Taybo 35 - ጌሻ ማፃፋ

ሌወታስ እመትዳ ካታማታ

¹ እያርኮፈ ሄፍንን፥ ዮርዳኖሰ ሻፋ ማታን ደእያ ሞአበ ደንባን፥ ጎዳይ ሙሰኮ ሀይሳዳ ያግስ፤

² “እስራኤለት ባንታ ላታፐ ሌወት ዳና ካታማታነ ኤንታ ዩሹዋን ሄን ቢታ እማና መላ ኤንታዉ ኦዳ።

³ ሄ ካታማት ኤንታዉ ዱሳ በሲ ግዶ፤ ሄን ቢታት ኤንታ ሚዛስ፥ ኤንታ ዶርሳስነ ኤንታ ሀራ መሄታስ ግዶ።

⁴ ህንተ ኤንታዉ እምያ ሄን ቢታይ ኡባ ባጋራ ካታማ ግምበ ድርሳፈ እስ ሙኩሉ ዋ ግዶ።

⁵ ካታማ ግዶ ኦድ ዶሎሀ ባጋራ ናምኡ ሙኩሉ ዋ፥ ዱገሀ ባጋራ ናምኡ ሙኩሉ ዋ፥ ዉሎሀ ባጋራ ናምኡ ሙኩሉ ዋነ ፑደሀ ባጋራ ናምኡ ሙኩሉ ዋ ዋተ። ሌወት ሄ ሄራ ባንታ ካታማስ ሄን ቢታ ኦ።

⁶ “ሌወታስ ህንተ እምዳ ካታማት፥ አሰ ዎዳ ኡራይ ባቃትድ አትያ ኡሱፑን ካታማታ፤ ሄሳታ ቦላ ጉጅድካ፥ ኦይታማነ ናምኡ ሀራ ካታማታ ኤንታዉ እምተ።

⁷ ኦይታማነ ሆስፑን ካታማታ ኤንታ ሄን ቢታራ እስፈ ሌወታስ እምተ።

⁸ እስራኤለ አሳ ላታፐ ኤንታ ላታ መላ ዳሮ ኮቻፈ ዳሮ ካታማ፥ ጉ ኮቻፈ ጉ ካታማ ኤክድ ሌወታስ እምተ” ያግስ።

ባቃትድ አትያ ካታማታ

⁹ ጎዳይ ሙሰኮ፥

¹⁰ “እስራኤለ አሳኮ ሀይሳዳ ያጋ፤ ዮርዳኖሰ ሻፋ ፕንድ፥ ካናነ ቢታ ህንተ ገልያ ዎደ፥

¹¹ እስ አስ ቆፖና አሰ ዎዳባ ግድኮ ሄ ኡራይ ባቃትድ አታና መላ ካታማታ ህንተዉ ዶርተ።

¹² ያን ሱ ዛራናዉ ኮያ ሀይቅዳ ኡራ ዳቦታፐ እ አቴስ። ሸምፖ ዎዳ ደርያ ስንን ፕርዳስ ሺቆና ሀይቃናዉ በሰና።

¹³ ሀ ህንተ እምያ ኡሱፑን ካታማት ህንተ ባቃትድ አትያ ካታማ ግዶ።

¹⁴ ሄ ካታማት ዮርዳኖሰ ሻፋፐ ዶሎሀ ባጋን ግዶ፤ ቃስ አትዳ ሄት ካናነ ቢታን ግዶ።

¹⁵ ሀ ኡሱፑን ካታማት ኤሮና አሰ ዎዳ እስራኤለ አሳይ፥ በታንቾትነ ጉ ዎደስ ህንተ ግዶን ደእያ አሳት ባቃትድ አትያ በሲ ግዶ።

¹⁶ “እስ አስ ሀራ አስ ብራታ ሚሸን ሾጭድ ዎኮ ሄ ኡራይ ሸምፖ ዎስ፤ እ ሀይቆ።

¹⁷ እስ አስ ዎናዉ ዳንዳእያ ሹቻን ሀራ አስ ጫድድ ዎኮ ሄ ኡራይ ሸምፖ ዎስ፤ እ ሀይቆ።

¹⁸ እስ አስ ዎናዉ ዳንዳእያ ም ሚሸን ሀራ አስ ሾጭድ ዎኮ ሄ ኡራይ ሸምፖ ዎስ፤ እ ሀይቆ።

¹⁹ ሱ ዛርያ ማታ ዳቦይ ሄ ሸምፖ ዎዳይሳ ደምኮ ዎ።

²⁰ “እስ አስ ሀራ አስ ባ ዎዛናን ሞርክድ ሱግ የግኮ ዎይኮ ሀይቆ ግድ እያ ቦላ እስባ ሆልን ሄ ኡራይ ሀይቅኮ፥

²¹ ዎይኮ ሞርክድ ባ ኩሸ ጩጩምድ ደችን ሄ ኡራይ ሀይቅኮ፥ እ ሸምፖ ዎስ፤ እ ሀይቆ። ሱ ዛርያ ማታ ዳቦይ ሸምፖ ዎዳይሳ ደምኮ ዎ።

²² “ሽን ሞርከተ ባይናን፥ እስ አስ ሀራ አስ አኬኮና ሱግድ ዎይኮ ቆፖና እያ ቦላ እስባ ሆልኮ፥

²³ ዎይኮ ዎናዉ ዳንዳእያ ሹቹ እ በኦና እያ ቦላ ሆልን፥ ሄ ኡራይ ሀይቅኮ፥ ሄሳን ሞርከተ ባይና ግሾነ እያ ቆሀናዉ ቆፕድ ደንዶና ግሾ፥

²⁴ ዱላታይ እያ ግዶንነ እያ ሱ ዛራናዉ ኮያ ኡራ ግዶን ፕርድያ ዎጋይ ካልድ ደእያ ዎጋ ግዶ።

²⁵ ኤሮና ዎዳይሳ ሱ ዛራናዉ ኮየይሳ ኩሸፐ ሄ ኡራ ዱላታይ አሽድ፥ እ ባቃትድ አትያ ካታማ ዛሮ። ሄ ዎደ ደእያ ዛይተን ትየትዳ ካህነ ሀላቃይ ሀይቃና ጋካናዉ እ ያን ደኦ።

²⁶ “ሽን ኤሮና ዎዳይስ ባቃትድ አትያ ካታማ ዛዋፐ በትኮ፥

²⁷ ሀይቅዳ ኡራ ዳቦይ እያ ደምድ ዎኮ፥ ሸምፖ ዎን ኦይሸተና።

²⁸ ሄ ዎደ ደእያ ካህነ ሀላቃይ ሀይቃና ጋካናዉ ሄ ኤሮና ዎዳ ኡራይ ባቃትድ አትያ ካታማን ኡቶ። ሽን ሄ ካህነ ሀላቃይ ሀይቅዳፐ ጉየ ኤሮና ዎዳ ኡራይ ባ ሶ ስማናዉ ዳንዳኤስ።

²⁹ “ሀ ዎጋይነ ህገይ ህንተ ደእያ ቢታን ህንተዉነ ህንተ ዘረስ ኤቅድ ደእያ ዎጋ ግዶ።

³⁰ “አሰ ዎዳ ኦንካ እ ሸምፖ ዎዳይሳ ናምኡ ዎይኮ ሄ ማርክ ማርካትኮ ሀይቆ፥ ሽን እስ አሳ ማርካተን ኦንካ ሀይቃናዉ በሰና።

³¹ ቃስ ሸምፖ ዎዳ አሳፐ አጫ ኤኮፍተ፤ እ ሀይቃናዉ በሴስ።

³² ባቃትድ አትያ ካታማ በትዳ ኦደፈካ ካህነ ሀላቃይ ሀይቃናፐ ስን ባ ሶ ስማና መላ አጫ እያፐ ኤኮፍተ።

³³ ሱ ቢታ ቱንስያ ግሾ ሱ ጉሶፍተ። ሱ ጉስዳ ኡራ ሱፈ አትሽን፥ ሱ ጉክዳ ቢታ ሀራ ኦገራ ቱናተፈ ጌሽያ ዎግ ባዋ።

³⁴ ታኒ፥ ጎዳይ እስራኤለ አሳ ግዶን ደእያ ግሾ፥ ህንተ ደእያ ቢታ፥ ታኒ አቅያ ቢታ ቱንሶፕተ” ያግስ።