Taybo 21 - ጌሻ ማፃፋ

አራዳ ፆነተ

¹ ካናነ ቢታን፥ ነገበ መላ ቢታን ደእያ አራዳ ካዎይ፥ እስራኤለ አሳይ አታርማ ኤፍያ ኦግያራ የይሳ ስእዳ ዎደ እስራኤለ አሳራ ኦለትድ ኤንታፈ ጉ አሳ ድእዶሶና።

² ሄ ዎደ እስራኤለ አሳይ፥ “ኔኒ ሀ አሳ ኑ ኩሸን አዳ እምኮ፥ ኑኒ ኤንታነ ኤንታ ካታማታ ኩመ ይሳና” ያግድ ጎዳስ ቃንግዶሶና።

³ ጎዳይ እስራኤለ አሳ ዎሳ ስእድ፥ ካናነታ ኤንታ ኩሸን አድ እምን፥ ኤንቲ ካናነታነ ኤንታ ካታማታ ኩመ ይስዶሶና። ሄሳ ግሾ፥ ሄ በሳይ ሆርማ ጌተትድ ሱንትስ።

ናሰ ብራታፐ ኦሰትዳ ሾሹ

⁴ እስራኤለ አሳይ ሆራ ዙማፐ ደንድድ፥ ኤዶመ ቢታ ዩሹዋራ ባናዉ ዞኦ አባኮ ኤፍያ ኦግያራ ብዶሶና፤ ሽን ኦገ ቦላ አሳስ ዳንዳአይ ዉርስ።

⁵ አሳይ፥ “ኑኒ መላ ቢታ ሀይቃና መላ ግብፀፈ ኑና አይስ ከስደቲ? ካ ባዋ፤ ሃ ባዋ፤ ሀ ኢታ ካይ ኑና ሻትስ” ያግድ ፆሳ ቦላነ ሙሰ ቦላ ዙዙምዶሶና።

⁶ ያትን፥ ጎዳይ አሳ ግዶ ማርዘራ ደእያ ሾሽ የድን፥ እስራኤለ አሳፐ ዳሮት ዱከትድ ሀይቅዶሶና።

⁷ አሳይ ሙሰኮ ይድ፥ “ኑኒ ጎዳ ቦላነ ነ ቦላ ዙዙምድ፥ ናጋራ ኦዳ። ጎዳይ ሀ ሾሻታ ኑፐ ሃሳና መላ ኑስ ዎሳርክ” ያግዶሶና። ያትን፥ ሙሰይ አሳ ግሾ ዎስስ።

⁸ ሄ ዎደ ጎዳይ ሙሰኮ፥ “ናሰ ብራታፐ ሾሽ መዳ፥ ኤንታ ስንን ም ቦላ ካቃ፤ ሾሻን ዱከትዳ ኦንካ እያ በእኮ ፓፃና” ያግስ።

⁹ ያትን፥ ሙሰይ ናሰ ብራታፐ ሾሽ መድ፥ ም ቦላ ካቅስ። ሾሻን ዱከትዳ አሳ ኡባይ ናሰ ብራታ ሾሻ በእድ ፓፅዶሶና።

ሆራ ዙማፐ ሞአበ ጋካናዉ

¹⁰ እስራኤለ አሳይ ሆራፐ ደንድድ ኦቦታ ጌተትያ በሳን ዱንካንዶሶና።

¹¹ ኦቦታፐ ደንድድ፥ ሞአበፐ ስን ባጋን ደእያ መላ ቢታን፥ ዶሎሀ ባጋን አባሪማን ዱንካንዶሶና።

¹² ያፐ ደንድድ፥ ዛሬዳ ዛንጋራን ዱንካንዶሶና።

¹³ ያፐ ደንድድ፥ አሞረታ ቢታ ጋፃ ጋካናዉ ደእያ መላ ቢታን አርኖና ሻፋፐ ሄፍንን ዱንካንዶሶና። አርኖና ሻፋይ ሞአበ ቢታስነ አሞረ ቢታስ ግዶን ደእያ ዛዋ።

¹⁴ ሄሳ ግሾ፥ ጎዳ ኦላ ታርክያ ኦድያ ማፃፋን፥ “ሱፋ ሄራን ደእያ ዋሄባ ካታማነ አርኖና ሻፋ ዛንጋራ፥

¹⁵ ኤራ ካታማነ ሞአበ ቢታ ዛዋ ጋካናዉ ደእያ ዛንጋራ” ያገትድ ፃፈትስ።

¹⁶ ኤንቲ ያፐ ደንድድ፥ ጎዳይ ሙሰኮ፥ “አሳ ሺሻ፤ ታ ኤንታዉ ሃ እማና” ያግድ ኦድዳ ቤራ ጌተትያ ሃ ኦላኮ ብዶሶና።

¹⁷ ሄ ዎደ እስራኤለ አሳይ ሀ ማዝሙርያ የፅዶሶና። “ሃ ኦላዉ፥ ፑልታ፤ ህንተካ የፅተ።

¹⁸ ሀላቃት ቦክዳ ሃ ኦላስ፥ ካለይሳት ካዎተ ፃምአንነ ባንታ ፃምአን ቦክዳ ሃ ኦላስ የፅተ” ያግስ። ኤንቲ ሄ መላ ቢታፈ ደንድድ ማታና ጌተትያ በሳ ብዶሶና።

¹⁹ ማታናፐ ናህልኤላ፥ ናሀልኤላፐ ባሞታ ጌተትያ በሳ ብዶሶና።

²⁰ ባሞታፐ ደንድድ፥ ሞአበን ደእያ ዛንጋራ ብዶሶና፤ ሄ ዛንጋራይ ፕስጋ ዙማፐ ጋርሳን ባዙዋ ግናን ደኤስ።

ስሆናነ ኦገ ፆነተ

²¹ ሄሳፈ ጉየ፥ እስራኤለ አሳይ አሞረ ካዋ ስሆነኮ ሀይሳዳ ያግድ ኪታ የድዶሶና።

²² “ሀያና፥ ኑ ነ ቢታራ ካንድ አና መላ ኦርክ፤ ኑኒ ኦገፐ ጋፃ ከዮኮ፤ ነ ጎሻ ዎይኮ ዎይነ ጋደ ግዶ ገሎኮ፤ ኑኒ ሃ ኦላፈ ሃ ኡዮኮ። ኑኒ ነ ቢታራ ካንድ አና ጋካናዉ ሀድርስ ዎይኮ ኡሻች ጎኮ” ያግስ።

²³ ስሆነይ እስራኤለ አሳይ ባ ቢታራ ካንና መላ ድግስ። እ ባ ኦላንቾታ ኡባ ሺሽድ፥ እስራኤለ አሳ ኦላናዉ መላ ቢታ ብስ፤ ያሃፃ ጌተትያ በሳ ብድ እስራኤለ አሳራ ኦለትስ።

²⁴ እስራኤለ አሳይ ኦላን አሞረታፐ ዳሮታ ማሻን ዎድ፥ አርኖና ሻፋፐ ዶምድ፥ አሞነታ ዛዋን ደእያ ያቦቃ ሻፋ ጋካናዉ ኦይክስ። አሞነ አሳ ቢታ ዛዋይ ግምበትድ ደእያ ግሾ፥ ኤንቲ ያ ገልቦኮና።

²⁵ እስራኤለ አሳይ አሞረታ፥ ሀሰቦናነ እያ ዩሹዋን ደእያ ካታማታ ኡባ ፆን ኤክድ ያን ኡትዶሶና።

²⁶ ሀሰቦና ካታማይ አሞረታ ካዋ ስሆነ ኡትያ ካታማ። ስሆነይ ካሰ ሞአበ ቢታ ካዋ ኦልድ፥ አርኖና ሻፋ ጋካናዉ ደእያ ቢታ ኡባ ኤክስ።

²⁷ ሄሳ ግሾ፥ ሌምሶን ሀይሳዳ ያግዶሶና፤ “ሀሰቦናኮ ሃይተ፤ ሀ ካታማይ ዛሪድ ኬፀቶ፤ ስሆነ ካታማይ ካሰ ባ በሳ ስሞ።

²⁸ ታም ሀሰቦናፐ ከይስ፤ ላጮይ ስሆና ካታማን በንትስ፤ ሞአበን ደእያ ኤራ ይስስ፤ አርኖና ቃ በሳታ ምስ።

²⁹ ሞአበ፥ ነና አየ! ካሞሻ አሳይ ይደታ። ህንተ አደ ናይት ባቃታናዳ፥ ህንተ ማጫ ናይት ድኤታናዳ፥ አሞረታ ካዋ ስሆነስ እሚስ።

³⁰ ኑኒ ህንተ ኮቻታ ሀሰቦናፐ ዶምድ፥ ድቦና ጋካናዉ ኩመ ይስዳ። መደባ ማታን ደእያ ኖፋ ጋካናዉ ደእያ ኡባ ታም ይስስ” ያግዶሶና።

³¹ ያትድ፥ እስራኤለ አሳይ አሞረታ ቢታን ደእዶሶና።

³² ቃስ ሙሰይ ዎቸይሳታ ያእዜራ ካታማ የድን፥ እስራኤለ አሳይ ሄ ካታማነ እያ ሄራን ደእያ ጉ ካታማታ ኦይክድ፥ ያን ደእያ አሞረታ ከስድ ጎድዶሶና።

³³ ሄሳፈ ጉየ፥ እስራኤለ አሳይ ስሚድ፥ ባሳነ ኤፍያ ኦግያራ ከይዶሶና። ባሳነ ካዎይ ኦገይ ባ ኦላንቾታራ ኤድራአ ካታማን ኤንታራ ኦለታናዉ ከይስ።

³⁴ ሽን ጎዳይ ሙሰኮ፥ “ሀ ኡራስ ባቦፋ፤ ህዛ፥ ካዋ ኦገ፥ እያ አሳነ እያ ቢታ ኡባ ነ ኩሸን አዳ እማስ። ሀሰቦናን ኡትድ ሃርዳ አሞረታ ካዋ ስሆነ ቦላ ኦይሳዳ ኔኒ እያ ቦላ ኦና” ያግስ።

³⁵ ሄሳ ግሾ፥ እስራኤለ አሳይ ኦገ፥ እያ ናይታነ እያ አሳ ኡባ እሶይ አቶና ዎድ እያ ቢታ ላትዶሶና።