Taybo 16 - ጌሻ ማፃፋ

ቆረ፥ ዳታነነ አቤሮ

¹ ሌወ ኮቻፈ ቃሃታ ኮቸ ግድዳ ይስአራ ናአይ ቆረይ፥ ሮቤላ ኮቻፈ ኤልኣባ ናይት ዳታነይነ አቤሮይ ቃስ ፋለታ ናአይ ኦን፥

² ሙሰ ቦላ ደንድዶሶና። ኤንታራ ናምኡ ፄታነ እሻታሙ አሳት ደኦሶና፤ ሄ አሳት አሳን ኤረትዳይሳታነ ማባራ ካለይሳታ።

³ ኤንቲ ሙሰነ አሮና ስን ሺቅድ፥ “ህንተ ዳርስደታ፤ ማባራ ኡባይ ጌሽ፤ ጎዳይ ኤንታራ ደኤስ። ያትን፥ ጎዳ ማባራ ቦላ ህንተና አይስ ቁ ቁ ኦቲ?” ያግዶሶና።

⁴ ሙሰይ ሄሳ ስእዳ ዎደ ጎዳ ስንን ጉፋንስ።

⁵ ቆረኮነ እያ ጩጋኮ፥ “ጎዳይ ዎንቶ ዎንታ ኦን እያ ባገኮነ ኦን ጌሸኮ በሳና፤ ሄ እ ዶርዳ ኡራ ባኮ ሺሻና፤ ሄ ኡራይ እያኮ ሺቃና።

⁶ ዎንቶ ዎንታ ኔራነ ነ አሳራ ሀይሳ ኦተ፤ እፃነ ጩይስያ ሚሸ ኤክድ፥

⁷ ቦንቆ ታማ እያን ዎድ፥ ጎዳ ስንን እፃነ ጩይስተ። ጎዳይ ዶርያ ኡራይ እ ጌሽ ግዳና። ህንተ፥ ሌወት ዛዋፐ አደታ።”

⁸ ቃስካ ሙሰይ ቆረኮ፥ “ህንተ ሌወት ስእተ።

⁹ እስራኤለ ፆሳይ ህንተና ባ ማባራ ግዶፈ ዱማይድ፥ ጌሻ ዱንካንያን ኦና መላነ ባ አሳ ስንን ኤቅድ ሀጋዛና መላ ባኮ ሺሽዳይስ ህንተዉ ጉፅዴ?

¹⁰ እ ህንተናነ ህንተ እሻታ ሌወታ ኡባ ባኮ ሺሽስ፤ ሽን ሀእ ህንተ ካህነታ በሳ ኮዬታ።

¹¹ ኔንነ ነ ጩጋ ኡባይ ጎዳ ቦላ ማካልድ ደንድደታ፤ ህንተ እያ ቦላ ዙዙማናዉ እ አሮን ኦኔ?” ያግስ።

¹² “ያትድ፥ ሙሰይ፥ ኤልኣባ ናይታ፥ ዳታነነ አቤሮ ፄግስስ፤ ሽን ኤንቲ፥ ‘ኑኒ ቦኮ’ ያግዶሶና።

¹³ ኔኒ መላ ቢታን ኑና ዎናዉ ማነ ኤስ ጎግያ ቢታፈ ኑና ከስዳይስ ጉፅስ ጋዳ ሀእ ኑ ቦላ ሀላቃ ግዳናዉ ኮያይ?

¹⁴ ኔኒ ኑና ማነ ኤስ ጎግያ ቢታ ገልሳባካ፤ ዎይኮ ኔኒ ኑስ ላታ ኦዳ ጎሻ ጋደነ ዎይነ ጋደ እማባካ፤ ኔኒ ኑና ጭማሳ፤ ኑኒ ቦኮ” ያግዶሶና።

¹⁵ ያትን፥ ሙሰይ ዳሮ ሀንቀትድ፥ ጎዳኮ፥ “ኔኒ ኤንታ ያርሹዋ ኤኮፋ፤ ታ ኤንታፈ እሱዋካ ቆሀብከ፤ ቃስ ሀር አቶሽን እስ ሀረካ ኤንታፈ ኤካብከ” ያግስ።

¹⁶ ቃስ ሙሰይ ቆረኮ፥ “ዎንቶ ኔራነ ነ አሳራ ሄሳዳ አሮንካ ጎዳ ስን ሺቅተ።

¹⁷ እስ እስ አስ ባ እፃነ ጩይስያ ሚሽያ ኤኮ፤ እፃነካ እያን ዎ፤ ኡባይ እስፈ ናምኡ ፄታነ እሻታሙ እፃነ ጩይስያ ሚሸ ግዴስ፤ እፃነ እያን ዎድ ጎዳ ስን ሺሾ። ኔኒነ አሮን ህንተ እፃንያ ሄሳዳ ሺሽተ” ያግስ።

¹⁸ ያትን፥ እስ እስ አስ ባ ሚሸን እፃነነ ታማ ቦንቆ ዎድ ጌሻ ዱንካንያ ፐንገን ሙሰራነ አሮናራ እስፈ ኤቅዶሶና።

¹⁹ ቆረይ ባ አሳራ ጌሻ ዱንካንያ ፐንገን ሙሰ ስንንነ አሮና ስንን ኤቅዶሶና። ሄ ዎደ ጎዳ ቦንቾይ ኩመ ማባራስ ቆንጭስ።

²⁰ ጎዳይ ሙሰኮነ አሮናኮ፥

²¹ “ታኒ እስ ቶሆ ሀ አሳ ይሳና ግሾ፥ ኤንታፈ ሻከትተ” ያግስ።

²² ሽን ሙሰይነ አሮን ሳአን ጉፋንድ፥ “አቤት ፆሳዉ፥ አሳ ሸምፖ ኡባ መዳ ፆሳዉ፥ እስ አስ ናጋራ ኦኮ፥ ኔኒ ኩመ ማባራ ሀንቀታዬ?” ያግዶሶና።

²³ ያትን፥ ጎዳይ ሙሰኮ፥

²⁴ “አሳስ ‘ቆረ፥ ዳታነነ አቤሮ ዱንካንያ ማታፐ ክችተ’ ጋዳ ኦዳ” ያግስ።

²⁵ ሙሰይ ደንድድ፥ ዳታነኮነ አቤሮኮ ብን፥ እስራኤለ ጭማት እያ ካልዶሶና።

²⁶ እ ማባራኮ፥ “ሀ ኢታ አሳ ዱንካንያ ማታፐ ክችተ፤ ኤንታባ አይብባካ ቦቾፍተ። አካይ፥ ጊኮ፥ ኤንታ ናጋራ ጋሶን ህንተካ ፕተትድ ያና” ያግድ ምንድ ኦድስ።

²⁷ ያትን አሳይ ቆረ፥ ዳታነነ አቤሮ ዱንካንያ ማታፐ ክችዶሶና። ዳታነይነ አቤሮይ ካረ ከይድ፥ ባንታ ማቸታራነ ባንታ ናይታራ ባንታ ዱንካነታ ፐንገን ኤቅዶሶና።

²⁸ ሙሰይ አሳኮ፥ “ታኒ ሀ ኦሶ ኡባ ኦና መላ፥ ጎዳይ ታና ኪትዳይሳነ ታኒ ታ ሸነን ኦናይሳ ህንተ ኤራናይ ሀይሳና።

²⁹ ሀ አሳት አስ ሀይቀይሳዳ ሀይቅኮ ዎይኮ አሳ ቦላ ጋክያባ ፃላል ኤንታ ቦላ ጋክኮ ጎዳይ ታና ኪትቤና።

³⁰ ሽን፥ ጎዳይ ኦራባ ኦድ፥ ቢታይ ዶየትድ ኤንታነ ኤንታዉ ደእያባ ኡባ ምትኮነ ኤንቲ ፓፃ ደእሸ ዱፎ ገልኮ ሄ ዎደ ሀ አሳት ጎዳ ካዳይሳ ህንተ ኤራና” ያግስ።

³¹ እ ያግድ ኦንግዳ ዎደ ኤንቲ ኤቅዳ ቢታይ ዶየትድ፥

³² ኤንታነ ኤንታ ሶ አሳ፥ ቆረ ጩጋ ኡባነ ኤንታዉ ደእያባ ኡባ ምትስ።

³³ ያትን ኤንቲ ባንታዉ ደእያባ ኡባራ ፓፃ ደእሸ፥ ዱፎ ገልዶሶና። ቢታይ ኤንታ ቦላ ጎርደትስ፤ ኤንቲ ማባራ ግዶፈ ይዶሶና።

³⁴ ኤንታ ዋሱዋ ጋሶን ኤንታ ማታን ደእያ እስራኤለ አሳ ኡባይ፥ “ቢታይ ኑናካ ምታና ሀኔስ” ያግድ ባቃትዶሶና።

³⁵ ቃስ ታም ጎዳ ማታፐ ይድ እፃነ ጩይስያ ናምኡ ፄታነ እሻታሙ አሳ ምስ።

³⁶ ሄሳፈ ጉየ ጎዳይ ሙሰኮ፥

³⁷ “ካህነይ፥ አሮና ናኣ አላዛር ናሰ ብራታፐ ኦሰትዳ እፃነ ጩይስያ ሚሸታ ፁገትዳ አሳፐ ኤክድ፥ ሄ ሚሸት ጌሽ ግድያ ግሾ፥ ቦንቆ ታማ ሀራ ሶ ኤፍድ ላላና መላ ኦዳ።

³⁸ ሄ ሚሸት ባንታ ደኡዋ ይሳናዉ ናጋራ ኦዳ አሳይ እፃነ ጩይስያ ሚሸ። ሄ ሚሸት ጎዳስ እመትዳ ግሾነ ጌሽ ግድያ ግሾ ሌእሳ ቆፃዳ ያርሾ በሳ ላንፃ። ሄስ እስራኤለ አሳስ ናግሶ ማላ ግዶ” ያግስ።

³⁹ ያትን ካህነይ አላዛር እፃነ ጩይስያ ሚሸታ ኤክድ ያርሾ በሳ ላንፃናዉ ሌእስድ ቆፅስ።

⁴⁰ ጎዳይ ሙሰ ባጋራ ኪትዳይሳዳ፥ አሮና ኮቸ ግዶና ኦንካ ጎዳ ስንን እፃነ ጩይሳናዉ ሺቆና መላ፥ እፃስ ጊኮ፥ ቆረ ቦላነ እያ ካለይሳታ ቦላ ጋክዳይስ እያ ጋኮና መላ እስራኤለ አሳ አኬክሳናዉ ሀይሳታ ኦስ።

⁴¹ ዎንተ ጋላስ እስራኤለ ማባራ ኡባይ፥ “ጎዳ አሳ ህንተ ዎደታ” ያግድ ሙሰ ቦላነ አሮና ቦላ ዙዙምዶሶና።

⁴² ኤንቲ ሙሰነ አሮና ቦላ ደንዳናዉ ሺቅድ፥ ኤንቲ ጌሻ ዱንካንያ ፄልያ ዎደ ሻራይ ጌሻ ዱንካንያ ካምን፥ ጎዳ ቦንቾይ ቆንጭስ።

⁴³ ሄሳፈ ጉየ፥ ሙሰይነ አሮን ጌሻ ዱንካንያ ስን ይድ ኤቅዶሶና።

⁴⁴ ያትን ጎዳይ ሙሰኮ፥

⁴⁵ “ሀ አሳ ግዶፈ ክችተ፤ ታ ኤንታ እስ ቶሆን ይሳና” ያግስ። ሙሰይነ አሮን ሳአን ጉፋንዶሶና።

⁴⁶ ሙሰይ አሮናኮ፥ “እፃነ ጩይስያ ነ ሚሽያ ኤካዳ ያርሾ በሳፈ ቦንቆ ታማ ኤካዳ እያን ዎ፤ እያ ቦላ እፃነ ጉጃዳ እስራኤለ ማባራኮ ኤፋ። ጎዳ ሀንቆይ እያ ማታፐ ከይ ክችስ፤ ቦሻይካ ዶምስ” ያግስ።

⁴⁷ ያትን አሮን፥ ሙሰይ ኪትዳይሳዳ ባ እፃነ ጩይስያ ሚሽያ ኤክድ ማባራ ግዶ ዎፅድ ገልስ። ቦሻይ አሳ ዎ ኦይክስ ሽን፥ አሮን እፃነ ጩይስድ አሳስ አቶተ ኤህስ።

⁴⁸ ያትድ፥ እ ሀይቅዳይሳታነ ፓፃታ ግዶን ኤቅን፥ ቦሻይ አግስ።

⁴⁹ ቆረ ጋሶን ሀይቅዳ አሳይ አትሽን፥ ሄ ቦሻን ሀይቅዳ አሳ ታይቦይ 14,700.

⁵⁰ ቦሻይ ኤቅዳፐ ጉየ፥ አሮን ጌሻ ዱንካንያ ፐንገን ደእያ ሙሰኮ ስምስ።