Roome 6 - ጌሻ ማፃፋናጋራስ ሀይቆ ክርስቶሳስ ደኦ 1 ያትን፥ ኑኒ ዎይጋኔ? ፆሳ አ ኬሀተይ ዳራና መላ ናጋራን ምንድ ደእኖ? 2 አካይ፥ ኑኒ ናጋራስ ሀይቅዳባ ግድኮ፥ ያትን፥ ኑኒ ህዛፐ ዋንድ ናጋራን ዳኔ? 3 ኑ ኡባይ ክርስቶስ የሱሳራ እስፋናዉ ፃማቀትዳ ዎደ እያ ሀይቁዋን እያራ እስፋናዉ ፃማቀትዳይሳ ኤረከትዬ? 4 ኑ ፃማቀትዳ ዎደ ክርስቶሳራ ሀይቅዳነ ሞገትዳ። ክርስቶስ ፆሳ አዋ ቦንቾ ዎልቃን ሀይቆፐ ደንድዳይሳ መላ ኑካ ኦራ ደኦን ዳና። 5 ኑ እያ ሀይቁዋን እያራ እስኖ ግድኮ፥ ሄሳዳካ፥ እያ ደንዱዋን እያራ እስኖ ግዳና። 6 ኑ ህዛፐ ናጋራስ አይለ ግዶና መላነ ኑ ናጋራንቾ አሳተ ዎልቃይ ያና መላ ኑ ጭማ አሳተይ ክርስቶሳራ ካቀትዳይሳ ኤሮስ። 7 እስ አስ ክርስቶሳን ሀይቅዳባ ግድኮ፥ እ ናጋራ ዎልቃፈ ላአ ከይስ። 8 ኑኒ ክርስቶሳራ ሀይቅኮ፥ እያራ ደኦን ዳናይሳ አማኖስ። 9 ክርስቶስ ሀይቆፐ ደንድዳ ግሾ፥ ዛር እ ሀይቆናይሳነ ሀይቆይ ስንፈ እያ ሃሮናይሳ ኑ ኤሮስ። 10 እ ሀይቅዳ ዎደ ናጋራስ እስቶሆ ዉርሰ ጋካናዉ ሀይቅስ፥ ሽን ሀእ ደኦን ፆሳስ ደኤስ። 11 ሄሳዳካ፥ ህንተ ናጋራስ ሀይቅድ፥ ጎዳ ክርስቶስ የሱሳ ባጋራ ፆሳስ ደኦን ደኤይሳ ቆፕተ። 12 ሄሳ ግሾ፥ ህንተ፥ ህንተ አሳተ አሙዋስ ኪተቶና መላ ሀይቅያ ህንተ አሳተ ናጋር ሃሮፖ። 13 ቃስ ህንተ አሳተ ናጋራ ኦናዉ ጌላተ ሚሸ ኦድ እሞፍተ። ሽን ህንተ ሀይቆፐ ደንድድ፥ ደኦን ደእያ አሳዳ ህንተ አሳተ ፆሳስ እምተ። ቃስ ህንተ ኩመ አሳተ ፅሎ ኦሶ ኦናዉ ፆሳስ አድ እምተ። 14 ህንተ ፆሳ አ ኬሀተ ጋርሳን ደኤታፐ አትሽን፥ ህገፈ ጋርሳን ደኦና ግሾ ናጋር ህንተና ሃራናዉ በሰና። ፅሎተ አይለ 15 ያትን፥ ኑ ዎይጋኔ? ህገፈ ጋርሳን ግዶናሽን፥ ፆሳ አ ኬሀተ ጋርሳን ደእያ ግሾ ናጋራ ኦነዬ? አካይ፥! 16 ህንተ እስ አሳስ ኪተታናዉ ህንተና አይለ ኦድ እምያ ዎደ ሄ ህንተ ኪተተይሳስ አይለ ግደይሳ ኤሬታ። ሄሳዳካ፥ ህንተ ናጋራስ ኪተትኮ፥ ህንተዉ ሀይቆ ኤህያ ናጋራስ አይለ ግዴታ። ዎይኮ ህንተ ፆሳስ ኪተትኮ ፅሎተ ኤህያ ፆሳስ አይለ ግዴታ። 17 ካሰ ህንተ ናጋራስ አይለ፥ ሽን ሀእ ህንተ ኤክዳ ቱማ ትምርትያስ ኩመ ዎዛናፐ ኪተትዳ ግሾ ፆሳስ ጋላት ግዶ። 18 ህንተ ናጋራ አይለተ ቃሾፐ ብለትድ ፅሎተ አይለ ግድደታ። 19 ህንተ ህንተ ቆፋን ዳቡራንቾ ግድያ ግሾ፥ ታኒ ኦደስካ ገልያ ኦገን ኦዳይስ። ካሰ ህንተ፥ ህንተ አሳተ ቱናነ ኢታባ ኦናዉ አይለ ኦድ እምዳይሳ መላ ሀእ ህንተ አሳተ ጌሽ ግዳና መላ ፅሎተ አይለ ኦድ እምተ። 20 ህንተ ናጋራስ አይለትድ ደእያ ዎደ ፅሎተስ ሃረተከታ። 21 ህንተና ሀእ ዬላይያ በን ህንተ ኢታ ኦሱዋፐ አይ ማደ ደምደቲ? ሄ ኦሶታ ዉርሰይ ሀይቆ። 22 ሽን ህንተ ናጋራ አይለተ ቃሾፐ ብለትድ፥ ፆሳስ አይለ ግድደታ። ሄስ ህንተና ጌሽ ኦድ መርና ደኡዋኮ ካለስ። 23 ናጋራ ጋተይ ሀይቆ። ሽን ፆሳይ፥ ኑ ጎዳ ክርስቶስ የሱሳ ባጋራ እምያ እሞታይ መርና ደኦ። |
The Word for the World International and The Word for the World Ethiopia