Roome 5 - ጌሻ ማፃፋ

ፆሳን ደእያ ሳሮተ

¹ ህዛ፥ ኑ አማኖን ፅልዳ ግሾ፥ ኑ ጎዳ የሱስ ክርስቶሳ ባጋራ ፆሳራ ኑስ ሳሮተ ደኤስ።

² ኑኒ እያ ባጋራ ሀእ ኑ ኤቅዳ አ ኬሀተ ግዶ አማኖን ገልዳ። ሄሳ ግሾ፥ ኑ ፆሳ ቦንቹዋ ሻከታናዉ ደእያ ኡፋይሳን ጬቀቶስ።

³ ሄሳ ፃላላ ግዶናሽን፥ መቶይ ዳንዳአ ኤሄይሳ ኑ ኤርያ ግሾ፥ ኑ መቱዋንካ ጬቀቶስ።

⁴ ቃስ ዳንዳአይ ገንጫ፥ ገንጫይ ኡፋይስ እመይሳ ኑ ኤሮስ።

⁵ ኑስ እምዳ ጌሻ አያና ባጋራ ፆሳይ ባ ሲቁዋ ኑ ዎዛናን ጉስዳ ግሾ ሄ ኡፋይሳይ ኑና ዬላየና።

⁶ ኑኒ ቡሮ ዳቡራንቾታ ግድድ ደእሽን፥ ፆሳ ዎደይ ጋክን፥ ክርስቶስ ናጋራንቾታ ግሾ ሀይቅስ።

⁷ ፅሎ አሳ ግሾ ሀይቃና አስ ደማናይስ ዳሮ መቶ፥ ሽን ኬሀ አሳ ግሾ ሀይቃና አስ ኦን ኤር በንቶና አገና።

⁸ ሽን ኑኒ ቡሮ ናጋራንቾ ግድድ ደእሽን፥ ክርስቶስ ኑ ግሾ ሀይቅስ። ሄስ ፆሳይ ኑና አይ መላ ሲቅያኮ እያ ሲቁዋ በሴስ።

⁹ ህዛ፥ ኑኒ ክርስቶሳ ሱን ፅልዳባ ግድኮ፥ ኡባፈ አድ እያ ባጋራ ፆሳ ሀንቁዋፈ አታና።

¹⁰ ኑኒ ፆሳራ ካሰ ሞርከ፥ ሽን እያ ናኣ ሀይቁዋን እያራ ስገትዳ። ሄሳፈ አድ፥ ሀእ ኑኒ ፆሳራ ስገትዳፐ ጉየ፥ እያ ናኣ ደኡዋ ጋሶን ኑኒ አታና።

¹¹ ሄሳ ፃላላ ግዶናሽን፥ ሀእ ኑና ፆሳራ ስገዳ ኑ ጎዳ የሱስ ክርስቶሳ ባጋራ ኑ ፆሳን ጬቀቶስ።

አዳመነ ክርስቶሳ

¹² አዳመ ባጋራ ናጋር ሀ አላምያ ገልስ። ሄ ናጋራ ባጋራ ሀይቆይ ይስ። አስ ኡባይ ናጋራ ኦዳ ግሾ ሀይቆይ አሳ ዛረ ኡባ ጋክስ።

¹³ ህገይ እመታናፐ ስን አላመን ናጋር ደኤስ፥ ሽን ህገይ ባይና ዎደ ናጋር ናጋራ ግድድ ታይበተና።

¹⁴ ሽን አዳመፐ ሙሰ ጋካናዉ ሀይቆይ አሳ ኡባ ሃርስ። ሀር አቶሽን፥ አዳመዳ ህገስ ኪተቶና እፅድ፥ ናጋራ ኦቦናይሳታ ቦላካ ሀይቆይ ካዎትስ። አዳመይ ያና የሱሳስ ሌምሶ።

¹⁵ ሽን ፆሳ አ ኬሀተይ አዳመ ናጋራ መላ ግደና። እስ አሳ ናጋራ ባጋራ ዳሮ አሳይ ሀይቅስ። ሽን የሱስ ክርስቶሳ ባጋራ ፆሳ አ ኬሀተይ አሳ ኡባስ ዳርድ እመትስ።

¹⁶ አዳመ ናጋራ ግዶንነ ፆሳ እሞታ ግዶን ዳሮ ዱማተ ደኤስ። እስ አሳ ናጋራ ጋሶን ፆሳይ እያ ቦላ ፕርድስ። ሽን አሳይ ዳሮ ናጋራ ኦንካ ፆሳ አ ኬሀተይ ፅሎተ ኤህስ።

¹⁷ እስ አሳ ናጋራ ጋሶን ሀይቆይ አሳ ኡባ ቦላ ካዎትስ። ሽን የሱስ ክርስቶሳ ባጋራ ፆሳ አ ኬሀተነ ፅሎተ እሞታ ኤክያ ኡባይ፥ ፆኖ ደኦን ደኦሶና።

¹⁸ ህዛ፥ እስ አስ ናጋራ ኦዳ ጋሶን አሳ ኡባ ቦላ ፕርድ ይዳይሳዳ እስ አስ ፅሎ ኦዳ ጋሶን፥ ፆሳይ አሰ ኡባ ፅልስድ ኤንታዉ ደኦ እሜስ።

¹⁹ እስ አስ ኪተቶና እፅዳ ጋሶን፥ ዳሮ አሳይ ናጋራንቾ ግድዳይሳዳ እስ አሳ ኪተተን ዳሮ አሳይ ፅላና።

²⁰ አሳይ ናጋራ ዎልቃ ኤራና መላ ህገይ ይስ፥ ሽን ናጋራ ዎልቃይ ዳርዳ ዎደ ፆሳ አ ኬሀተይ አድ ዳርስ።

²¹ ናጋር ሀይቆ ዎልቃን ካዎትዳይሳ መላ ፆሳ አ ኬሀተይ ፅሎተ ዎልቃን ካዎትድ፥ ኑ ጎዳ የሱስ ክርስቶሳ ባጋራ ኑና መርና ደኡዋኮ ካለስ።