Roome 9 - ጌሻ ማፃፋ

እስራኤለ ዶረተ

¹ ታኒ ክርስቶሳን ቱማ ኦዳይስ፥ ዎርዶትከ። ጌሻ አያናይ ካለያ ታ ካሀይ ታኒ ዎርዶቶናይሳ ታዉ ማርካቴስ።

² ታ ዎዛናን እስራኤለታስ ዳሮ ቃታይስነ ቃማ ጋላስ ቆፓይስ።

³ ታኒ፥ ታ እሻታ ግሾ፥ ክርስቶሳፐ ሻከታዳ ፆሳ ባደፈ ጋርሳን ደእዳኮ ዶሳይስሽን።

⁴ ኤንቲ እስራኤለታ፥ ፆሳይ ኤንታ ባ ናይታ ኦስ፥ ባ ቦንቹዋ ኤንታዉ ቆንጭስስ። ኤንታራ ጫቅስ፤ ህግያ ኤንታዉ እሚስ። ኤንቲ ፆሳ ጎይናና ቱማ ኦግያ በስስ፤ ፆሳይ ኡፋይሳ ቃላ ኤንታዉ እሚስ።

⁵ ኤንቲ የለተን ማይዛታ ኮቸ፤ ቃስ ክርስቶስ አሾን ኤንታ ኮቸ ግድድ ይስ። ኡባፈ ቦላ ግድዳ ፆሳይ መርናዉ ጋላተቶ። አምንእ!

⁶ ግዶሽን፥ ፆሳይ ገልዳ ቃላይ ፖለቶና አትስ ጉሱ ግደና። እስራኤለ አሳ ኡባይ ፆሳ አስ ግዶኮና።

⁷ ቃስ አብራሃመ ዛረ ኡባይ አብራሃመ ናይታ ግዶኮና። ፆሳይ አብራሃመስ፥ “ነ ኮቻይ ይሳቃ ባጋራ ፄገታና” ያግስ።

⁸ ሄሳ ጉሳይ አሾን የለትዳ ናይት ኡባይ ፆሳ ናይታ ግዶኮና። ሽን ቱማ እስራኤለ ናይት ፆሳይ አብራሃመስ ገልዳ ቃላዳ የለትዳ ናይታ።

⁹ ፆሳይ እማና ግድ ገልዳ ቃላይ፥ “ታኒ ዎንቶ ላይ ሀኖደ ያና፤ ሳራካ አደ ናአ የላና” ያገይሳ።

¹⁰ ሄሳ ፃላላ ግዶናሽን፥ እርብቅነ ይሳቅ የልዳ መንተ አደ ናይታባ አኬክተ።

¹¹ ኤንቲ የለታናፐ ዎይኮ ኢታ ዎይኮ ሎኦ ኦናፐ ስን ፆሳ ዶሮይ ኦሶን ግዶናሽን ፄሳን ግደይሳ ቆንጭሳናዉ፥

¹² “ባይራይ ካሉዋስ ኪተታና” ያግድ ጎዳይ እርብቃስ ኦድስ።

¹³ ሄስካ ጌሻ ማፃፋን፥ “ያይቆባ ዶሳስ፥ ኤሳዌ እፃስ” ጌተትድ ፃፈትስ።

¹⁴ ያትን፥ ኑኒ ዎይጋኔ? ፆሳይ አሰ አሳፐ ሻክዬ? ግደና።

¹⁵ ጎዳይ ሙሰኮ፥ “ታ ማራናዉ ኮይዳይሳታ ማራና፤ ታ ቃታናዉ ኮይዳይሳታስ ቃታና” ያግስ።

¹⁶ ህዛ፥ ፆሳ ዶሮይ አሳ ሸነን ዎይኮ ኦሶን ግዶናሽን እያ ማሮተና።

¹⁷ ጌሻ ማፃፋን፥ ግብፀ ካዋኮ፥ “ታኒ፥ ታ ዎልቃ ነናን በሳናዉነ ታ ሱንይ አላመ ኡባን ኤረታና መላ ሄሳስ ነና ካዎስ” ጌተትድ ፃፈትስ።

¹⁸ ህዛ፥ ፆሳይ ማራናዉ ኮየይሳ ማሬስ፤ ዎዛና ሙምሳናዉ ኮየይሳ ዎዛና ሙምሴስ።

ፆሳ ሀንቆነ ማሮተ

¹⁹ ህንተፈ እሶይ፥ “ያትን፥ ፆሳይ አሰ ኢታ ኦሶ ግሾ አይስ ቦሪ? ፆሳ ሸንያ እፃስ ጋናይ ኦኔ?” ያግድ ኦይቻናዉ ዳንዳኤስ።

²⁰ ሽን ታ እሻዉ፥ ፆሳራ ፓላማናዉ ኔኒ ኦኔ? ኡርቃፈ መትዳ ሚሸይ ባና መዳይሳ፥ “ታና ሀይሳዳ ኦዳ አይስ መዲ?” ግድ ኦይቻናዉ ዳንዳኢ?

²¹ ዎይኮ ኡርቃ መይስ እስ ኡርቃፈ እሱዋ ቦንቾ ሚሸ፥ ሀንኩዋ ቃስ ቶሸ ሚሸ ኦድ መናዉ ማት ባዌ?

²² ፆሳይ ባ ሀንቁዋ በሳናዉነ ባ ዎልቃ ኤርሳናዉ ኮይድ፥ ፕርዳስ ጊግዳ ሀንቆ ናይታ ዳሮ ገንጫን ዳንዳእዳኮ ነ አይ ኤራይ?

²³ ሄሳ እ ኦዳይ ኮይሮትድ ቦንቾስ ጊግስዳ፥ ባ ዶርዳ ናይታስ ባ ቦንቹዋ ቆንጭሳናሳ።

²⁴ አይሁደ ግድን፥ ዎይኮ አይሁደ ግዶና አሳ ኡባይ ፆሳን ዶረትዳ።

²⁵ ናብያ ሆሰ ማፃፋን፥ “ታ አሰ ግዶናይሳታ፥ ‘ታ አሰ’ ጋዳ ፄጋና። ታ ሲቃቦና ደርያ፥ ‘ሲቀትዳይሳታ’ ጋዳ ፄጋና።

²⁶ ኤንቲ፥ ‘ታ አሰ ግደከታ’ ጌተትድ ፄገትዳ በሳን፥ ‘ደኦ ፆሳ ናይታ’ ጌተትድ ፄገታና” ያጌስ።

²⁷ ናብያ እሳያስ እስራኤለ አሳባ፥ “እስራኤለ አሳይ አባ ጋፃን ደእያ ሻፈዳ ዳርኮካ፥ ኤንታፈ ጉ አሳ ፃላል አታና።

²⁸ ጎዳይ አላምያ ኡባ ቦላ ኤለስድ ፖሎ ፕርዳ ፕርዳና።”

²⁹ ቃስካ እሳያስ፥ “ኡባፈ ዎልቃማ ጎዳይ ኑስ ጉ ኮቸ አሾናባ ግድያኮ፥ ኑኒ ሶዶመነ ጋሞራ ካታማዳ ያናሽን” ያግድ ኮይሮትድ ኦድስ።

³⁰ ያትን፥ ኑ ዎይጋኔ? ፅሎተ ኮይቦና አይሁደ ግዶና አሳይ አማኖን ፅሎተ ደምዶሶና።

³¹ ሽን ፅሎተኮ ጋያ ህገይ ደእያ እስራኤለ አሳይ ፅሎተ ደምቦኮና።

³² አይስ ደምቦኮና? ኤንቲ ፅሎተ አማኖን ግዶናሽን፥ ኦሶን ኤካናዉ ኮይዳ ግሾሳ። ያንያ ግሾ፥ ኤንቲ፥ “ብያ ሹቻን” በትዶሶና።

³³ ጌሻ ማፃፋን፥ “ታኒ ፅዮነን ቢ ኩንድስያ ሹቻ ዎና። እያን አማንያ ኦንካ ዬላተና” ጌተትድ ፃፈትስ።