Roome 12 - ጌሻ ማፃፋ

ደኦ ያርሾ

¹ ህዛ፥ ታ እሻቶ፥ ህንተ፥ ህንተ አሳተ ፆሳ ኡፋይስያ፥ ደኦነ ጌሻ ያርሾ ኦድ፥ እማና መላ ታኒ ህንተና ፆሳ ማሮተን ዎሳይስ። ፆሳ ህንተ ጎይናናዉ በሲያ ቱማ ኦገይ ሄሳ።

² ሎኦ፥ ኡፋይሰይሳነ ፖሎ ግድዳ ፆሳ ሸንያ ህንተ ሻክ ኤራናዉ ህንተ ቆፋን ላመትተፐ አትሽን፥ ሀ አላምያ ዳኖፕተ።

³ ፆሳይ ህንተ እሱዋስ እሱዋስ እምዳ አማኑዋ መላ ዎዛናማ አሳዳ ቆፕተ። ቆፓናዉ በሰይሳፈ አድ ህንተና ዱማይድ፥ ኦቶሮን ቆፖፍተ ጋዳ ታዉ እመትዳ አ ኬሀተን ህንተዉ ኦዳይስ።

⁴ ኑ እስ አሳተ ግዶን ዱማ ዱማ ክፍለት ደኦሶና፤ ሄ ዱማ ዱማ ክፍለታስ ዱማ ዱማ ኦሶይ ደኤስ።

⁵ ሄሳዳ፥ ኑኒ ዳሮ አስ ግድኮካ፥ ክርስቶሳን እስ አሳተ ግድዳ። ኑኒ እስ አሳተ ግድድ ዱማ ዱማ ክፍለት እሶይ እሱዋራ ኦይከትዳ።

⁶ ኑስ እመትዳ አ ኬሀተን ዱማ ዱማ እሞታት ደኦሶና። ኑ እሞይ ትንብት ኦዶ ግድኮ፥ ኑስ ደእያ አማኑዋ መላ ኦዳናዉ በሴስ።

⁷ ኑ እሞይ ሀራታ ማደ ግድኮ፥ ሄ ኦሱዋን ምናናዉ በሴስ፤ ታማርሶ ግድኮ፥ ሄ ታማርሱዋን ምናናዉ በሴስ።

⁸ ኑ እሞይ ሀራታ ምን ግድኮ፥ ምንድ ምንናዉ በሴስ። ኑ እሞይ ኑስ ደእያባፐ ሀራታስ እሞ ግድኮ፥ ዎዛናፐ እማናዉ በሴስ። ኑ እሞይ አይሶ ግድኮ፥ ምንድ አይሳናዉ በሴስ። ኑ እሞይ ሀራታስ ኬሆ ግድኮ፥ ኡፋይሳን ኬሀናዉ በሴስ።

⁹ ህንተ ሲቆይ ቆፐ ቆሞን ግዳናዉ በሰና። ኢታባ እፅተ፤ ሎኦባ ምንድ ኦይክተ።

¹⁰ እሶይ እሱዋራ እሻዳ ሲቀትተ፤ እሶይ እሱዋ ቦንችተ።

¹¹ አዛሎፍተ፤ ህንተ አያናን ምንድ፥ ጎዳስ ኦተ።

¹² ፆሳይ እምዳ ኡፋይሳን ኡፋይትተ፤ መቱዋ ዳንዳእተ፤ ኡባ ዎደ ፆሳ ዎስተ።

¹³ አማንያ ጌሻታ ኮሽያባን ማድተ፤ እማታ ሞክተ።

¹⁴ ህንተና ጎደይሳታ አንጅተ፤ አንጅተፐ አትሽን፥ ባዶፍተ።

¹⁵ ኡፋይተይሳታራ ኡፋይትተ፤ ዬከይሳታራ ዬክተ።

¹⁶ እሶይ እሱዋራ እስ ቆፋን ደእተ። ኦቶሮ ቆፋ አግድ፥ ህንተና ካዉሽድ፥ ካዉሻ ኦሶ ኦተ። ህንተ ህንተና ጭንጫ ግድ ቆፖፍተ።

¹⁷ ኦንካ ህንተዉ ኢታባ ኦኮ፥ ሄ ኡራስ ኢታ ዛሮፕተ። አሳ ኡባ ስንን ናሽስያ ሎኦ ኦሶ ኦተ።

¹⁸ አሳ ኡባራ ሳሮን ዳናዉ ህንተዉ ዳንዳኤትያ ኡባ ኦተ።

¹⁹ ታ እሻቶ፥ ህንተ፥ ህንተ ሁጰን አሳስ ሀሎ ከዮፕተ። ፆሳይ ሀሎ ከሳና መላ እያዉ አጋግተ። ጌሻ ማፃፋን፥ “ታኒ ሀሎ ከሳና፤ ታኒ ኩሸ ዛራና” ያጌስ ጎዳይ፥ ጌተትድ ፃፈትስ።

²⁰ ሽን ጌሻ ማፃፋን፥ “ነ ሞርከይ ኮሻትኮ ሙዛ፤ እ ሳሞትኮ ኡሻ። ኔኒ ሄሳ ኦኮ እያ ሁጰን ዬላ ታማ ቦንቆ ቆላሳ” ጌተትድ ፃፈትስ።

²¹ ኢታ ሎኦን ፆናፐ አትሽን፥ ኢታን ፆነቶፋ።