Taybo 23 - ጌሻ ማፃፋ

ባላማ ኮይሮ ሃሳያ

¹ ባላም ባላቃኮ፥ “ሀይሳን ታዉ ላፑን ያርሾ በሳታ ግምባ፤ ቃስ ላፑን ኮርማታነ ላፑን ማራዘታ ታዉ ጊግሳ” ያግስ።

² ባላም ግዳይሳዳ ባላቅ ኦስ፤ ኤንቲ ናምአይ እስ እስ ያርሾ በሳን እስ ኮርማነ እስ ማራዘ ያርሽዶሶና።

³ ያትድ፥ ባላም ባላቃኮ፥ “ኔኒ ነ ያርሹዋ ማታን ደኣሻ፤ ታኒ ገደ ባና። ኦን ኤር ጎዳይ ታራ ጋሄታናዉ ዮና አገና፤ እ ታዉ ቆንጭስያባ ኡባ ታ ነዉ ኦዳና” ያግድ እስ ደረ ቦላ ከይስ።

⁴ ያን ፆሳይ ባላማራ ጋሄትን፥ ባላም፥ “ታኒ ላፑን ያርሾ በሳታ ጊግሳስ፤ እስ እስ ያርሾ በሳን እስ ኮርማነ እስ ማራዘ ያርሻስ” ያግስ።

⁵ ባላም ጋናባ ጎዳይ እያዉ ኦድድ፥ “ኔኒ ባላቃኮ ስማዳ እያዉ ሀ ኪታ ኦዳ” ያግስ።

⁶ ባላም ስምያ ዎደ ባላቅ ሞአበ ሀላቃታ ኡባራ ባ ያርሹዋ ማታን ኤቅስ።

⁷ ባላም ሀይሳዳ ያግድ ትንብተ ኦድስ፤ “ሞአበ ካዎይ፥ ባላቅ፥ ዶሎሀ ባጋ ደረታፐ፥ ሶረ ቢታፈ ታና ኤህስ፤ ‘ሃ ያ፤ ያይቆባ ታዉ ባዳ፤ እስራኤለ አሳ ባዳ’ ያግስ።

⁸ ፆሲ ባድቦናይሳ ታ ዋታዳ ባዶ? ጎዳይ፥ ባድቦናይሳ ታ ዋታዳ ባዶ?

⁹ ታ ቃ ዛላ ሁጰን ኤቃዳ ኤንታ ፄላይስ፤ ዙማ ቦላ ኤቃዳ ኤንታ በአይስ። ኤንቲ ባንታርካ ደእያ ደረ፤ ኤንቲ ሀራ ካዎተታፐ ዱማ ግደይሳ ኤሮሶና።

¹⁰ ያይቆባ ባና ኦን ታይብ ኦንጋኔ? እስራኤለ ሳይሱዋ ኦን ታይብ ካንኔ? ፅሎታ ሀይቁዋ ታ ሀይቃርክና፤ ታ ዉርሰይ ኤንታይሳዳ ሀኖ” ያግስ።

¹¹ ባላቅ ባላማኮ፥ “ኔኒ ታ ቦላ ኦያባይ አይቤ? ታኒ ነና ታ ሞርከታ ባዳና መላ ኤሀስ፥ ሽን ኔኒ ኤንታ አንጃዳሳ፤ ሀራባ አይኮካ ኦባካ” ያግስ።

¹² ባላም ዛሪድ፥ “ጎዳይ ታዉ ኦደይሳፈ ሀራ ኦዶዬ?” ያግስ።

ባላማ ናምአን ሃሳያ

¹³ ባላቅ ባላማኮ፥ “ኤንታ ኔኒ በአናዉ ዳንዳእያ ሀራ በሲ ታራ የ፤ ያንካ ነ ኤንታፈ ጉራ በኣሳፐ አትሽን፥ ኡባ በአካ። ኔኒ ያን ኤቃዳ ኤንታ ባዳርክ” ያግስ።

¹⁴ ፕስጋ ደርያ ሁጰን ደእያ ፆፍማ ደምባ ኤፍስ። ያን ላፑን ያርሾ በሳታ ግምብድ፥ እስ እስ ያርሾ በሳን እስ ኮርማነ እስ ማራዘ ያርሽስ።

¹⁵ ባላም ባላቃኮ፥ “ኔኒ ሀይሳን ነ ያርሹዋ ማታን ደኣሻ፤ ታኒ ጎዳራ ጋሄታናዉ ገደ ባና” ያግስ።

¹⁶ ጎዳይ ባላማራ ጋሄትድ፥ “ኔኒ ባላቃኮ ስማዳ እያዉ ሀ ኪታ ኦዳ” ያግስ።

¹⁷ ባላም ስሚድ ያ ዎደ ባላቅ ሞአበ ቢታ ሀላቃታራ ያርሹዋ ማታን ኤቅዳይሳ ደምስ። ባላቅ እያኮ፥ “ጎዳይ ነዉ አይ ኦድዴ?” ያግስ።

¹⁸ ባላም ሀይሳዳ ያግድ ትንብተ ኦድስ፤ “ስፎራ ናአዉ፥ ባላቃ፥ ደንዳ፤ ታ ኦደይሳ ሎይዳ ስአ።

¹⁹ ዎርዶታናዉ ፆሳይ አሰ ግደና፤ ባ ቆፋ ላማናዉ አሳ ናአ ግደና። ኦድድ፥ ባ ኦድዳይሳ ኦኔ? ዎይኮ ባ ግዳይሳ ፖለኔ?

²⁰ ታኒ አንጃናዉ ኪታ ኤካስ፤ እ አንጅስ፤ ታ ላማናዉ ዳንዳእከ።

²¹ ያይቆባ ኮቻ ቦላ ኢታባይ ዬና፤ እስራኤለ አሳ መቶይ ጋከና። ጎዳይ፥ ኤንታ ፆሳይ ኤንታራ ደኤስ፤ እ ኤንታዉ ካዎ ግደይሳ አዋጆሶና።

²² ፆሳይ ኤንታ ግብፀፈ ከስስ፤ እ ምኖ መንዳ ኤንታዉ ኦለቴስ።

²³ ያይቆባ ኮቻ ቦላ ብት ኦና፤ እስራኤለ አሳ ቆሀና ሙሩኖይ ባዋ። ሄኮ፥ ያይቆባስነ እስራኤለስ ‘ፆሳይ ኦዳባ በእተ’ ያጋና።

²⁴ ሀ አሳይ ማጫ ጋሞዳ ደንዴስ፤ ባ ኦይክዳባ ማና ጋካናዉ፥ ባ ዎዳይሳ ሱ ኡያና ጋካናዉ፥ ሸምፖና ጋሞዳ ደንዶሶና” ያግስ።

²⁵ ያትን፥ ባላቅ ባላማኮ፥ “ነ ኤንታ ኡባካ ባዶፋ፤ ኡባካ አንጆፋ” ያግስ።

²⁶ ባላም ዛሪድ፥ “ታኒ ጎዳይ ግያባ ፃላላ ኦና ጋዳ ነዉ ኦዳብክና?” ያግስ።

ባላማ ሄን ሃሳያ

²⁷ ባላቅ ባላማኮ፥ “ሃያ፤ ታ ነና ሀራ በሲ ኤፋና። ኦን ኤር፥ ሄሳን ፆሳይ ኡፋይትድ፥ ኔኒ ያን ኤቃዳ ኤንታ ባዳና መላ ኦናዉ ዳንዳኤስ” ያግስ።

²⁸ ባላቅ ባላማ ባዙዋ ዱገ ፄልያ ፓኦራ ዙማ ቦላ ኤፍስ።

²⁹ ባላም፥ “ኔኒ ሀይሳን ታዉ ላፑን ያርሾ በሳታ ግምባ፤ ቃስ ላፑን ኮርማታነ ላፑን ማራዘታ ታዉ ጊግሳ” ያግስ።

³⁰ ባላም ግዳይሳዳ ባላቅ ኦስ፤ እስ እስ ያርሾ በሳን እስ ኮርማነ እስ ማራዘ ያርሽስ።