Taybo 33 - ጌሻ ማፃፋ

ግብፀፈ ሞአበ ጋካናዉ

¹ ሙሰይነ አሮን ካለን፥ እስራኤለ አሳይ፥ ባንታ ጩጋን ጩጋን ግብፀፈ ከይድ ሲራትዳ ጉታታ ኦድያ ታርከይ ሀይሳ።

² ጎዳይ ኪትዳይሳ መላ ሙሰይ ኤንቲ ሲራትዳ በሳታ ሱን ኡባ ካል ካል ፃፍስ።

³ እስራኤለ አሳይ ኮይሮ አጌናን፥ ታማነ እቻሻን ጋላሳን፥ ፓስካ ቦንችያ ናምአን ጋላስ ደንድድ፥ ግብፀ አሳ ኡባይ በእሽን፥ ያዮና ራምሰፐ ከይዶሶና።

⁴ ሄ ዎደ ግብፀ አሳይ ጎዳ ጋዶን ሀይቅዳ ባንታ ባይራ ናይታ ሞጎሶና። ሄሳዳ ኦድ፥ ጎዳይ ኤንታ ፆሳታ ቦላ ፕርዳ ኤህስ።

⁵ እስራኤለ አሳይ ራምሰፐ ደንድድ ሱኮታ ጌተትያ በሳን ዱንካንዶሶና።

⁶ ሱኮታፐ ደንድድ መላ ቢታ ጋፃን ደእያ ኤታማን ዱንካንዶሶና።

⁷ ኤታማፐ ደንድድ ባአል-ፃፎናፐ ዶሎሀ ባጋን ደእያ ፕሀህሮታ ስሚድ ምግዶላ ማታን ዱንካንዶሶና።

⁸ ፕሀህሮታፐ ደንድድ፥ ዞኦ አባ ፕንድ፥ ሱዛ መላ ቢታ ብዶሶና። ኤታማ መላ ቢታን ሄ ጋላስ ሄመትድ ማራን ዱንካንዶሶና።

⁹ ማራፐ ደንድድ ታማነ ናምኡ ፑልቶትነ ላፑን ታሙ ዛምባት ደእያ ኤልማን ዱንካንዶሶና።

¹⁰ ኤልማፐ ደንድድ ዞኦ አባ ማታን ዱንካንዶሶና።

¹¹ ዞኦ አባ ማታፐ ደንድድ ሲና መላ ቢታን ዱንካንዶሶና።

¹² ሲና መላ ቢታፈ ደንድድ ራፋቃን ዱንካንዶሶና።

¹³ ራፋቃፐ ደንድድ ኤሉሳን ዱንካንዶሶና።

¹⁴ ኤሉሳፐ ደንድድ ሃ ባይና በሳን ራፍድማን ዱንካንዶሶና።

¹⁵ ራፍድማፐ ደንድድ ሲና መላ ቢታን ዱንካንዶሶና።

¹⁶ ሲና መላ ቢታፈ ደንድድ ክብሮት ሀትአዋን ዱንካንዶሶና።

¹⁷ ክብሮት ሀትአዋፐ ደንድድ ሀፀሮታን ዱንካንዶሶና።

¹⁸ ሀፀሮታፐ ደንድድ እርትማን ዱንካንዶሶና።

¹⁹ እርትማፐ ደንድድ እርሞን-ፓሬዛን ዱንካንዶሶና።

²⁰ እርሞን-ፓሬዛፐ ደንድድ ልብናን ዱንካንዶሶና።

²¹ ልብናፐ ደንድድ እርሳን ዱንካንዶሶና።

²² እርሳፐ ደንድድ ቃሄላታን ዱንካንዶሶና።

²³ ቃሄላታፐ ደንድድ ሸፋራ ዙማን ዱንካንዶሶና።

²⁴ ሸፋራ ዙማፐ ደንድድ ሀራዳን ዱንካንዶሶና።

²⁵ ሀራዳፐ ደንድድ ማቅሄሎታን ዱንካንዶሶና።

²⁶ ማቅሄሎታፐ ደንድድ ታሀታን ዱንካንዶሶና።

²⁷ ታሀታፐ ደንድድ ታራን ዱንካንዶሶና።

²⁸ ታራፐ ደንድድ ምትቃን ዱንካንዶሶና።

²⁹ ምትቃፐ ደንድድ ሀሽሞናን ዱንካንዶሶና።

³⁰ ሀሽሞናፐ ደንድድ ሞሰሮታን ዱንካንዶሶና።

³¹ ሞሰሮታፐ ደንድድ በን-ያእቃናን ዱንካንዶሶና።

³² በን-ያእቃናፐ ደንድድ ሆር-ሀግድጋዳን ዱንካንዶሶና።

³³ ሆር-ሀግድጋዳፐ ደንድድ ዮፅባታን ዱንካንዶሶና።

³⁴ ዮፅባታፐ ደንድድ አብሮናን ዱንካንዶሶና።

³⁵ አብሮናፐ ደንድድ ኤፅዮን-ጋብራን ዱንካንዶሶና።

³⁶ ኤፅዮን-ጋብራፐ ደንድድ ሲና መላ ቢታን ቃደሳን ዱንካንዶሶና።

³⁷ ቃደሳፐ ደንድድ ኤዶመ ቢታ ዛዋን ደእያ ሆራ ዙማን ዱንካንዶሶና።

³⁸ ካህነይ አሮን ጎዳ ኪታን ሆራ ዙማ ቦላ ከይድ፥ እስራኤለ አሳይ ግብፀ ቢታፈ ከይዳ ኦይታማን ላይን፥ እቻሻን አጌናን፥ ኮይሮ ጋላሳን ያን ሀይቅስ።

³⁹ አሮን ሆራ ዙማ ቦላ ሀይቅያ ዎደ እያዉ ላይ ፄታነ ላታማነ ሄ።

⁴⁰ ነገበ መላ ቢታን ካናነን ደእያ አራዳ ካዎይ እስራኤለ አሳ ዩሳ ስእስ።

⁴¹ እስራኤለ አሳይ ሆራ ዙማፐ ደንድድ ፃልሞናን ዱንካንዶሶና።

⁴² ፃልሞናፐ ደንድድ ፑኖናን ዱንካንዶሶና።

⁴³ ፑኖናፐ ደንድድ ኦቦታን ዱንካንዶሶና።

⁴⁴ ኦቦታፐ ደንድድ ሞአበ ቢታ ዛዋን ደእያ አባሪማን ዱንካንዶሶና።

⁴⁵ አባሪማፐ ደንድድ ድቦን-ጋዳን ዱንካንዶሶና።

⁴⁶ ድቦን-ጋዳፐ ደንድድ አልሞን-ድብላታይማን ዱንካንዶሶና።

⁴⁷ አልሞን-ድብላታይማፐ ደንድድ ናቦ ዙማ ስንን አባሪማ ዙማታ ቦላ ዱንካንዶሶና።

⁴⁸ አባሪማ ዙማታፐ ደንድድ እያርኮፈ ሄፍንን፥ ዮርዳኖሰ ሻፋ ማታን ደእያ ሞአበ ደንባን ዱንካንዶሶና።

⁴⁹ ዮርዳኖሰ ሻፋ ማታን ደእያ ሞአበ ደንባን፥ ቤት-ያሽሞታፐነ አቤል-ሳፅማ ዛንጋራፐ ግዶን ዱንካንዶሶና።

⁵⁰ እያርኮፈ ሄፍንን፥ ዮርዳኖሰ ሻፋ ማታን ደእያ ሞአበ ደምባን ጎዳይ ሙሰኮ፥

⁵¹ “እስራኤለ አሳስ ያጋዳ ኦዳ፤ ዮርዳኖሰ ሻፋ ፕንድ፥ ካናነ ቢታ ህንተ ገልያ ዎደ

⁵² ሄ ቢታን ደእያ አሳ ኡባ ህንተ ስንፈ የደተ። ሹቻፈ ማሰትድ ኦሰትዳ ምስለታነ ሼሽድ መዳ ኤቃታ ይስተ። ቃ ጎይኖ በሳታ ኡባ ላልተ።

⁵³ ሄ ቢታ ታ ህንተዉ እምዳ ግሾ እያ ላትድ ያን ደእተ።

⁵⁴ ህንተ ኮቻን ኮቻን ሳማ ከስድ ቢታ ሻከትተ። ታይቦን ዳርያ ኮቻታስ ዳልጋ ላታ እምተ፤ ታይቦን ጉፅያ ኮቻታስ ጉ ላታ እምተ። ሳማን ኤንታ ጋክዳ ቢታይ ኤንታባ ግዳና። ቢታ ህንተ ማይዛታ ኮቻን ኮቻን ሻክድ ኤክተ።

⁵⁵ ሽን ሄ ቢታን ደእያ አሳ ህንተ የደና እፅኮ፥ ህንተ አሽዳይሳት ህንተ አይፍያስ ፕንጮ፥ ህንተ ምይያስ አጉን ግዳና፤ ህንተ ዳና ቢታን ኡባ ዎደ ኦላ ደንድ ህንተና ዋይሳና።

⁵⁶ ህንተ ኤንታ የደና እፅኮ፥ ታ ኤንታ ቦላ ኦናዉ ሀልችዳባ ህንተ ቦላ ኦና ጋዳ ኦዳ” ያግስ።