Roome 16 - ጌሻ ማፃፋ

ሳሮ

¹ ክንክረ ካታማን ደእያ ዎሳ ኬን ኦያ ኑ ምችያ ፌበና ሎኦ ማጫስ ግደይሳ ህንተ ኤራና መላ ኮያይስ።

² ህንተ እዮ አማንያ አሳት ጎዳ ሱንን ሞካናዉ በሲያ አማንያ አሳታፐ እሱዋዳ ሞክተ። እያ ህንተፈ ኮያባ ኡባ እዮ ማድተ። እያ ባ ሁጰን ዳሮ አሳ ማዳሱ፤ ቃስ ታና ታ ሁጰንካ ዳሮ ማዳሱ።

³ ክርስቶስ የሱሳ ኦሱዋ ታራ እስፈ ኦያ ጵርስቅላነ አቅላ ሳሮ ጊተ።

⁴ ኤንቲ ታ ግሾ ባንታ ሸምፑዋ አድ እምዶሶና። ታ ፃላላ ግዶናሽን፥ አይሁደ ግዶና አሳ ዎሳ ኬ ኡባይ ኤንታ ጋላቴስ።

⁵ ኤንታ ሶን ሺቅያ አማንያ አሳ ሳሮ ጊተ። ኢሰ ቢታን ክርስቶሳ ኮይሮ አማንዳ፥ ታ ዶስያ ኤጳነፆሳስ ታ ሳሮዋ ኦድተ።

⁶ ህንተ ግሾ ኦሶን ዳሮ ዳቡርዳ ማይራሞ ሳሮ ጊተ።

⁷ ታራ ቃሾ ኬን አዳ ታ አይሁደ ላገታ አንድራንቆሳነ ዩንያሳ ሳሮ ጊተ። ኤንቲ የሱሳ ሀዋረታ ግዶን ኤረትዳይሳታ። ቃስ ኤንቲ ክርስቶሳ ታፐ ስን አማንዶሶና።

⁸ ጎዳን አማንያ ታ ሲቆ ላግያ፥ ጵልያፆና ሳሮ ጊተ።

⁹ ክርስቶሳ ኦሱዋ ኑራ እስፈ ኦያ ኡርባኖሳነ ታ ዶስያ እስታኩሳ ሳሮ ጊተ።

¹⁰ ክርስቶሳን አማንያ አይልያ አጰልሳስ ታ ሳሮዋ ኦድተ። አርስፆቡሎሳ ሶ አሳስ ታ ሳሮዋ ኦድተ።

¹¹ ታ አይሁደ ላግያ ሄሮድዮና ሳሮ ጊተ። ናርስሳስነ እያ ሶ አሳፐ ክርስቶሳ አማንዳይሳታ ሳሮ ጊተ።

¹² ጎዳ ኦሱዋን ዳቡርያ ትሩፋይናነ ትሩፎሳ ሳሮ ጊተ። ቃስ ጎዳስ ዳሮ ዳቡራዳ ኦያ፥ ታ ዶስያ ፃርስዶ ሳሮ ጊተ።

¹³ ጎዳ ኦሱዋን ዳሮ ኤረትዳ ሩፎሳስነ ታና ባ ናአዳ በእያ እያ አየስ ታ ሳሮዋ ኦድተ።

¹⁴ አስቃርፆናስ፥ አፍለሶንጳስ፥ ሄርሜሳስ፥ ጳፅሮባናስ፥ ሄርማስነ ኤንታራ ደእያ አማንያ እሻታ ኡባስ ታ ሳሮዋ ኦድተ።

¹⁵ ፍሎሎጉሳ፥ ዩላ፥ ኔራ፥ እያ ምችዉ፥ አልንፆሳነ ኤንታራ ደእያ አማንያ አሳ ኡባ ሳሮ ጊተ።

¹⁶ ጌሻ ዬረተ ዬረትሸ፥ እሶይ እሱዋ ሳሮተ። ክርስቶሳ ዎሳ ኬ ኡባይ ህንተና ሳሮ ያጎሶና።

ዉርሰ ዞረ

¹⁷ ታ እሻቶ፥ ህንተ ታማርዳ ትምርትያ እፅድ፥ ህንተ ግዶን ሻከተነ መቶ መያ አሳታፐ ናገትተ። ኤንታፈ ሃክተ።

¹⁸ ሄሳ መላ አሳት ባንታዉ ኦሶናፐ አትሽን፥ ኑ ጎዳ ክርስቶሳስ ኦኮና። ባንታ ማልእያ ዶናንነ ሳጶያ ቃላን አይኮ ኤሮና አሳ ዎዛና ባለሶና።

¹⁹ ዎንገላስ ህንተ ኪተትዳይሳ አሳ ኡባይ ስእዳይስ ታና ኡፋይሴስ። ሽን ህንተ ሎኦባ ኤራና መላነ ኢታባፐ ሃካና መላ ታ ኮያይስ።

²⁰ ሳሮተ ፆሳይ ፃላህያ ህንተ ቶሁዋፐ ጋርሳን ጋጭ የጋና። ኑ ጎዳ የሱስ ክርስቶሳ አ ኬሀተይ ህንተራ ግዶ።

²¹ ታራ ኦያ ፅሞትዮስ ህንተና ሳሮ ያጌስ። ሄሳዳካ፥ ታ ዳቦት ሉቅዮስ፥ ያሶንነ ሶስጳፅሮስ ህንተና ሳሮ ያጎሶና።

²² ታኒ፥ ሀ ዳብዳብያ ፃፍዳ፥ ፃርፅዮስ፥ ህንተና ጎዳ ሱንን ሳሮ ያጋይስ።

²³ ታና ሞክዳይነ ዎሳ ኬ ኡባይ እያ ሶን ሺቅያ ጋዮስ፥ ህንተና ሳሮ ያጌስ። ካታማ ሚሽያ ኦይክያ ኤራስፆስነ ኑ እሻ ቃርፆስ ህንተና ሳሮ ያጎሶና።

²⁴ [ኑ ጎዳ የሱስ ክርስቶሳ አ ኬሀተይ ህንተ ኡባራ ግዶ። አምንእ።]

²⁵ ጋላታይ ፆሳስ ግዶ። ታኒ፥ የሱስ ክርስቶሳባ ኦድያ ዎንገላ ቃላነ ዳሮ ዎደፐ ቆሰትድ ጋምእዳ ቱማተን፥ ፆሳይ ህንተና አማኖን ምንድ ኤሳናዉ ዳንዳኤስ።

²⁶ ሽን ሀእ ሄ ቱማይ ቆንጭስ። ካዎተ ኡባይ አማንድ ኪተታና መላ መርና ፆሳ ኪታን ናበት ሄ ቱማባ ፃፍዶሶና።

²⁷ የሱስ ክርስቶሳ ባጋራ ጭንጫተ እያ ፃላላስ ደእያ፥ እስ ፆሳስ መርናዉ ቦንቾይ ግዶ። አምንእ።