Taybo 19 - ጌሻ ማፃፋ

ጌሾ ሃ

¹ ጎዳይ ሙሰኮነ አሮናኮ፥

² “ጎዳይ ህግያን ኪተትዳ ዎጋይ ሀይሳ፤ ቦርሶይ ባይና፥ እ ጋናን ቃምባር ዎቦና ዞኦ ኡሱ ኤሀና መላ እስራኤለ አሳስ ኦድተ።

³ ካህንያ አላዛራስ እዮ እምተ፤ ጉታፐ እዮ ጋፃ ከስድ ካህንያ ስንን ሹኮ።

⁴ ካህነይ አላዛር እ ሱፈ ጉራ ኤክድ ባ ብራያን ጌሻ ዱንካንያኮ ስሚድ ላፑን ቶሆ ዉርፆ።

⁵ ካህነይ በእሽን ኡስያ ፁገቶ፤ ጋልባይ፥ አሾይ፥ ሱይነ ቶጨይ ፁገቶ።

⁶ ካህነይ ዝጋ ም፥ ህሶጰ ታሸነ ዞኦ ቃጭና ኤክድ ኡስያ ኤፅያ ታማን የጎ።

⁷ ሄሳፈ ጉየ ካህነይ ባ ማኡዋነ ባ አሳተ ሜጨትድ ጉታ ገሎ፤ ሽን ኦማርስ ጋካናዉ ዎጋዳ ቱና ግዳና።

⁸ ሄ ኡስዉ ፁግዳይስ ባ ማኡዋነ ባ አሳተ ሜጨቶ፤ እካ ኦማርስ ጋካናዉ ዎጋዳ ቱና ግዳና።

⁹ “ሄሳፈ ጉየ፥ ሀራ ጌሻ አስ ኡስያ ፁገትዳ ብዱዋ ሺሽድ ጉታፐ ጋፃን ጌሻ በሳን ዎ። እስራኤለ አሳይ ቱናተፈ ጌሽያ ሃን ጎኤታናዉ ሄስ ናገትድ ኡታና፤ ሄስ ናጋራፐ ጌሻናዉ ጎኤስ።

¹⁰ ቃስ ኡሴ ብዱዋ ሺሽዳ ኡራይካ ባ ማኡዋ ሜጮ፤ እ ኦማርስ ጋካናዉ ዎጋዳ ቱና ግዳና። ሀ ዎጋይ እስራኤለ አሳስነ ኤንታ ግዶን ደእያ ሀራ ደረ አሳስ መርና ዎጋ ግዳና።

¹¹ “አሀ ቦችያ ኦንካ ላፑን ጋላስ ዎጋዳ ቱና ግዳና።

¹² ቱናተፈ ጌሽያ ሃን ሄን ጋላስነ ላፑን ጋላስ እ ባና ጌሾ፤ ሄሳፈ ጉየ፥ እ ዎጋዳ ጌሽ ግዳና። ሽን ሄን ጋላስነ ላፑን ጋላስ እ ባና ጌሾና እፅኮ እ ጌሽ ግደና።

¹³ ሀይቅዳ አሳ አሀ ቦችያ ኦንካ ባና ጌሾና እፅኮ እ ጎዳ ዱንካንያ ቱንሴስ፤ ሄ ኡራይ እስራኤለ አሳ ግዶፈ ኩረቶ። ቱናተፈ ጌሽያ ሃይ እያ ቦላ ዉርፀትቦና ግሾ እ ቱና፤ እ ቱና ግድድ ጋምኤስ።

¹⁴ “እስ አስ ዱንካንያ ግዶን ሀይቅኮ ኦና ዎጋይ ሀይሳ፤ ዱንካንያ ግዶ ገልያ ኦንካ፥ ቃስ ዱንካንያ ግዶን ደእያ ኦንካ ላፑን ጋላስ ጋካናዉ ቱና ግዳና።

¹⁵ ሄሳዳካ፥ ካመቶና ዶያ ደእያ ሚሸ ኡባይ ቱና ግዳና።

¹⁶ ቃስ ደንባን ሀይቅዳ አሳ አሀ ዎይኮ ሀርገትድ ሀይቅዳ አሳ አሀ ዎይኮ መቀ ዎይኮ ዱፎ ቦችያ ኦንካ ላፑን ጋላስ ጋካናዉ ቱና ግዳና።

¹⁷ “ቱናተፈ ጌሻናዉ ፁገትዳ ኡሴ ብዱዋፐ ጉራ ኤካዳ ኦቶን የጋዳ ፑልቶ ሃ እያ ቦላ ትጋ።

¹⁸ ጌሻ አስ ህሶጰ ውርጮ ኤክድ ሃን ናቅ ከስድ፥ ዱንካንያ፥ እያ ግዶን ደእያ ሚሽያነ አሳ ኡባ ቦላ ዉርፆ። ቃስ ሀይቅዳ አሳ አሀ ዎይኮ መቀ ዎይኮ ዱፎ ዎይኮ ሀርገት ሀይቅዳ አስ ቦችዳ አሳ ቦላ ዉርፆ።

¹⁹ ጌይዳ አስ ሄን ጋላስነ ላፑን ጋላስ ጌይቦና ኡራ ቦላ ዉርፆ። እ ላፑን ጋላስ ሄ ኡራ ቱናተፈ ጌሾ፤ ሄ ጌይዳ አደይ፥ ባ ማኡዋነ ባ አሳተ ሜጨቶ፤ ሄ ጋላስ ኦማርስ እ ጌሽ ግዳና።

²⁰ “ሽን ቱና ኡራይ ባና ጌሾና እፅኮ፥ ሄ ኡራይ ጌሻ ዱንካንያ ቱንስዳ ግሾ፥ እስራኤለ አሳ ግዶፈ ኩረቶ፤ ቱናተፈ ጌሽያ ሃይ እያ ቦላ ዉርፀትቦና ግሾ እ ቱና።

²¹ ሀይስ ህንተዉ መርና ዎጋ ግዳና። ቱናተፈ ጌሽያ ሃ ዉርፅያ ኡራይ ባ ማኡዋ ሜጮ፤ ቃስ ቱናተፈ ጌሽያ ሃ ቦችያ ኦንካ ኦማርስ ጋካናዉ ቱና ግዳና።

²² ቱና ኡራይ ቦችያ አይብባይካ ቱኔስ፤ ቃስ ሄ ሚሽያ ቦችያ ኦንካ ኦማርስ ጋካናዉ ቱና ግዴስ” ያግስ።