Roome 11 - ጌሻ ማፃፋ

ፆሲ እስራኤለታ አግቤና

¹ አነ ታ ኦይቻይስ፦ ያትን፥ ፆሳይ ባ አሳ አግደዬ? አግቤና! ታኒ ታ ሁጰን እስራኤለ፤ አብራሃመ ሼሽ፤ ብንያመ ኮቸ።

² ፆሳይ ኮይሮ ዶርዳ ባ አሳታ የገና። ጌሻ ማፃፋን፥ ኤልያስ እስራኤለታ ፆሳ ስንን ዋት ሞትዳኮ፥ ህንተ ኤረከቲ?

³ ኤልያስ፥ “ጎዳዉ፥ ኤንቲ ነ ናበታ ዎዶሶና፥ ነ ያርሾ በሳካ ላልዶሶና። ታ ታርካ አታስ፤ ኤንቲ ታናካ ዎናዉ ኮዮሶና” ያግስ።

⁴ ፆሳይ እያዉ ዎይግድ ዛርዴ? “ባኣለ ጌተትያ ኤቃስ ጎይንቦና ላፑን ሙኩሉ አሳ ታዉ አሻስ” ያግስ።

⁵ ሄሳዳካ፥ ሀ ዎድያን ፆሳይ ባ አ ኬሀተን ዶርዳ ጉ እስራኤለት ደኦሶና።

⁶ እ ኤንታ ዶርዳይ ባ አ ኬሀተናፐ አትሽን፥ ኤንታ ኦሶን ግደና። ዶሮይ ኦሶን ግድኮ፥ እያ አ ኬሀተይ ቱማ አ ኬሀተ ግደና።

⁷ ያትን፥ ዋንዴ? እስራኤለት ባንታ ኮያባ ደምቦኮና፥ ሽን ፆሳይ ዶርዳ ጉት ደምዶሶና። አትዳይሳት ባንታ ዎዛና ሙምስዶሶና።

⁸ ሄስካ፥ ጌሻ ማፃፋን፥ “ኤንቲ ባንታ አይፍያን በኦናዳ ባንታ ሀይን ስኦናዳ፥ ሀኖ ጋካናዉ ኤንታዉ ፆሳይ አዛላ አያና እሚስ” ጌተትድ ፃፈትዳይሳዳ ሀንስ።

⁹ ቃስ ዳዊቲ፥ “ኤንቲ ምያ ጋይታይ ኤንታ ፅሄዳ ኦይኮ፤ ኤንታ ጉፋንያ አፎ ግዶ፤ ኤንታ ኢታተይ ኤንታ ቦላ ጋኮ።

¹⁰ ኤንቲ ፄሎናዳ ኤንታ አይፈይ ጎዘቶ፤ ኡባ ዎደ መቶን ኤንቲ ኩንድ ደኦ” ያግስ።

¹¹ ያትን፥ አይሁደት ዛር ደንዶና መላ ኩንድዶናዬ? ግደና! ኤንታ ኩንደይ አይሁደ ግዶና አሳይ አታና መላ ጋሶ ግድስ። ሄስካ አይሁደት ኤንታ ቦላ ቃናታናዳ ኦስ።

¹² አይሁደታ ናጋራይ አላምያስ ዳሮ አንጆ ኤህስ፤ ቃስ ኤንታ ኩንደይ አይሁደ ግዶና አሳስ ዳሮ አንጆ ግድስ። ያትን፥ ዶረትዳ አይሁደት ኩመ አትያ ዎደ አንጆይ አይ መላ ዳራንዴሻ!

¹³ ታኒ፥ ሀእ ህንተዉ አይሁደ ግዶና አሳስ ኦዳይስ። አይሁደ ግዶና አሳስ ሀዋረ ግዳዳ ኦይሳን ታኒ ዳሮ ጬቀታይስ።

¹⁴ ታ ሄሳ ኦዳይ ታዉ አሾን ኮቸ ግድዳ እስራኤለታ ቂሮያዳ ኤንታፈ ጉታ አሻናሳ።

¹⁵ ፆሳይ ኤንታ የግዳ ዎደ፥ ሀ አላመይ ፆሳራ ስገትስ። ፆሳይ ኤንታ ሺሽ ኤክያ ዎደ ሀይቅዳ አስ ሀይቆፐ ደንድዳ መላ ግዴስ።

¹⁶ ኮይሮ መንዳ ባሶ ኡይይ ፆሳስ ያርሸትድ ጌሽ ግድኮ፥ ሙመ ኡይይካ ጌሽ። ምስ ፃጶይ ጌሽ ግድኮ፥ ታሸይካ ጌሽ።

¹⁷ ጋደን ቶክዳ ሻማሆ ታሸ ግድዳ አይሁደት ካረትን፥ ህንተ ባዞን ዶልዳ ሻማሆ ታሸ ግድዳ አይሁደ ግዶናይሳት ኤንታ በሳን ንትድ ኤንታ አንጁዋነ ዱረተ ሻከትደታ።

¹⁸ ህዛ፥ ህንተ ታሸዳ ካረትድ ዎዳ አይሁደታ ቦላ ኦቶርቶፍተ። ህንተ ኦቶርትያባ ግድኮ፥ ፃጶይ ህንተና ቶከስፐ አትሽን፥ ህንተ ፃጱዋ ቶኮናይሳ አኬክተ።

¹⁹ ኔኒ፥ “ሄ ታሸት ካረትዳይ፥ ታ ኤንታ በሳን ንታና መላሳ” ጋናዉ ዳንዳኣሳ።

²⁰ ሄስ ቱማ። ኤንቲ አማንቦና ግሾ ካረትዶሶና። ኔኒ አማንዳ ግሾ ሄ በሳን ኤቃዳሳ። ኔኒ ያያናዉ በሴስፐ አትሽን፥ ኦቶራናዉ በሰና።

²¹ ፆሳይ መን ታሸ ግድዳ አይሁደታስ ቃቶና እፅኮ ህንተዉካ ቃተና።

²² ህዛ፥ ፆሳይ አይ መላ ኬሄኮነ አይ መላ ያሽያኮ በአ። እ ያሸይ ኪተቶናይሳታ፥ ቃስ እ ኬሄይ እያ አማንድ ምንድ ኤቅዳይሳታሳ። ምንድ ኤቆና እፅኮ ህንተካ ካረታና።

²³ አይሁደት አማንኮ፥ ካሰ ኤንቲ ደእያ በሳ ስማና። ፆሳይ ኤንታ ዛሪድ፥ ዎናዉ ዳንዳኤስ።

²⁴ ህንተና ባዞን ደእያ ሻማሆ ግድዳ አይሁደ ግዶናይሳታ ቃንፅድ፥ ጋደን ቶከትዳ ሻማሁዋ ቦላ ህንተና ቶክኮ፥ መን ጋደ ሻማሆ ግድዳ አይሁደታ ባንታ ኮይሮ በሳን ዛር ቶካናዉ ዋንድ ዳንዳኤተኔ?

ፆሳ ማሮተ ኡባሳ

²⁵ ታ እሻቶ፥ ህንተ ህንተና ኤራንቾ ግድ ጬቀቶፍተ። ታ ህንተዉ ኦድያ እስ ፁር ደኤስ። ሄስካ እስራኤለታፐ ባጋይ ስኦና እፅዳይ ዉርሰ ጋካናዉ ግዶናሽን፥ አታናዉ ደእያ አይሁደ ግዶና አሳይ ኩመ ፆሳኮ ያና ጋካናሳ።

²⁶ ሄሳዳካ፥ እስራኤለ አሳ ኡባይ አታና። ጌሻ ማፃፋን፥ “ኑና አሸይስ ፅዮነፐ ያና፤ ያይቆባ ኮቻፈ ኢታ ኡባ ድጋና።

²⁷ ታኒ ኤንታ ናጋራ አቶ ግያ ዎደ ኤንታራ ጫቃና ጫቆይ ሀይሳ” ጌተትድ ፃፈትስ።

²⁸ አይሁደት ዎንገላ ኤኮና እፅድ፥ ህንተ ግሾ ፆሳራ ሞርከ ግድዶሶና። ግዶሽን፥ ሀእካ ኤንቲ ዶረትዳይሳታ፥ ፆሳይ ኤንታ አዋታ ግሾ ኤንታ ዶሴስ።

²⁹ ፆሳይ ባ እሙዋንነ ባ ፄሳን ቂሮተና።

³⁰ ህንተ አይሁደ ግዶናይሳት ካሰ ፆሳስ ኪተትበከታ። ሽን ሀእ አይሁደት ኪተቶና እፅን፥ ህንተ ፆሳ ማሮተ ኤክደታ።

³¹ ሄሳዳካ፥ ህንተ ኤክዳ ማሮተ አይሁደት ኤካና መላ ሀእ ፆሳስ ኪተቶና እፅዶሶና።

³² ፆሳይ አሳ ኡባ ባ ማሮተ በሳናዉ ኮይድ፥ አስ ኡባይ ኪተቶና እፃና መላ ኦስ።

³³ ፆሳ ዱረተ፥ ጭንጫተነ ኤራተ አኬክድ ኦዳናይ ኦኔ? እያ ፕርዳይ ፕልገተና፥ እያ ኦገይ ኤረተና።

³⁴ ጌሻ ማፃፋን፥ “ጎዳ ቆፋ ኤረይ ኦኔ? እያ ዞራናዉ ዳንዳኤይ ኦኔ?

³⁵ ፆሳስ ታልኤይነ ታልእያ ዛሪድ ኤከይ ኦኔ?” ያጌስ።

³⁶ ኡባ እ መስ፤ ኡባይ እያን ደኤስ፤ ኡባይ እያ ቦንቾሳ። ፆሳስ መርናዉ ቦንቾይ ግዶ። አምንእ።