Taybo 36 - ጌሻ ማፃፋ

ሰሎጳዳ ማጫ ናይታ ላታ

¹ ዮሰፋ ኮቻፈ፥ ምናሰ ናኣ ማክራ ናኣ ጋላዳ ኮቻ ሀላቃት ሙሰኮነ እስራኤለ ሀላቃታኮ ይድ

² “ኑ ጎዳዉ፥ እስራኤለ አሳስ ላታ ቢታ ሳማን ሻካዳ እማና መላ ጎዳይ ነና ኪትስ፤ ቃስ ኑ እሻ ሰሎጳዳ ላታ እያ ማጫ ናይታስ እማና መላ ነና ኪትስ።

³ ኤንቲ ሀራ ኮቸ ግድዳ እስራኤለ አስ ገልኮ ኤንታ ላታይ ኑ አዋታ ላታፐ ኤከትድ ኤንታ ኤክያ ዘረስ ጉዠቴስ። ሄሳ ግሾ፥ ኑስ ሳማን እመትዳ ላታይ ጉፄስ።

⁴ እስራኤለ አሳስ እሻታማን ላይ ቦንችያ ባለይ ጋክያ ዎደ ኤንታ ላታይ ኤንታ ኤክዳ አሳ ኮቻስ ጉዠቴስ፤ ሄሳ ግድኮ ኤንታ ላታይ ኑ አዋታ ኮቻ ላታፐ ኤከታና” ያግዶሶና።

⁵ ሄሳ ግሾ፥ ሙሰይ ጎዳፐ ኤክዳ ኪታ እስራኤለ አሳስ ሀይሳዳ ያግድ ኦድስ፤ “ዮሰፋ ኮቻይ ግዳይስ ልከ።

⁶ ጎዳይ ሰሎጳዳ ማጫ ናይታባ ኪትዳይስ ሀይሳ፤ ኤንቲ ባንታዉ ዶስዳ አዝና ገላናዉ ዳንዳኦሶና፥ ሽን ኤንታ ኮቻፈ ግዳናዉ ኮሼስ።

⁷ እስራኤለ አሳ ላታይ እስ ኮቻፈ ሀራ ኮቻስ አፎ፤ እስራኤለ አሳይ ባንታ ኮቻ ላታ ቢታ ምንድ ናጎ።

⁸ እስራኤለ አሳ ግዶን ላታ ቢታ ኤክዳ ማጫስ ኦንካ ባ አዋ ኮቸ ግድዳ አዝና ገላናዉ ኮሼስ። ሄሳዳ ኦኮ ኤንታ ኮቻ ላታይ ኤንታ ኩሸን ጋምኤስ።

⁹ ያትኮ፥ ላታይ እስ ኮቻፈ ሀራ ኮቻኮ አና። እስ እስ ኮቻይ ባ ላታ ቢታ ኦይክዳ መላ ዳና” ያግስ።

¹⁰ ያትን፥ ሰሎጳዳ ማጫ ናይት ጎዳይ ሙሰ ኪትዳይሳዳ ኦዶሶና።

¹¹ ሰሎጳዳ ማጫ ናይት፥ ማህሎ፥ ትርፆ፥ ሆግሎ፥ ምልኮነ ኖኦ ጌተተይሳት ባንታ አዋ እሻታ ናይታ ገልዶሶና።

¹² ኤንቲ ዮሰፋ ናኣ ምናሰ ናይታ ኮቻፈ አዝና ገልዶሶና፤ ኤንታ ላታይ ኤንታ አዋ ኮቻስ ግድስ።

¹³ እያርኮፈ ሄፍንን፥ ዮርዳኖሰ ሻፋ ማታን፥ ደእያ ሞአበ ደንባን ሙሰ ባጋራ፥ ጎዳይ እስራኤለ አሳስ ኪትዳ ህገትነ ዎጋት ሀይሳታ።