Taybo 31 - ጌሻ ማፃፋ

ምድያመ ቦላ ደንድዳ ኦላ

¹ ጎዳይ ሙሰኮ፥

² “እስራኤለ አሳ ቆህዳ ግሾ ምድያመ አሳ ኦላዳ ሀሎ ከያ፤ ሄሳፈ ጉየ፥ ኔኒ ሀይቃዳ ነ ማይዛታ ጋካና” ያግስ።

³ ሄሳ ግሾ፥ ሙሰይ አሳኮ፥ “ምድያመ አሳ ኦልድ ጎዳ ሀሎ ከያና መላ ህንተ ግዶፈ ጉ አሳ ኦላስ ዳንጭስተ።

⁴ እስ እስ እስራኤለ ኮቻፈ እስ ሙኩሉ አደ አሳ ኦላስ የድተ” ያግስ።

⁵ ሄሳ ግሾ፥ እስ እስ እስራኤለ ኮቻፈ እስ እስ ሙኩሉ አሳይ ከይድ፥ ታማነ ናምኡ ሙኩሉ ኦላንቾት ኦላስ ጊግዶሶና።

⁶ ሙሰይ ካህንያ አላዛራ ናኣ ፕንሃሳ አዋተን፥ እስ እስ ኮቻፈ እስ እስ ሙኩሉ አስ ዶርድ ኦላስ የድስ፤ ፕንሃስ ብሸ ጌሻ ሚሸታነ ማላስ ፑንያ ዛየ ኤክድ ብስ።

⁷ ጎዳይ ሙሰ ኪትዳይሳዳ፥ ኤንቲ ምድያመ አሳ ኦልድ አደ ኡባ ዎዶሶና።

⁸ እቻሹ ምድያመ ካዎታ፥ ኤዋ፥ ረቄማ፥ ዙራ፥ ሁራነ ሬባ ጌተትያ አሳታ ዎዶሶና፤ ቃስ ብኦራ ናኣ ባላማካ ማሻን ዎዶሶና።

⁹ እስራኤለ አሳይ ምድያመ ማጫሳነ ናይታ ድእዶሶና፤ ኤንታ መህያ፥ ዶርሳነ ዴሻ ዉድያነ ኤንታ ሚሸ ኡባ ድእዶሶና።

¹⁰ ኤንቲ ደእያ ካታማታነ ኤንታ ጉታታ ኡባ ፁግዶሶና።

¹¹ አሳ መህያነ ደእዳባ ኡባ ኤክድ ብዶሶና።

¹² ኤንቲ ድእዳ አሳ፥ መህያነ ሻሎ ኡባ እያርኮፈ ሄፍንን፥ ዮርዳኖሰ ሻፋ ማታን ደእያ ሞአበ ደንባን ዱንካንዳ ሙሰኮ፥ ካህንያ አላዛራኮነ እስራኤለ ማባራኮ ኤህዶሶና።

¹³ ሙሰይ፥ ካህነያ አላዛርነ ማባራ ሀላቃት ኡባይ ዱንካንዳ ጉታፐ ጋፃ ከይድ ኤንታና ሞክዶሶና።

¹⁴ ሙሰይ ኦላፐ ስምዳ ቾራ ሞጮናታ፥ ሻላቃታነ ማቶ ሀላቃታ ቦላ ሀንቀትስ።

¹⁵ ሙሰይ ኤንታኮ፥ “ማጫሳ ኡባ አይስ ዎቤከቲ?

¹⁶ ኤንቲ ባላማ ዞርያ ስእድ፥ ፐኦራ ጌተትያ በሳን እስራኤለ አሳይ ጎዳ አግድ፥ ቦሻን ሀይቃናዳ ኦዳይ ማጫሳ ግደይሳ ዶግደቲ?

¹⁷ ሄሳ ግሾ፥ ሀእ አደ ናይታነ አደራ አቅዳ ማጫስ ኡባ ዎተ።

¹⁸ ሽን አደራ አቅቦና ማጫ ናይታ ኡባ ህንተዉ አሽተ።

¹⁹ ህንተ ግዶፈ አሰ ዎዳ አስ ዎይኮ አሀ ቦችዳ ኦንካ ጉታፐ ጋፃን ላፑን ጋላስ ኡቶ፤ ሄን ጋላሳንነ ላፑን ጋላሳን ህንተናነ ህንተ ድእዳ አሳ ጌሽተ።

²⁰ ሄሳዳካ ማኦ ኡባ፥ ጋልባፈ፥ ዴሻ እክሰፐነ ምፈ ኦሰትዳባታ ኡባ ጌሽተ” ያግስ።

²¹ ካህነይ አላዛር ኦላፐ ስምዳ ኦላንቾታኮ፥ “ጎዳይ ሙሰስ እምዳ ህግያ ማራይ ሀይሳ፤

²² ዎርቃ፥ ብራ፥ ናሰ፥ ብራታ፥ ቆርቆሮ፥ እርሳሰ፥

²³ ታማን ሜተቶናባት ኡባይ ታማን ጌያናዉ በሴስ። ሽን ታማን ሜተትያባት ጌሾ ሃን ጌያናዉ በሴስ።

²⁴ ላፑን ጋላሳን ህንተ ማኡዋ ሜጭተ፤ ህንተና ጌሽተ። ሄሳፈ ጉየ፥ ጉታ ገልተ” ያግስ።

ድእዳባ ሻከትዶሶና

²⁵ ጎዳይ ሙሰኮ፥

²⁶ “ኔራ፥ ካህንያ አላዛራራነ እስራኤለ ማባራ ሀላቃት ድኤትዳ አሳነ መህያ ታይብተ።

²⁷ ኦላ ብዳይሳታስነ ቦናይሳታስ ናምኡ ከስድ ሻክተ።

²⁸ ኦላ ብዳይሳታ ግሹዋፐ አሰ ግድን ሚዝ ግድን ሀረ ግድን ዶርሰ ዎይኮ ዴሸ ግድን እቻሹ ፄታፐ እስኖ ጎዳስ እምተ።

²⁹ ኤንታ ግሹዋፐ ኤክዳ ጎዳ እሞታ ካህንያ አላዛራስ እምተ።

³⁰ ሀንኮ እስራኤለታ ጋክዳ ግሹዋፐ፥ አሰ ግድን ሚዝ ግድን ሀረ ግድን ዶርሰ ዎይኮ ዴሸ ግድን እሻታማፈ እስኖ ኤክድ ጎዳ ዱንካንያ አዋተን አይስያ ሌወታስ እምተ” ያግስ።

³¹ ሙሰይነ ካህነይ አላዛር ጎዳይ ኪትዳይሳዳ ኦዶሶና።

^32-35 ኦላንቾት ባንታዉ ኤክን አትዳ ድኦይ 675,000 ዶርሳታ፥ 72,000 ሚዛታ፥ 61,000 ሀረታነ 32,000 ጌላኦ ማጫ ናይታ።

³⁶ ኦላ ብዳይሳታ ጋክዳ ግሾይ 337,500 ዶርሳታ፤

³⁷ ኤንታፈ ጎዳስ እመትዳይ 675.

³⁸ ሚዛት 36,000፤ ኤንታፈ ጎዳስ እመትዳይ 72.

³⁹ ሀረት 30,500፤ ኤንታፈ ጎዳስ እመትዳይ 61.

⁴⁰ ማጫሳት 16,000፤ ኤንታፈ ጎዳስ እመትዳይ 32.

⁴¹ ጎዳይ ሙሰ ኪትዳይሳዳ ጎዳ እሞታ ካህንያ አላዛራስ እሚስ።

^42-46 ኦላ ቦና እስራኤለ ማባራ ጋክዳ ግሾይ ኦላ ብዳ አሳ ግሹዋራ እስ ግና፤ እካ 337,500 ዶርሳታ፥ 36,000 ሚዛታ፥ 30,500 ሀረታነ 16,000 ጌላኦ ማጫ ናይታ።

⁴⁷ እስራኤለ ማባራ ጋክዳ ግሹዋፐ እሻታሙ አሳፐነ መህያፐ እሶ እሶ ከስድ ጎዳይ እያ ኪትዳይሳዳ ጌሻ ዱንካንያ አዋተን አይስያ ሌወታስ እሚስ።

⁴⁸ ሄሳፈ ጉየ፥ ቶራ ሞጮናት፥ ሻላቃትነ ማቶ ሀላቃት ሙሰኮ ሺቅድ፥

⁴⁹ “ኑኒ ነ አይለት ኑ አዋተ ጋርሳን ደእያ ኦላንቾታ ታይብን እሶይካ ፓጭቤና።

⁵⁰ ጎዳይ ኑ ሸምፑዋ አሽዳ ግሾ፥ ኑ እሶይ እሶይ ኤክዳ ዎርቃ አሌቆታ፥ ሳጋዮታ፥ ቶሆ አልቦታ፥ ምግዶታ፥ ሀይ ዎርቃታነ ቆ ዎርቃታ ጎዳስ እማናዉ ኤክድ ይዳ” ያግዶሶና።

⁵¹ ሙሰይነ ካህነይ አላዛር ዎርቃ አሌቆታ ኡባ ኤንታፈ ኤክዶሶና።

⁵² ሻላቃትነ ማቶ ሀላቃት ጎዳስ እምዳ ዎርቃይ ናምኡ ፄቱ ክሎ ግራመ ግድስ።

⁵³ ሀንኮ ኦላንቾት ኤህዳ ድኡዋ ባንታዉ ኤክዶሶና።

⁵⁴ ሙሰይነ ካህነይ አላዛር ሻላቃታፐነ ማቶ ሀላቃታፐ ኤክዳ ዎርቃ ጎዳ ስንን እስራኤለ አሳ ሀሳይስያባ ኦድ ጌሻ ዱንካንያ ግዶ ኤህዶሶና።