Solomone 6 - ጌሻ ማፃፋ

የሩሳላመ ጌላኦታ

¹ ማጫሳ ኡባፈ ሎእያረ፥ ነ ላገይ አዉ ብዴ? ኑ ኔራ ኮያና መላ እ ብዳ ግና ኑስ ኦዳ።

ጌላእዉ

² ታ ሲቆይ ዶርሳ ዉደ ሄማናዉ፥ ሎኦ ጪሻ ሺሻናዉ፥ ሽቶ ማታይ ደእያ አታክልትያ ግዶ ብስ።

³ ታኒ ታ ሲቁዋባ፤ ታ ሲቆይ ታባ፤ እ ሱፈ ጪሻ ግዶን ዉደ ሄሜስ።

ፓን

⁴ ታ ሲቀ፥ ነ ትርሳ ካታሜዳ ሎኣሳ፤ የሩሳላመዳ ዳሮ ሎኣሳ። ባንድራ ኦይክድ ሳልፕያ፥ ኦላንቾዳ ያሻሳ።

⁵ ኤንቲ ታና ኡንኤዳ ግሾ፥ ሀያና ነ አይፍያ ታፐ ደን። ነ ብናናይ ጋላዳ ዙማፐ ዎያ፥ ዴሻ ዉደ ዳኔስ።

⁶ ነ አቻይ ሜጨትድ ከይያ፥ ኡባይ መንተ የልያ፥ ኤንታ ግዶን አዉጫየይ ባይና ዶርሳ ዉደ መላ።

⁷ ነ ናምኡ ሻካላይ ጉሉን ግዶራ ፄልያ ዎደ፥ ናምኡ ከስድ ጳልቅዳ ኦሮማነ ዳኖሶና።

⁸ ኡሱፑን ታሙ ማጫ ካዎት፥ ሆስፑን ታሙ ላገት፥ ታይቦይ ባይና ጌላኦት ደኦሶና።

⁹ ሽን ቦረይ ባይና ታ ሆልያ ታዉ ዱማ፤ እያ ባ አየስ እስኖ። እዮ የልዳ አይያ ኡባፈ አዳ እዮ ዶሳዉሱ፤ ጌላኦት እዮ በእድ፥ “ሀና አንጀትዳሮ” ያጎሶና፤ ማጫ ካዎትነ ላገት እዮ ሳቦሶና።

የሩሳላመ ጌላኦታ

¹⁰ ሀና ዎንታ ፃልቀዳ ዶልያራ፥ አጌናዳ ፖእያራ፥ ፃልቀዳ ጫድያራ፥ ባንድራ ኦይክድ ሳልፐ ከይዳ፥ ኦላንቾዳ ያሽያራ ሀና ኦኔ?

ፓን

¹¹ ታኒ ዛንጋራን ቶከትዳ ምታ በአናዉ፥ ዎይነይ አጭዳኮ ኦሮማነይ አይፍዳኮ ፄላናዉ፥ ዱገ ኦቾሎነ ጋደ ዎስ።

¹² ታ ቆፖና ደእሽን ታ አሞይ ታና ኤፍድ፥ ካዋ አሳ ፓራ ጋረታ ግዶን ታና ኡትስስ።

የሩሳላመ ጌላኦታ

¹³ ነኖ ሱላማፐ ይዳረ፥ ሃያ፤ ሃ ስማ፤ ኑ ነና ሎይድ ፄላና መላ ሃ ስማ። ዳሮ አሳ ስንን የፅያ አሳዳ፥ ታና አይስ ፄሌቲ?