Roome 8 - ጌሻ ማፃፋ

ጌሻ አያናን ደኦ

¹ ሄሳ ግሾ፥ ክርስቶስ የሱሳን ደኤይሳት ሀእ ፕርደቶኮና።

² ክርስቶስ የሱሳ ባጋራ ኑስ ደኦ እምያ ጌሻ አያና ህገይ፥ ታና ናጋራነ ሀይቆ ህገ አይለተፈ ከስስ።

³ ኑ ናጋራ አሳተ ጋሶን፥ ህገይ ዳቡራንቾ ግድያ ግሾ ኑና አሻናዉ ዳንዳእቤና። ፆሳይ ባ ናኣ ናጋራንቾ አሳ ሌምሶን ናጋራስ ያርሾ ግዳና መላ ኪትድ ሄሳ ኦስ። ያትድ፥ ፆሳይ ክርስቶሳ አሹዋ ባጋራ ናጋራ፥ ናጋራንቾ አሳ ግዶን ፕርድስ።

⁴ ፆሳይ ሄሳ ኦዳይ፥ ኑ አሾ አሞይ ኮየይሳዳ ግዶናሽን፥ ጌሻ አያናይ ኮየይሳዳ ደእያ ኑ ቦላ ህግያ ፅሎ ኪታይ ፖለታና መላሳ።

⁵ ባንታ አሾ አሙዋ ካልድ ደኤይሳት ባንታና ኡፋይስያባ ቆፖሶና። ሽን ጌሻ አያና ሸነን ደኤይሳት ጌሻ አያና ኡፋይስያባ ቆፖሶና።

⁶ ኑ ቆፋይ አሾ አሞስ ሃረትኮ ሀይቆ ኤሄስ፥ ሽን አያና አሞስ ሃረትኮ ደኦነ ሳሮተ ኤሄስ።

⁷ አሾ አሞስ ሃረትያ አስ ፆሳ ህግያስ ኪተታናዉ ኮዮና ግሾነ ኪተታናዉ ዳንዳኦና ግሾ፥ ፆሳራ ሞርከ።

⁸ ባንታ አሾ አሙዋስ ሃረተይሳት ፆሳ ኡፋይሳናዉ ዳንዳኦኮና።

⁹ ሽን ፆሳ አያናይ ህንተናን ደእኮነ ህንተና ሃርኮ፥ ህንተ አያና ሸነን ደኤታፐ አትሽን፥ ህንተ አሾ አሙዋስ ሃረተከታ። ክርስቶሳ አያናይ ባይና ኦንካ ክርስቶሳባ ግደና።

¹⁰ ሽን ክርስቶስ ህንተናን ደእኮ፥ ህንተ አሳተይ ናጋራ ጋሶን ሀይቅዳይሳ። ሽን ህንተ አያናይ ፅሎተ ጋሶን ደኦን ደኤስ።

¹¹ ሽን የሱሳ ሀይቆፐ ደንዳ ፆሳ አያናይ ህንተናን ደእኮ፥ ክርስቶሳ ሀይቆፐ ደንዳ ፆሳይ፥ ህንተናን ደእያ ባ ጌሻ አያናን ሀይቅያ ህንተ አሳተስ ደኦ እማና።

¹² ህዛ፥ ታ እሻቶ፥ ኑኒ ኑ አሾ አሙዋ ካልድ ዳናዉ በሰና።

¹³ ህንተ፥ ህንተ አሾ አሙዋስ ደእኮ ሀይቃና፥ ሽን ጌሻ አያና ዎልቃን ናጋራ ኦሱዋ ዎኮ ህንተ ደኦን ዳና።

¹⁴ ፆሳ አያናይ ካለያ ኡባይ ፆሳ ናይታ።

¹⁵ ኑኒ፥ “አባ፥ ታ አዋዉ” ያግድ ፄግያ፥ ፆሳ ናይታ ኦያ ጌሻ አያና ኤክዳፐ አትሽን፥ ዛሪድ ያሻን ዳናዉ አይለ ኦያ አያና ኤክቦኮ።

¹⁶ ፆሳ አያናይ ኑ አያናራ ግድድ ኑኒ ፆሳ ናይታ ግደይሳ ማርካቴስ።

¹⁷ ኑኒ እያ ናይታ ግድኮ ፆሳ አንጁዋ ላታና፤ ክርስቶሳራ ዎላ ሄ አንጁዋ ላታና። ቃስ ኑኒ ክርስቶሳራ መቱዋ ኤክኮ እያራ ዎላ እያ ቦንቹዋን ሻከታና።

ያና ቦንቹዋ

¹⁸ ኑኒ ሀእ ዋየትያ ዋይያ፥ ስንፈ ኑስ ቆንጫና ቦንቹዋራ ጋ በእኮ፥ ግንሳናዉ ዳንዳኤተና ጋዳ ቆፓይስ።

¹⁹ መተ ኡባይ ፆሳ ናይታ ቆንጨ ዳሮ ላሞትድ ናጎሶና።

²⁰ መተ ኡባይ ሀዳ ግድስ፤ ሄስካ፥ መተ ዶሮን ግዶናሽን፥ ኡፋይሳን ናጋና መላ ኦዳ ፆሳ ሸነን ሀንስ።

²¹ መተይ ባ ሁጰን ዮ አይለተፈ ዎዘትድ፥ ፆሳ ናይታራ ዎላ ቦንቾ ላአ ሻከታና።

²² መተይ እስፈ ሀኖ ጋካናዉ እቀ ኦይክዳ ማጫሳዳ ኦለንነ ኡንአን ደኤይሳ ኑ ኤሮስ።

²³ ቃስ ሄሳ መተ ፃላላ ግዶናሽን፥ ጌሻ አያና ባይራ እሞታዳ ኤክዳ ኑኒ፥ ኑ ሁጰን ኑ አሳተስ ዎዞ ግድዳ ፆሳ ናይታ ግዳና ኡፋይሳ ናግሸ ኑ አሳተን ኦሎስ።

²⁴ ሀ ኡፋይሳን ኑኒ አትዳ። ሽን ኑኒ ኡፋይስ ኦያባይ በንትያ ግድኮ ሄሳ ኦን ኡፋይስ ኦ?

²⁵ ሽን ኑ በኦናባ ደማና ግድ ኡፋይሳን ናግኮ ሄሳ ዳንዳአን ናጎስ።

²⁶ ሄሳዳ ጌሻ አያናይ ኑ ዳቡራን ማዴስ። ኑኒ ፆሳ ዋት ዎሳናዉ በሲያኮ ኤሮኮ፥ ሽን ጌሻ አያናይ ባ ሁጰን፥ አስ ኦዳናዉ ዳንዳኤቶና ቃላን ኑስ ጋናቴስ።

²⁷ ቃስ አሳ ዎዛና ኤርያ ፆሳይ ጌሻ አያና ቆፋይ አይበኮ ኤሬስ። ጌሻ አያናይ ፆሳ ሸንያዳ ጌሻታስ ጋናቴስ።

²⁸ ፆሳ ሲቀይሳታስነ እያ ሸንያዳ ፄገትዳይሳታስ ፆሳይ ኡባ ሎኦስ ኦይሳ ኤሮስ።

²⁹ ፆሳይ ኮይሮትድ ኤርዳይሳት ባ ናኣ ዳናና መላነ ናአይካ አማነይሳታ ግዶን ባይራ ግዳና መላ ኤንታ ዱማይድ ዎስ።

³⁰ ፆሳይ ኮይሮትድ ዱማይዳይሳታ ፄግስ፤ ሄ ፄግዳይሳታ ፅልስስ፤ ሄ ፅልስዳይሳታ ቃስ ቦንችስ።

ፆሳ ሲቆ

³¹ ያትን፥ ኑ ሀ ኡባስ ዎይጋኔ? ፆሳይ ኑ ባጋ ግድኮ ኑራ ኦነ ኤቀታናይ?

³² እ ሀር አቶሽን፥ ባ ናኣስ ቃቶናሽን፥ ኑ ግሾ አድ እሚስ። ያትን፥ ባ ናኣ ኑስ አድ እምዳይስ ዋንድ ኡባባ ጮ እመኔ?

³³ ፆሳይ ኤንታና ፅልስዳ ግሾ እ ዶርዳይሳታ ኦነ ሞታናይ?

³⁴ ያትን፥ ኤንታ ቦላ ፕርዳናዉ ዳንዳኤይ ኦኔ? ኦንካ ባዋ። ሀይቆፐ ደንድድ ፆሳ ኡሻቻን ኡትዳ፥ ክርስቶስ የሱሲ፥ እ ኑስ ጋናቴስ።

³⁵ ህዛ፥ ኑና ክርስቶሳ ሲቁዋፐ ሻካናይ ኦኔ? ዋየየ ዎይኮ መቶየ ዎይኮ ጎደየ ዎይኮ ኮሸየ ዎይኮ ካሎተየ ዎይኮ ያሸየ ዎይኮ ኦለዬ?

³⁶ ጌሻ ማፃፋን፥ “ኑኒ ነ ግሾ ኩመ ጋላስ ሀይቆስ፤ ሹካስ ኤፍያ ዶርሳዳ ታይበትዳ” ጌተትድ ፃፈትዳይሳ መላ ግድስ።

³⁷ ሽን ኑኒ፥ ኑና ሲቅዳ ክርስቶሳን ሀ ኡባ ፖሎ ፆኖስ።

³⁸ ሄሳ ግሾ፥ ሀይቆ ግድን ደኦ ግድን ኪታንቾታ ግድን ሃረይሳታ ግድን ሀእ ደኤይሳ ግድን ስንፈ ያናይሳ ግድን ዎልቃማታ ግድን፥

³⁹ ሳሎ ዎልቃ ግድን ሳአ ዎልቃ ግድን አይ መተ ግድን ኑ ጎዳ፥ ክርስቶስ የሱሳን ደእያ ፆሳ ሲቁዋፐ ኑና ሻካናዉ ዳንዳኦናይሳ ታኒ ኤራስ።