Taybo 12 - ጌሻ ማፃፋ

አሮንነ ማይራማ ሙሰራ ኤቀትዶሶና

¹ ሙሰይ ቶጰ ቢታ ማጫስ ኤክዳ ግሾ፥ ማይራማነ አሮን ሙሰ ያግድ ቦርዶሶና።

² “ጎዳይ ሙሰ ባጋራ ፃላላ ኦደትዴ? እ ኑ ባጋራ ኦድቤኔ?” ያግዶሶና። ጎዳይ ኤንቲ ግዳይሳ ስእስ።

³ ሙሰይ ቢታን ደእያ አሳ ኡባፈ አያ አዳ አስ።

⁴ ቆፖና ጎዳይ ሙሰ፥ አሮናነ ማይራሞ፥ “ህንተ ሄት ጌሻ ዱንካንያኮ ከይተ” ያግስ። ኤንትካ ከይዶሶና።

⁵ ጎዳይ ሻራ ቱሳራ ዎድ ጌሻ ዱንካንያ ፐንገን ኤቅድ፥ አሮና! ማይራመ! ያግድ ፄግስ። ኤንቲ ናምአይ እያ ስን ሺቅን፥

⁶ ጎዳይ፥ “ታ ኦደይሳ ስእተ፤ ህንተ ግዶን ናበይ ደእኮ፥ ታ እያዉ ቆንጫይስ፤ ቃስ እያዉ አሙሆን ኦዳይስ።

⁷ ሽን ታ አይለይ ሙሰ ሄሳዳ ግደና፤ እ ታ ኬ ኡባን አማነትዳይሳ።

⁸ ታኒ ሙሰራ ሶምኦን ኦደታስፐ አትሽን፥ ሌምሶን ኦድከ። እ ታ ማላ በኤስ። ያትን፥ ህንተ ታ አይልያ ሙሰ ቦራናዉ አይስ ያይበከቲ?” ያግስ።

⁹ ጎዳ ሀንቆይ ኤንታ ቦላ ኤፅን፥ እ ኤንታ አግድ ብስ።

¹⁰ ሻራይ ጌሻ ዱንካንያ ቦላፈ ደንድዳ ዎደ ማይራማ ባሮ ሀርገን ምልፅ ጋዳ ቦፃሱ። አሮን ኢኮ ስሚድ ፄልያ ዎደ ባሮ ሀርገን ኦይከትዳሮ በእስ።

¹¹ አሮን ሙሰኮ፥ “ሀይ ታ ጎዳዉ፥ ኑኒ ኤያተን ኦዳ ናጋራስ ኑና ሀይሳዳ ሴሮፓ።

¹² እዮ ባ አየ ኡሎፐ ከይያ ዎደ እ አሳተፈ ባጋይ ሜተትን፥ ሀይቅድ የለትዳ ናአ መላ ኦፋ” ያግስ።

¹³ ያትን፥ ሙሰይ፥ “አቤት ጎዳዉ፥ እዮ ፓርክ” ያግድ ጎዳ ዎስስ።

¹⁴ ጎዳይ ሙሰኮ፥ “እ አዋይ እ ሶምኦን ጩትያባ ግድያኮ፥ እያ ላፑን ጋላስ ዬላራ ጋምአዉሱ ግድኬ? ሄሳ ግሾ፥ ላፑን ጋላስ ዱንካንያ ጉታፐ እዮ ጋፃ ከሳዳ ዱማ በሳን ዎ፤ ሄሳፈ ጉየ ስማዳ ዮ” ያግስ።

¹⁵ ያትን፥ ማይራማ ዱንካንያ ጉታፐ ጋፃ ከያዳ ላፑን ጋላስ ኡታሱ። እያ ስማና ጋካናዉ አሳይ ጉታ አግድ ባናዉ ደንድቤና።

¹⁶ ሄሳፈ ጉየ፥ አሳይ ሀፀሮታ ጌተትያ በሳፈ ደንድድ፥ ፓራና መላ ቢታን ዱንካንዶሶና።