Roome 10 - ጌሻ ማፃፋ

¹ ታ እሻቶ፥ ታ ኩመ ዎዛናን ታ አሞተይነ ፆሰ ዎሰይ እስራኤለይ አታና መላሳ።

² ኤንቲ ፆሳስ ምሸቶሶናሽን፥ ቱማ ኤራተን ምሸቶናይሳ ታ ማርካታይስ።

³ ኤንቲ ፆሳ ፅሎተ ኦግያ ኤሮና እፅድ፥ ባንታ ሁጰ ፅሎተ ካልዶሶናፐ አትሽን፥ ፆሳ ፅሎተ ኮይቦኮና።

⁴ አስ ኡባይ አማኖን ፅላና መላ ክርስቶስ ህግያ ፖልስ።

አቶተ ኡባሳ

⁵ አስ ህገ ናግድ ኤክያ ፅሎተባ ሙሰይ ፃፍሸ፥ “ህገ ናግያ ኦንካ ሄ ህግያ ናግዳ መላ ደኤስ” ያግስ።

⁶ ሽን አማኖን ኤክያ ፅሎተባ ጌተትዳይ ሀይሳ፦ “ነ ዎዛናን፥ ‘ኦን ሳሎ ከያኔ?’ ያጎፓ፤ ሄስ ክርስቶሳ ዎሳናሳ።

⁷ ዎይኮ፥ ‘ዱገ ሳአ ጋርስ ዎናይ ኦኔ?’ ጎፓ፤ ሄስ ክርስቶሳ ዱፎፐ ከሳናሳ።

⁸ ሽን ያግድ ፃፈትስ፦ ‘ፆሳ ቃላይ ነ ማታና፤ ነ ዶናንነ ነ ዎዛናን ደኤስ’ ኑኒ ህንተዉ ኦድያ አማኖ ቃላይ ሀይሳ።

⁹ “የሱሲ ጎዳ” ጋዳ ነ ዶናን ማርካትኮነ ፆሳይ እያ ሀይቆፐ ደንዳይሳ ነ ዎዛናን አማንኮ፥ ነ አታና።

¹⁰ አስ ባ ዎዛናን አማንድ ፅሌስ፤ ባ ዶናን ማርካትድ አቴስ።

¹¹ ጌሻ ማፃፋይ፥ “እያን አማንያ ኦንካ ዬላተና” ያጌስ።

¹² እስ ፆሳይ ኡባ ጎዳ ግድያ ግሾ፥ አይሁደታ ግዶንነ አይሁደ ግዶና አሳ ግዶን ዱማተ ባዋ። እ ባና ፄግያ ኡባስ ዳሮ ኬሀ።

¹³ ጌሻ ማፃፋይ፥ “ጎዳ ሱን ፄግያ ኦንካ አታና” ያጌስ።

¹⁴ ያትን፥ ኤንቲ አማኖና ደእሸ ዋንድ እያ ፄጋናዉ ዳንዳኦና? ኤንቲ እያባ ስኦና ደእሸ ዋትድ እያ አማናናዉ ዳንዳኦና? ቃስ ኤንታዉ ቃላ ኦድያ አስ ባይና ደእሽን፥ ዋንድ ስአናዉ ዳንዳኦና?

¹⁵ ኪተትዳ አስ ባይና ደእሽን፥ ቃላይ ዋንድ ኦደታናዉ ዳንዳኢ? ጌሻ ማፃፋን፥ “ኡፋይሳ ዎንገላ ኦድያ አሳ ቶሆት ዋንድ ሎኦና!” ያግድ ፃፈትስ።

¹⁶ ሽን እሳያስ፥ “ጎዳዉ፥ ኑ ማርካተ ኦን አማንዴ?” ያግዳይሳዳ፥ ኡባይ ዎንገላ አማንቦኮና።

¹⁷ ሄሳ ግሾ፥ አማኖይ ስሳፈ ዬስ፤ ስስ ክርስቶሳ ቃላፐ ዬስ።

¹⁸ ግዶሽን፥ እስራኤለ አሳይ ቃላ ስእቦኮና ጉሰዬ? አካይ፥ ስእዶሶና። ጌሻ ማፃፋን፥ “ኤንታ ቃላይ ቢታ ኡባን ስኤትስ፥ ኤንታ ኦዳይ ሳኣ ጋፃ ጋክስ” ያገትስ።

¹⁹ ሽን እስራኤለ አሳይ ኤርቦኮና ጉሰዬ? ሙሰይ ካሰ፥ “ታኒ ህንተና ለቀትዳ አሳን ቂሮይሳና፤ ቃስ ኤያ አሳን ህንተና ይሎያና” ያግስ።

²⁰ ቃስ እሳያስ፥ “ታና ኮይቦና አሳስ በንታስ፤ ታና ኦይችቦና አሳስ ቆንጫስ” ያግድ ያዮና ኦድስ።

²¹ ሽን እሳያስ እስራኤለታባ ኦድሸ፥ “ኡባ ጋላስ ኪተቶና አሳስነ ታና እፅያ አሳስ ታ ኩሽያ ምጫስ” ያጌስ።