Roome 13 - ጌሻ ማፃፋ

ደርያ አይሰይሳታስ ኪተተ

¹ ፆሳ ሸነ ግዶናሽን ማት እመቶና ግሾነ ሀእ ደእያ ሹማትካ ፆሳ ሸነን ሹመትዳ ግሾ አስ ኡባይ ደርያ አይሰይሳታስ ኪተታናዉ በሴስ።

² ሄሳ ግሾ፥ ማታራ ደኤይሳታስ ኪተቶና እፅያ ኦንካ ፆሳ ኪታ እፄስ። ኪተቶና እፅያ ኦንካ ባ ቦላ ፕርዳ ኤሄስ።

³ አይሰይሳት ኢታ ኦይሳታፐ አትሽን፥ ሎኦ ኦይሳታ ያሾኮና። አይሰይሳታስ ያዮና አጋናዉ ኮያይ? ያኮ ሎኦ ኦ፤ ኤንቲ ነና ጋላታና።

⁴ ኤንቲ ነዉ ሎኦባ ኦናዉ ሹመትዳ ፆሳ አይለ። ሽን ኔኒ ኢታባ ኦኮ፥ ኤንቲ ኢታባ ኦዳይሳ ሴርያ ግሾ እያዉ ያያ። ኤንቲ ኢታ ኦይሳታ ሴርድ፥ ፆሳ ሀንቁዋ ቆንጭስያ ፆሳ አይለ።

⁵ ሄሳ ግሾ፥ ፆሳ ሀንቁዋ ፃላላስ ግዶናሽን፥ ህንተ ካሀይ ማርካትያ ግሾ ደርያ አይሰይሳታስ ኪተታናዉ በሴስ።

⁶ ህንተ ጊራ ጊረይካ ሄሳሳ። ደርያ አይሰይሳት ሄ ኦሱዋ ኦይ፥ ኤንቲ ፆሳ አይለታ ግድዳ ግሾሳ።

⁷ እሱዋስ እሱዋስ በሰይሳ እምተ። ጊራ ጊራናዉ በሰይሳስ ጊርተ፤ ቃራፃ ቃንፃናዉ በሰይሳስ ቃራፃ ቃንፅተ፤ ያያናዉ በሰይሳስ ያይተ፤ ቦንቾይ በሰይሳ ቦንችተ።

እሶይ እሱዋራ ዶሰትተ

⁸ እሶይ እሱዋራ ሲቀትተ። ሲቆ አጮፐ አትሽን፥ ህንተ ቦላ ሀራ አጮይ ዶፖ። አሰ ሲቅያ ኦንካ ህገይ ገይሳ ፖልስ።

⁹ “ላሞፋ፤ ዎፓ፤ ካይሶቶፓ፤ አሞቶፋ” ግያ ኪታይነ ሀራ ኪታ ኡባይ፥ “አሰ ነ ሁጰዳ ዶሳ” ግያ ኪታን ቃሸትስ።

¹⁰ አሰ ሲቅያ ኦንካ እያ ቦላ ኢታባ ኦና። ሄሳ ግሾ፥ አሰ ሲቀይስ ህገ ኪታ ፖልስ።

¹¹ ስኮፈ ህንተ ባርክያ ዎደይ ሀእ ግደይሳ አኬክድ ሄሳ ኦተ። ኑ አታና ዎደይ ኮይሮ ኑ አማንዳ ዎድያፐ ሀእ ኑኮ ማትስ።

¹² ማ ዎደይ አናዉ ሀኔስ፤ ዎንታይ ማትስ። ህዛ፥ ኑኒ ማ ኦሶ አግድ ፖኦ ኦላ ሚሸ ኦይኮስ።

¹³ አነ ጋላስ ፖኦን ደእያ አሳዳ ማራን ደኦስ። ማንነ ላይማተራ ጋሄትያ ዱማ ዱማ ቱና ኦሶታን፥ ፓላማንነ ቃናተን ግዶፖ።

¹⁴ ጎዳ የሱስ ክርስቶሳ ካንዱዋ ማእተ፤ ህንተ ናጋራንቾ አሳተይ ባ አሙዋ ፖላና መላ እያዉ ቆፖፍተ።