Solomone 8 - ጌሻ ማፃፋ

¹ ነ ታዉ ታ አየ ን ምዳ ታ እሻ ግድዳኮ አይበ! ታ ነና ኦገን ደማዳ ዬርዳኮ፥ ታና ኦንካ ቦረናሽን።

² ታኒ ነና ካለዳ፥ ታና ታማርስዳ ታ አየ ሶ ገልሳርክናሽን። ማልእያ ኦሮማነ ጉምኤነ ሎእያ ዎይነ ኡሻ ታ ነና ያን ኡሻርክና።

³ ታና ነ ሀድርሳ ኩሸይ ቦርኮትሴስ፥ ነ ኡሻቻ ኩሸይ ታና ቆመስ።

⁴ ህንተኖ፥ የሩሳላመ ጌላኦቶ፥ ታ ሲቆይ ባ ዎደ ደንዳና ጋካናዉ፥ ኮይሮትድ ህንተ እያ ደንናዳ ሀዳራ ጋይስ።

የሩሳላመ ጌላኦታ

⁵ ባ ሲቁዋ ሀሸን ዘምፓዳ፥ መላ ቢታፈ ያራ ሀና ኦኔ? በን ነ አይያ ነና እቀታዳ የልዳ፥ አፕለ ም ጋርሳን ነ ዝንእዳሽን፥ ነና ታ ባርክሳስ።

ጌላእዉ

⁶ መርና ሲቁዋን ታና ነ ዎዛናን አታማ፤ ነ ቀስያን ማታመዳ ታ ፃላላ ኦይካ። ሲቆይ ሀይቆ መላ ምኖ፤ ቃናተይ ስኦለ መላ ኢታ፤ እያ ላጮይ ፆሳ ታማ ላጮ መላ።

⁷ ዳሮ ሃ ሲቆ ታማ ቶይሳናዉ ዳንዳኤና፤ ድኦይካ ሜጭድ ኤፋናዉ ዳንዳኤና። አስ ሲቆ ሻማናዉ ባዉ ደእያ ኡባ እምኮካ፥ ሲቆይ ሚሸን ሻመቶና ግሾ፥ አስ እያ ካስ።

ጌላኤ እሻታ

⁸ ን ትራን ኡትቦና ምቻ ኑስ ደአዉሱ፤ አዝን እዮ ኦይችኮ፥ ኑ እዉ አይ ኦኔ?

⁹ እያ ግምበ ድርስ ግድያኮ፥ ኑኒ እ ቦላ አዱሳ ብራ ግምበ ግምባና፤ እያ ድርሳ ፐንገ ግድያኮ ዝጋ እብ መና።

ጌላእዉ

¹⁰ ታኒ ድርሳ ግምበ፤ ታ ንይ ግምበ ቦላ ደእያ ሻኮ መላ፤ ታኒ ታ ሲቁዋራ ደእያ ዎደ እ ታናን ኡፋይቴስ።

¹¹ ሶሎሞነስ ባኣል-ሀሞናን ዎይነ ጋደይ ደኤስ፤ ሄ ዎይነ ጋድያ ኡነ ኦይሳታስ እሚስ። ከራ ኤክዳይሳት አይፍያ ግሾ፥ እሶይ እሶይ ሙኩሉ ብራ እያዉ ኤሆሶና።

¹² ሽን ታዉ ታ ቡዞ ዎይነ ጋደይ ደኤስ፤ ሶሎሞነ፥ ኔኒ ሙኩሉ ብራ ኤካ፤ ኡነ ኤክድ ኦይሳት ናምኡ ፄቱ ብራ ኤኮ።

ፓን

¹³ ነኖ፥ አታክልትያ ግዶን ደእያ ታ ሲቀ፥ ነ ላገት ነ ቃላ ስአናዉ ኮዮሶና፤ ነ ቃላ ታናካ ስሳ።

ጌላእዉ

¹⁴ ታ ሲቁዋዉ፥ ታኮ ኤለ ያ! ሽቶ ማታይ ዶልያ ደረታ ቦላራ፥ ጉፕያ ገንኤ ዎይኮ ዎሽኤ ማራዳ ሀና።