Taybo 30 - ጌሻ ማፃፋ

ጋሶ ዎጋ

¹ ሙሰይ እስራኤለ ዘረ ሀላቃታኮ፥ “ጎዳ ኪታይ ሀይሳ፤

² እስ አስ ጎዳስ እስባ ኦናዉ ጫቅኮ ዎይኮ እስባፐ ባና ናጋናዉ ቃንግኮ ጉየ ጎና ፖሎ።

³ “ባ አዋ ሶን ደእያ ጌላእያ ጎዳስ እስባ ኦናዉ ጫቅኮ ዎይኮ እስባፐ ባና ናጋናዉ ቃንግኮ፥

⁴ እ አዋይ እያ ጫቅዳይሳ ዎይኮ እያ ቃንገትዳይሳ ስእድ፥ እዮ ድጎና እፅኮ፥ እያ ፖላናዉ ኮሼስ።

⁵ ሽን እ አዋይ ሄሳ ስእድ እዮ ድግኮ እ ጫቆይነ እ ቃንገይ አታናዉ ዳንዳኤስ። እ አዋይ እዮ ድግዳ ግሾ ጎዳይ እዉ አቶ ጋና።

⁶ “ገሎና ማጫ ናእያ ጫቃዳ ደአሸ ዎይኮ እስባፐ ባና ናጋናዉ ቃንገታዳ ደአሸ አዝና ገልኮ፥

⁷ እ አዝናይ ሄሳ ስእድ እዮ ድጎና እፅኮ እያ ባ ጫቁዋነ ባ ቃንገ ፖላናዉ ኮሼስ።

⁸ ሽን እ አዝናይ ሄሳ ስእድ እዮ ድግኮ እያ ጫቅዳ ጫቆይ ዎይኮ ቃንገትዳ ቃንገይ እዮ ጎመና። ሄሳ ጎዳይ እዉ አቶ ጋና።

⁹ “ሽን አምእያ ዎይኮ ሳዮ ማጫስ ጫቅዳ ጫቁዋ ዎይኮ ቃንግዳ ቃንገ ፖላናዉ በሴስ።

¹⁰ “አዝናራ ደእያ ማጫስ ጫቅኮ ዎይኮ እስባ ኦናዉ ቃንግኮ፥

¹¹ እ አዝናይ ሄሳ ስእድ እዮ ድጎና እፅኮ፥ እያ ጫቅዳ ጫቁዋነ ቃንገትዳ ቃንገ ፖሎ።

¹² እ አዝናይ ሄሳ ስእዳ ጋላስ እዮ ድግኮ እ ጫቆይ ዎይኮ እያ ኦናዉ ቃንገትዳ ቃንገይ እዮ ጎመና። እ አዝናይ ድግዳ ግሾ ጎዳይ እዉ አቶ ጋና።

¹³ እ አዝናይ እያ ጫቅዳ ጫቁዋ ዎይኮ እያ ባና ካዉሻናዉ ቃንገትዳ ቃንገ ላላናዉ ዎይኮ ምንናዉ ዳንዳኤስ።

¹⁴ ሽን እ አዝናይ ሄ ጋላስ ዎይኮ ዎንተ ጋላስ አይኮካ ጎና እፅኮ፥ እ ጫቁዋ ዎይኮ እ ቃንገ ምንስ ጉሱ። እ ሄሳ ስእድ፥ ስእ ጊኮ እ ቆፋ ማእስ ጉሱ።

¹⁵ ሽን እ ሄሳ ስእ ጋምእድ ዛር ድግያባ ግድኮ ሄሳስ ኦይሸተይ እያ” ያግስ።

¹⁶ ህዛ ሀይስ አዝና ግዶንነ ማች ግዶን፥ ባ አዋራ ሶን ደእያ ጌላኦ ግዶንነ እ አዋ ግዶን ደእያ ጋሄተባ ጎዳይ ሙሰስ እምዳ ዎጋ።