡባ ካሞ።

¹⁰ ያትድ እያ ሚሸታ ኡባ ሊቆ ጋልባን ካምድ ቶክያ አርሳ ቦላ ዎና።

¹¹ “ካልድ ዎርቃ ያርሾ ሳፅንያ ካሎሰ ጫርቀን ካሞ፤ ቃስ እያ ቦላራ ሊቆ ጋልባ የጎ። ያትድ ቶክያ ካሶታ ሳጋዮታን አ።

¹² ሄሳዳካ፥ ጌሻ ዱንካንያ ግዶን ጎኤትያ ሚሸታ ኡባ ካሎሰ ጫርቀን ፃፆ፤ እያ ቦላ ሊቆ ጋልባ የግድ፥ ቶክያ አልጋ ቦላ ዎ።

¹³ “ናሰ ያርሾ በሳፈ ብዱዋ ፕትድ እያ ቦላ ኦቻ ቴራ ዳንያ ጫርቀ ካሞ።

¹⁴ ያርሾ በሳን ጎኤትያ ሚሸታ ኡባ፤ ታማ ጮጨታ፥ አሾ ቃጰታ፥ አካፋታነ ሃ ከረታ እያ ቦላ ዎድ፥ ሊቆ ጋልባ ካሞ። ያትድ ቶክያ ካሶታ ሳጋዮታን አ።

¹⁵ አሮንነ እያ አደ ናይት፥ ጌሻባታነ እያን ጎኤትያ ጌሻ ሚሸታ ኡባ ካምዳፐ ጉየ እስራኤለ አሳይ ጉታፐ ደንድያ ዎደ ቃሃታ ኮቻይ ይድ ቶኮ። ሽን ኤንቲ ሀይቆና መላ ጌሻ ሚሸታ ቦቾፎ። ጌሻ ዱንካነይ በሳፈ ደንድያ ዎደ ቃሃታ ኮቻስ ደእያ አዋተይ ሀይሳ።

¹⁶ “ካህንያ አሮና ናአይ አላዛር ፆምፐ ዛይትያ፥ ሳውያ እፃንያ፥ ያርሾ ካነ ትዮ ዛይትያ፥ ሄሳዳካ ጌሻ ዱንካንያን ደእያ ዱማ ዱማ ጌሻ ሚሸታ ኡባ ቦላ አዋተ ደኤስ” ያግስ።

¹⁷ ጎዳይ ሙሰኮነ አሮናኮ፥

¹⁸ “ቃሃታ ኮቻይ ሌወ ኮቻ ግዶፈ ሀይቅድ ያና መላ ኦፍተ።

¹⁹ ኡባፈ ጌሻ ሚሽያኮ ሺቅድ ሀይቆና መላ አሮንነ እያ አደ ናይት ጌሻ ዱንካንያ ግዶ ገልድ፥ ቆሃታ ኮቻይ ሁጰን ሁጰን ኦና ኦሱዋነ ቶካና ቶሁዋ ሻክድ በሶ።

²⁰ ቃሃታ ኮቻይ ሀይቆናዳ ጌሻ ሚሸታ በአናዉ ጉ ዎደስካ ዱንካንያ ግዶ ገሎፖ” ያግስ።

ገድሶና ኮቻስ እመትዳ ኦሶ

²¹ ጎዳይ ሙሰኮ፥

²² “ሌወ ኮቻፈ ገድሶና ኮቻነ ኤንታ ሶ አሳ አሳ ሻካዳ ታይባ።

²³ ላይ 30-50 ጋክዳ አደ ኡባ ጌሻ ዱንካንያ ግዶን ኦናዉ ዳንዳኤይሳታ ታይባ።

²⁴ ገድሶና ኮቻት ኦና ኦሶይ ሀይሳፈ ካልድ ደኤይሳ፤

²⁵ ኤንቲ ጌሻ ዱንካንያ ጋ ካማ፥ ካረ ካማ፥ ቦላራ የገትያ ሊቆ ዶአ ጋልባ፥ ገልያ ዉላ ቦላ ካቀትያ ማጋራጁዋ ቶኮ።

²⁶ ሄሳዳካ ጌሻ ዱንካንያነ ያርሾ በሳ ዩሹዋን ደእያ ዳባባ ማጋራጆታ፥ ዳባባ ገልያ ዉላ ቦላ ደእያ ገሸታ፥ ዎዶሮታነ እያዉ ጎኤትያ ሚሸታ ኡባ ቶኮ። ገድሶና ኮቻይ ሚሸታን ኦናዉ በሲያ ኦሶ ኡባ ኦ።

²⁷ ቶሆ ግድን፥ ሀራ ኦሶ ግድን፥ ኤንቲ ኦያ ኦሶ ኡባ አሮንነ እያ አደ ናይት ኤንታ ካል ኦስሶ። ኤንቲ ቶካናዉ በሲያባታ ኡባ ነ አዋተን ኤንታዉ ግሻ።

²⁸ ጌሻ ዱንካንያ ግዶን ገድሶና ኮቻይ ኦና ኦሶይ ሀይሳ። ኤንታ ኦሱዋ ካህንያ አሮና ናአይ እታማር ካልድ ኦስሶ።

ማራራ ኮቻስ እመትዳ ኦሶ

²⁹ “ሌወ ኮቻፈ መራራ ኮቻነ ኤንታ ሶ አሳ አሳ ሻካዳ ታይባ።

³⁰ ላይ 30-50 ጋክዳ አደ ኡባ ጌሻ ዱንካንያ ግዶን ኦናዉ ዳንዳኤይሳታ ታይባ።

³¹ “ኤንቲ ዱንካንያ ቱቀታ፥ ልዮታ፥ ቱሳታ፥ ዱንካንያ ገዳታ፥

³² ዱንካንያ ዩሾን ዳባባን ኤቅያ ቱሳታ፥ ሄ ቱሳታ ገዳታ፥ ሸታ፥ ዎዶሮታነ እያን ኮሽያ ሚሸታ ኡባ ቶኮ። እሶይ እሶይ ቶካናዉ በሲያ ሚሽያ እያ ሱንን ሻካዳ ግሻ።

³³ ጌሻ ዱንካንያ ግዶን መራራ ኮቻይ ኦና ኦሶይ ሀይሳ። ኤንቲ ኦና ኦሶ ኡባ ካህንያ አሮና ናኣ እታማር አዋተን ካልድ ኦስሶ” ያግስ።

ሌወ ኮቻ ታይቡዋ

³⁴ ሙሰይ፥ አሮንነ እስራኤለ ሀላቃት ቃሃታ ኮቻ ኤንታ ሶ አሳን አሳን ሻክድ ታይብዶሶና።

³⁵ ላይ 30-50 ጋክዳ አደ ኡባ ጌሻ ዱንካንያ ግዶን ኦናዉ ዳንዳኤይሳታ ታይብዶሶና።

³⁶ ኤንታ ታይቦይ 2,750.

³⁷ ጎዳይ ሙሰ ኪትዳይሳዳ ጌሻ ዱንካንያ ግዶን ኦና መላ ሙሰይነ አሮን ታይብዳ ቃሃታ ኮቻት ሀይሳታ።

³⁸ ገድሶና ኮቻት ባንታ ሶ አሳን አሳን ሻከትድ ታይበትዶሶና።

³⁹ ላይ 30-50 ጋክዳ አደት ኡባ ጌሻ ዱንካንያ ግዶን ኦናዉ ዳንዳኤይሳታ

⁴⁰ ታይቦይ 2,630.

⁴¹ ጎዳይ ሙሰ ኪትዳይሳዳ ጌሻ ዱንካንያ ግዶን ኦና መላ ሙሰይነ አሮን ታይብዳ ገድሶና ኮቻት ሀይሳታ።

⁴² መራራ ኮቻት ባንታ ሶ አሳን አሳን ሻከትድ ታይበትዶሶና።

⁴³ ላይ 30-50 ጋክዳ አደት ኡባይ፥ ጌሻ ዱንካንያ ግዶን ኦናዉ ዳንዳኤይሳታ

⁴⁴ ታይቦይ 3,200.

⁴⁵ ጎዳይ ሙሰ ኪትዳይሳዳ ጌሻ ዱንካንያ ግዶን ኦና መላ ሙሰይነ አሮን ታይብዳ መራራ ኮቻት ሀይሳታ።

⁴⁶ ሙሰይ፥ አሮንነ እስራኤለ ሀላቃት ሌወታ ኡባ ኤንታ ኮቻንነ ኤንታ ሶ አሳን አሳን ሻክድ ታይባ።

⁴⁷ ላይ 30-50 ጋክዳ አደት ኡባይ፥ ጌሻ ዱንካንያ ግዶን ኦናዉኑነ ሚሸታ ቶካናዉ ዳንዳእያ፥

⁴⁸ ሌወታ ታይቦይ 8,580.

⁴⁹ ጎዳይ ሙሰ ኪትዳይሳዳ፥ ኤንቲ ሁጰን ሁጰን ታይበትዶሶና። ሄሳዳካ ጎዳይ ሙሰ ኪትዳይሳዳ ኤንቲ ኦና ኦሶይነ ቶካና ቶሆይ እመትስ።