Roome 2 - ጌሻ ማፃፋ

ፆሳ ፅሎ ፕርዳ

¹ ሄሳ ግሾ፥ ነኖ ሀራታ ቦላ ፕርደይሶ፥ ኔኒ ጋሶያባይ ባዋ። ኔኒ ሀራታ ቦላ ፕርዳሸ፥ ሄ ኔኒ ፕርድያ ኡራ መላ ኦኮ፥ ኔኒ፥ ነ ቦላ ፕርዳሳ።

² ሄሳ መላ ኦሶ ኦይሳታ ቦላ ፆሳይ ፅሎ ፕርዳ ፕርደይሳ ኑ ኤሮስ።

³ ነኖ፥ ሄሳ መላ ኦሶ ኦይሳታ ቦላ ፕርደይሶ፥ ኤንቲ ኦይሳ መላ ኦይሶ፥ ኔኒ ፆሳ ፕርዳፈ አታናባ ዳኒ?

⁴ ዎይኮ ፆሳ ኬሀተ፥ ገንጫነ ዳንዳአ ዳሮተ ካዬ? ፆሳይ ነዉ ኬህዳይ ነና ናጋራፐ ዛራናዉ ግደይሳ ኤርክዬ?

⁵ ሽን ህንተዉ ሹቻ ዎዛንነ ስኦና ሀይ ደኤስ። ሄሳ ግሾ፥ ፆሳ ሀንቆይነ ፅሎ ፕርዳይ ቆንጭያ ጋላስ፥ ነ ቦላ ፕርዳይ ዳራና መላ ኦሳ።

⁶ ፆሳይ እሱዋስ እሱዋስ እያ ኦሱዋ መላ እማና።

⁷ ሎኦ ኦሶን ምንድ፥ ጋላታ፥ ቦንቾነ ዮና ደኡዋ ኮየይሳታስ ፆሳይ መርና ደኡዋ እማና።

⁸ ሽን ባንታና ሲቀይሳታ፥ ቱማ እፀይሳታነ ኢታባ ኦናዉ ኮየይሳታ ቦላ ፆሳ ሀንቆይነ ፕርዳይ ያና።

⁹ ኢታባ ኦያ አሳ ኡባ፥ ኮይሮትድ አይሁደታ፥ ካልድ አይሁደ ግዶና አሳ መቶይነ ዋየይ ጋካና።

¹⁰ ሽን ፆሳይ ሎኦ ኦሶ ኦያ ኡባስ፥ ኮይሮትድ አይሁደታስ፥ ካልድ አይሁደ ግዶናይሳታስ ጋላታ፥ ቦንቾነ ሳሮተ እማና።

¹¹ ፆሳይ ሶምኦ በእድ አሰ ሻከና።

¹² ህገይ ባይና ናጋራ ኦዳ ኡባይ ህገይ ባይና ያና። ህገይ ደእሽን፥ ናጋራ ኦዳ ኡባይ ህገን ፕርደታና።

¹³ ፆሳ ስንን ፅለይሳት ህገ ናገይሳታፐ አትሽን፥ ህገ ስሳ ፃላላ ስኤይሳታ ግዶኮና።

¹⁴ ህገይ ባይና አይሁደ ግዶና አሳይ መን ህገይ ኪተይሳ ኦሶና። ኤንታዉ ፃፈትዳ ህገይ ባይና እፅኮካ ኤንቲ ባንታ ዎዛናን ህግያ ኤሮሶና።

¹⁵ ኤንታ ሀኖታይ፥ ህገ ኪታይ ኤንታ ዎዛናን ፃፈትዳይሳ በሴስ። ቃስ ኤንታ ካሀይ ኤንታ ቦላ ማርካቴስ። ኤንታ ቆፋይ እስ እስ ቶሆ ኤንታና ባላ ጌስ፤ እስ እስ ቶሆ ኤንታና ልከ ጌስ።

¹⁶ ታ ታማርስዳ ዎንገላ መላ ፆሳይ የሱስ ክርስቶሳ ባጋራ አሳ ዎዛናን ጌምዳ ቆፋ ፕርድያ ዎደ ሄስ ኤረታና።

አይሁደታነ ኤንታ ህግያ

¹⁷ ሽን ነ ነና አይሁደ ጋሳ፤ ህገን ዘምፓሳ፤ ፆሳን ጬቃሳ።

¹⁸ ነ ኦና መላ ፆሳይ ኮይያባይ አይበኮ ኤራሳ። ህግያ ታማርዳ ግሾ፥ ቱማ ግድያባ ዶራናዉ ኤራሳ።

¹⁹ ኔኒ ቆቀታ ካለይሳ፥ ቃስ ማን ደኤይሳታስ ፖኦ ግደይሳ ሻካ ኤራሳ።

²⁰ ኔኒ ህግያፈ ደምዳ ኤራተንነ ቱማተን ኤያታ ኤርሰይሳነ ዮጋታ ታማርሰይሳ ግደይሳ ኤራሳ።

²¹ ያትን፥ ነ ሀራታ ታማርሰይስ ነ ነና አይስ ታማርስኪ? ኔኒ፥ “ካይሶቶፓ” ጋሸ፥ ኔኒ ነ ሁጰን ካይሶታዬ?

²² ኔኒ፥ “ላሞፋ” ጋሸ፥ ኔኒ ነ ሁጰን ላማዬ? ኔኒ ኤቃ እፃሸ፥ ኤቃይ ደእያ ኬ ቦንቃዬ?

²³ ኔኒ ፆሳ ህግያን ጬቀታሳ፥ ሽን ህግያስ ኪተቶና እፃዳ ፆሳ ዬላያይ?

²⁴ ጌሻ ማፃፋን፥ “ህንተ ጋሶን ፆሳ ሱንይ አይሁደ ግዶና አሳታን ጫየቴስ” ጌተትድ ፃፈትስ።

²⁵ ነ ህገስ ኪተትኮ፥ ነ ቃፃረተስ ማደይ ደኤስ፥ ሽን ኔኒ ህግያስ ኪተቶና እፅኮ ነ ቃፃረተይ ቃፃረትቦና መላ ግዴስ።

²⁶ አይሁደ ግዶና አስ ቃፃረቶና ደእሸ፥ ህግያስ ኪተትኮ፥ ፆሳይ እያ ቃፃረትዳ መላ ታይበኔ?

²⁷ ህንተ፥ አይሁደ አሳት፥ ህንተዉ ፃፈትዳ ህገይነ ቃፃሮይ ደእሽን፥ ህንተ ህገስ ኪተቶና እፅኮ፥ አይሁደ ግዶና አሳይ ቃፃረቶና እፅኮካ ህገስ ኪተትድ፥ ህንተ ቦላ ፕርዳና።

²⁸ ህዛ፥ ሱንን አይሁደ ግድዳ ኡባይ ቱማ አይሁደ ግደና። ቃስ ካረ አሳተ ቃፃሮይ ቱማ ቃፃሮ ግደና።

²⁹ ሽን ቱማ አይሁደተ ጋ ባጋን አይሁደ ግደይሳ። ቱማ ቃፃረተ ፆሳ አያናን ኦሰትያ ዎዛና ቃፃረተፈ አትሽን፥ ፃፈትዳ ህግያን ኦሰትያ አሳተ ቃፃሮ ግደና። ሄ ኡራይ ጋላታ ፆሳፈ ኤኬስፐ አትሽን፥ አሳፐ ግደና።