Taybo 11 - ጌሻ ማፃፋ

ጎዳፐ ይዳ ታማ

¹ እስራኤለ አሳይ ባንታና ጋክዳ መቱዋን ጎዳ ቦላ ዙዙምዶሶና። ኤንታ ዙዙን ጎዳይ ስእዳ ዎደ እያ ሀንቆይ ኤፅን፥ ፁግያ ታማ ኤንታ ቦላ የድስ፤ ሄ ታማይ ኤንቲ ዱንካንዳ ጉታፐ እስ ባጋ ጋፃ ምስ።

² ያትን ሙሰይ ኤንታ ግሾ ጎዳ ዎሳና መላ ኤንቲ ሙሰኮ ይድ ዬክዶሶና። ሙሰይ ዎስን ታማይ ቶእስ።

³ ጎዳ ታማይ ኤንታ ግዶን ኤፅዳ ግሾ፥ ሄ በሳይ ታቤራ ጌተትድ ፄገትስ።

⁴ እስራኤለታራ ግብፀፈ ከይዳ ዱማ ዱማ ደረይ ሀራ ካ ማናዉ ዳሮ አሞትዶሶና። ኤንቲ፥ “ኑ አሾ አዉፐ ደማኔ?

⁵ ኑኒ ግብፀን ደእያ ዎደ ሚሸ ቃንፆና ምያ ሞሉዋ፥ ሌህያ፥ ሀባበ፥ ሹንኩርተ፥ ምስካት ባይና ሹንኩርተነ ቱሙዋ ሀሳዮስ።

⁶ ሽን ሀእ ኑ ቆይ ጎርደትስ፤ ኑ አይፈይካ ሀ ማናፈ አትሽን፥ ሀራባ አይባካ በኤና” ያግድ ዬክዶሶና።

⁷ ማናይ ዴቦ አይፈ ዳኔስ፤ እያ ማላይ ቦ አድልኤ ጪሸ ዳኔስ።

⁸ ማናይ ቃማ ዎስ፤ አሳይ ዩይድ እያ ማፅድ ዎፃን ጋጭድ ዎይኮ ኡዱላን ጫድድ ካሶና። ያትድ ኡኮሶና፤ እያ ማልኦይ ሻማሆ ዛይተራ ኡከትዳ ኡይ መላ።

⁹ ማን ቃማ ኤንታ ጉታን አካራ ዎስ።

¹⁰ አሳይ ባንታ ዱንካንያ ፐንገን ፐንገን ኤቅድ ዬክሽን ሙሰይ ስእስ። ኤንቲ ጎዳ ሀንቁዋ ደንዳ ግሾ፥ ሙሰይ ኡንኤትስ።

¹¹ ሙሰይ ጎዳኮ፥ “ነ አይልያ፥ ታ ቦላ አይስ ሀ መቱዋ ኤሀዲ? ነ ታናን አይስ ኡፋይታብኪ? ነ ሀ አሳ ኡባ ቶሁዋ ታ ቦላ አይስ ዎዲ?

¹² ሀ አሳ ኡባ ታ ቃንታድናዬ? ዎይኮ ኤንታ ታ የላድናዬ? ነ ኤንታ ማይዛታስ፥ እማና ጋዳ ጫቅዳ ቢታ ጋ ጋዳ ናአ እድማዳ ድችያ አሴዳ ታ ክኦን አይስ ኤንታ የጋዲ?

¹³ ሀ አሳ ኡባስ ታ አሾ አዉፐ ኤሀኔ? ኤንቲ ታኮ ይድ፥ ‘ማናዉ ኑስ አሾ እማ’ ያግድ ዬኮሶና።

¹⁴ ታኒ ሀ አሳ ኡባ ታርካ ቶካናዉ ዳንዳእከ፤ ታዉ ሄስ ዴፆ ቶሆ።

¹⁵ ህዛ ኔኒ ታና ሀይሳዳ ኦናፐ ታዉ ቃታ፤ ሀእ ታና ዎ፤ ሀ መቱዋፐ ታ ሸምፓ አጋና” ያግስ።

ላፑን ታሙ አሳ ዶረተ

¹⁶ ጎዳይ ሙሰኮ፥ “አሳ ካለናዉ ዳንዳእያ እስራኤለ ሀላቃታፐ ላፑን ታሙ ጭማታ ዶራ። ኤንታ ጌሻ ዱንካንያኮ ኤሀዳ ነ ማታን ኤሳ።

¹⁷ ታኒ ዎዳ ኔራ ያን ኦደታና፤ ታ ነዉ እምዳ አያናፐ ሻካዳ ኤንታ ቦላ ዎና። ኔኒ አሳ ቶሁዋ ነርካ ቶኮና መላ ኤንቲ ነና ማዳና።

¹⁸ “ኔኒ አሳኮ ሀይሳዳ ያጋ፤ ‘ዎንቶ ህንተ አሾ ማና ግሾ ህንተና ጌሽተ። ኑ አሾ አዉፐ ደማኔ? ኑስ ግብፀን ሳእ ሎኦሽን’ ያግድ ህንተ ዬክዳ ዬሁዋ ጎዳይ ስእስ። ሀእ ጎዳይ አሾ እማና፤ ህንተካ ማና።

¹⁹ ህንተ ማናይ እስ ጋላስ ዎይኮ ናምኡ ጋላስ ዎይኮ እቻሹ ጋላስ ዎይኮ ታሙ ጋላስ ዎይኮ ላታሙ ጋላስ ፃላላ ግደና።

²⁰ ሽን ‘ህንተ ግዶን ደእያ ጎዳ ህንተ ካዳ ግሾነ ግብፀፈ ከዮና አትዳኮ ኑስ ሎኦሽን ግዳ ግሾ፥ ህንተዉ ሲራ ከያና ጋካናዉነ ህንተ ሳለታና ጋካናዉ እስ አጌና ኩመ ህንተ አሾ ማና’ ያጋ” ያግስ።

²¹ ሽን ሙሰይ ጎዳኮ፥ “ሄኮ፥ ታ 600,000 አሳ ካለሸ ደአይስ። ኔኒ እስ አጌና ኩመ ኤንቲ አሾ ማና መላ እማና ጋሳ።

²² ሚዛ ዉደነ ዶርሳ ዉደ ኡባ ሹክን ኤንታዉ ግዳኔ? አባን ደእያ ሞሎ ኡባ ሺሽያኮ ኤንታዉ ግዳኔ?” ያግስ።

²³ ያትን፥ ጎዳይ ሙሰኮ፥ “ጎዳ ኩሸይ ቃንዬ? ታኒ ነዉ ኦድያባይ ቱሜኮነ ዎርዶኮ ኔኒ ሀእ በአና” ያግስ።

²⁴ ሄሳ ግሾ ሙሰይ ካረ ከይድ፥ ጎዳይ ግዳይሳ አሳስ ኦድስ። እስራኤለ ጭማታፐ ላፑን ታሙ አሳ ሺሽድ፥ ጌሻ ዱንካንያ ዩሾን ኤስስ።

²⁵ ያትን፥ ጎዳይ ሻራራ ዎድ እያራ ኦደትስ፤ እያ ቦላ ደእያ አያናፐ ኤክድ፥ ሄ ላፑን ታሙ ጭማታ ቦላ ዎስ። አያናይ ኤንታ ቦላ ሸምፕዳ ዎደ ኤንቲ ናበዳ ትንብተ ኦድዶሶና። ሽን ሄሳፈ ጉየ ዛሪድ ትንብተ ኦድቦኮና።

²⁶ ሄ ላፑን ታሙ ጭማታራ ፃፈትዳ አሳታፐ ኤልዳዳነ ሞዳዳ ጌተትያ ናምአት ዱንካንዳ ጉታን አትድ ጌሻ ዱንካንያኮ ይቦኮና። ሽን ኤንታ ቦላካ አያናይ ዎን፥ ዱንካንዳ ጉታን ትንብተ ኦድዶሶና።

²⁷ እስ ፓን አደይ ሙሰኮ ዎፅ ይድ፥ “ኤልዳድነ ሞዳድ ዱንካንዳ ጉታን ትንብተ ኦዶሶና” ያግስ።

²⁸ ያንን፥ ባ ናአተፈ ዶምድ፥ ሙሰ ማድያ ናወ ናኣ እያሱይ ሙሰኮ፥ “ታ ጎዳዉ፥ ሙሰ፥ ኤንታ ተቃ” ያግስ።

²⁹ ሽን ሙሰይ ዛሪድ፥ “ታ ግሾ ነ ቃናታይ? ጎዳይ ባ አሳ ኡባ ቦላ ባ አያና ዎድ ናበዳ ትንብተ ኦድስያባ ግድያኮ ታ ኡፋይታይስ” ያግስ።

³⁰ ያትድ፥ ሙሰይነ እስራኤለ ጭማት ዱንካንዳ ጉታ ስምዶሶና።

³¹ ቆፖና ጎዳይ ጫርኮ ደንድ፥ ሳአፐ ናምኡ ዋ መላ ቁ ግድ ፕራያ ኩራቾታ አባፈ ኤህስ። ኤንታ ዱንካንያ ዩሹዋን ኡባ ባጋራ እስ ጋላሳ ኦገ መላ ሳአን ዎዶሶና።

³² ሄ ጋላስነ ሄ ቃማ ኡባ፥ ቃስ ዎንተ ጋላስካ አሳይ ካረ ከይድ፥ ሄ ኩራቾታ ኦይክድ ሺሽዶሶና። ኤንታፈ ኦንካ 10 ክሎ ግራመፐ ጉ ሺሽበና። ኤንቲ ዱንካንያ ጉታ ዩሾን መልሳናዉ ምጭዶሶና።

³³ ሽን አሾይ ቡሮ ኤንታ ዶናን ደእሽንነ ሜተትድ ዉሮና ደእሽን፥ ጎዳ ሀንቆይ አሳ ቦላ ኤፅስ፤ ጎዳይ አሳ ዎልቃማ ቦሻን ሾጭስ።

³⁴ አሾ አሞትድ ሀይቅዳ አሳ ኤንቲ ሄ በሳን ሞግዳ ግሾ ሄ በሳይ ከብሮት-ሀታባ ጌተትድ ሱንትስ።

³⁵ አሳይ ሄ በሳፈ ደንድ ብድ ሀፀሮታ ጌተትያ በሳን ዱንካንዶሶና።