Sofonaasa 2 - ጌሻ ማፃፋ

¹ ህንተኖ፥ ዬል ባይና አሳዉ፥ አነ እስፈ ሺቅተ!

² ጫርኮይ ፑንድ ኤፍያ ባናዳ ሀኖና ደእሽን፥ ያሽያ ጎዳ ሀንቆይ ህንተ ቦላ ዎና ደእሽን፥ ጎዳ ሀንቆ ሱላ ጋላሳይ ህንተ ቦላ ዮና ደእሽን ጎዳኮ ስምተ።

³ ህንተኖ፥ ቢታን ደእያ አሽከቶ፥ እያ ኪታ ናግያ ኡባቶ፥ ጎዳ ኮይተ፤ ፅሎተ ኮይተ፤ አሽከተ ኮይተ። ኦን ኤር ጎዳ ሀንቆ ጋላስ ህንተ አቶና አገከታ።

ፍልስፄመ ቦላ ያና ፕርዳ

⁴ ጋዛ ካታማይ ኦና ግዳና፤ አስቃሎና ካታማይ ባይሳ ግዳና። አሽዶዳ ካታማ አሳይ ሴታ ጋላስ ጎደታና፤ ኤቅሮና ካታማይ ሾደታና።

⁵ ህንተኖ፥ አባ ጋፃን ደእያ ከልታወቶ፥ ህንተና አየ! ነኖ፥ ፍልስፄመት ደእያ ካናነ ቢታዉ፥ ጎዳ ፕርዳይ ነ ቦላ ዬስ። ታኒ ነና ይሳና፤ እስ አስካ አተና።

⁶ አባ ጋፃን ደእያ ህንተ ቢታይ መሄ ሄመትያ በሲ፥ ሄንንቾት ደእያ በስነ መሄ ዳራ ግዳና።

⁷ ይሁዳ አሳፐ አትዳይሳት አባ ጋፃን ደእያ በሳ ላታና፤ ኤንቲ ያን ሄማና። ሳአይ ቃምያ ዎደ ኤንቲ አስቃሎና ካታማን ደእያ ኬታን አቃና። ጎዳይ ኤንታ ፆሳይ ኤንታባ ቆፓና፤ እ ኤንታ ዛሪድ ናንሳና።

ሞአበነ አሞነ ፕርደተ

⁸ ኡባፈ ዎልቃማ ጎዳይ፥ እስራኤለ ፆሳይ፥ “ታኒ ሞአበ ቶሽያነ አሞነ ጫሻ ስአስ። ኤንቲ ታ አሳ ዋትድ ቶችዳኮነ ኤንታ ቢታ ኤካናዉ ዋትድ ማንድዳኮ ታ ኤራይስ።

⁹ ሄሳ ግሾ፥ ታ ደኦ ሱንን ጫቃይስ፤ ሞአበይ ሶዶመዳ ሀናና፤ አሞነይ ጋሞራዳ ሀናና። ኤንቲ መርናዉ ማፅነ ኦላነ አጉን ማእዳ ባዞ ግዳና። ታ አሳፐ አትዳይሳት ኤንታ ሻሉዋ ቦንቃና፤ ኤንታ ቢታ ላታና” ያጌስ።

¹⁰ ኤንቲ ኡባፈ ዎልቃማ ጎዳ አሳ ቶችዳ ግሾነ ጫይዳ ግሾ፥ ኤንታ ቦላ መቶይ ጋካና።

¹¹ ኤንታ ቢታን ደእያ ፆሳታ እ ይስያ ዎደ ጎዳይ ኤንታና ያሽሳና። ሳአን ደእያ ካዎተታን ደእያ አሳ ኡባይ ባ ደእያ በሳን እያ ጎይናና።

¹² ህንተኖ፥ ቶጰ አሳዉ፥ ህንተ ታ ማሻን ሀይቃና።

ሶረ ቦላ ያና ፕርዳ

¹³ እ ባ ኩሽያ ፑደሀ ባጋ የድድ አሶረ ቢታ ይሳና። ቃስ ናናወ ካታማ መላ ባዞዳ ባይሳ በሲ ኦና።

¹⁴ መሄ ዉደይነ ቢታን ደእያ ዶአት ኡባይ ያን ሄመታና፤ ጉቶይነ ቁፃረይ ላለትዳ ግምብያ ግዶን ዳና። ኤንታ ቃላይ ማስኮተራነ ፐንግያራ ስኤታና፤ ዝጋ ቱቀት ካሎታና።

¹⁵ “ታፐ አትሽን፥ ሀር ባዋ” ያግድ ኦቶርትድ ደእዳ ካታማይ ሀእ ዋንድ ዶአት አቅያ በሲ ግድዴ? እያ ማታራ አያ ኡባይ ባንታ ኩሽያ ባቅሸ፥ “ፖራ!” ጋና።