Roome 1 - ጌሻ ማፃፋ

¹ የሱስ ክርስቶሳ አይለ ግድዳ፥ ሀዋረ ግዳና መላ ፄገትዳይሳፈነ ፆሳ ዎንገላ ሳባካና መላ ዶረትዳ ጳዉሎስ ኪትዳ ኪታ።

² ፆሳይ ዳሮ ዎደፐ ስን ባ ናበታ ባጋራ እማና ያግዳ ፆሳ ዎንገላይ ጌሻ ማፃፋታን ፃፈትስ።

³ ሄ ዎንገላይ አሾን ዳዊታ ሼሻፐ የለትዳ፥ ፆሳ ናኣ፥ ኑ ጎዳ የሱስ ክርስቶሳባ።

⁴ ቃስ እ ባ ጌሻ አያናን ሀይቆፐ ደንድድ፥ ፆሳ ናኣ ግደይሳ ግታ ዎልቃን በስስ።

⁵ እያ ባጋራ አይሁደ ግዶና አሳ ኡባይ፥ አማንድ ኪተታና መላ ክርስቶሳ ሱን ግሾ፥ ፆሳይ አ ኬሀተነ ሀዋረተ ማታ ኑስ እሚስ።

⁶ የሱስ ክርስቶሳስ ግዳና መላ ፄገትዳ አሳታፐ ባጋት ህንተና።

⁷ ሮመን ደእያ፥ ፆሳይ ሲቀይሳታስነ እያ ጌሻ ደረ ግዳና መላ ዶርዳይሳታስ። ፆሳ ኑ አዋፐነ ጎዳ የሱስ ክርስቶሳፐ አ ኬሀተይነ ሳሮተይ ህንተዉ ግዶ።

ጋላታ ዎሳ

⁸ ኡባፈ ኮይሮታዳ፥ ህንተ አማኖይ ቢታ ኡባን ስኤትዳ ግሾ፥ የሱስ ክርስቶሳ ባጋራ ህንተ ግሾ ታ ፆሳ ጋላታይስ።

⁹ ታኒ እያ ናኣ ዎንገላባ ኩመ ዎዛናን ኦድያ ፆሳይ፥ ታኒ ታ ዎሳን ኡባ ዎደ ህንተና ቆፐይሳስ እ ማርካ።

¹⁰ ዉርሰን፥ ፆሳ ሸነ ግድኮ፥ ታኒ ህንተኮ ባናዉ ኦገይ ታዉ እንጀታና መላ ኡባ ዎደ ዎሳይስ።

¹¹ ታኒ ህንተዉ አያና እሙዋ ሻካናዉነ ህንተና በአናዉ ላሞታይስ።

¹² ሄስካ፥ ታኒ ህንተ አማኑዋን፥ ቃስ ህንተ ታ አማኑዋን ምነታና መላሳ።

¹³ ታ እሻቶ፥ ታኒ አይሁደ ግዶና አሳፐ አይፈ ደምዳይሳዳ፥ ህንተፈካ አይፈ ደማናዉ ህንተኮ ባናዉ ቆፓስ፥ ሽን ድገታስ።

¹⁴ ታማርዳ አሳስነ ታማርቦና አሳስ ቃስ ጭንጫታስነ ኤያታስ ታዉ አጮይ ደኤስ።

¹⁵ ሄሳ ግሾ፥ ሮመን ደእያ ህንተዉካ ዎንገላ ኦዳናዉ አሞታይስ።

ዎንገል ፆሳ ዎልቃ

¹⁶ እያ አማንያ ኡባ፥ ኮይሮትድ አይሁደታ፥ ካልድ አይሁደ ግዶናይሳታ አሻናዉ ዎንገላይ ፆሳ ዎልቃ ግድያ ግሾ፥ ታ ዎንገላን ዬላትከ።

¹⁷ ፅሎይ አማኖን ደኦን ዳና ጌተትድ ጌሻ ማፃፋን ፃፈትስ። ዎንገላን ፆሳ ፅሎተይ ቆንጭስ፤ ኮይሮፐ ዉርሰ ጋካናዉ፥ አሳይ ፅለይ አማኖና።

አሳ ኢታተ

¹⁸ ቱማይ ኤረቶና መላ ባንታ ኢታ ኦሶን ካምያ አሳ ቦላነ ናጋራ ኡባ ቦላ፥ ፆሳ ሀንቆይ ሳሎፐ ዎስ።

¹⁹ ፆሳይ ኤንታዉ ቆንጫናዉ በሲያባ ቆንጭስዳ ግሾ፥ ኤንቲ ፆሳባ ኤሮሶና።

²⁰ አላመይ መቶሳፐ ዶምድ፥ አሳስ በንቶና ፆሳ ካንዶይ፥ ሄስካ እያ መርና ዎልቃይነ ፆሳተይ እያ መተን ቆንጭድ ደእያ ግሾ፥ አሳይ ባንታ ኢታተስ ጋሶያባይ ባዋ።

²¹ ኤንቲ ፆሳ ኤርሸ፥ እያ ቦንችቦኮናነ ጋላትቦኮና። ኤንታ ቆፋይ ማዶናባ ግድስ፤ ኤንታ አኬኮና ዎዛናይ ምስ።

²² ኤንቲ ባንታና ጭንጫታ ጎሶና፥ ሽን ኤያታ።

²³ ኤንቲ ሀይቆና ፆሳ ጎይናናይሳ አግድ፥ ሀይቅያ አሳ መን፥ ካፎታ መን፥ ዶአታ መንነ ኡሎራ ጎሸትያባታ ዳንስድ ኦዳ ምስለታ ጎይንዶሶና።

²⁴ ሄሳ ግሾ፥ ኤንቲ እሶይ እሱዋራ ቦርሶባ ኦድ፥ ባንታ አሳተ ካዉሻና መላ ፆሳይ ኤንታ ዎዛናይ አሞትያ ቱና ኦሶስ ኤንታ የግ አግስ።

²⁵ ሄስ ሀንዳይ ኤንቲ ፆሳ ቱማ ዎርዶን ላምዳ ግሾነ መዳ ፆሳ አግድ፥ መተ ጎይንዳ ግሾሳ። ፆሳይ መርናዉ ጋላተትዳይሳ። አምንእ።

²⁶ ሄሳ ግሾ፥ ፆሳይ ኤንታና ኤንታ ቦርሶ አሙዋስ የግ አግስ። ኤንታ ማጫሳይ ባንታዉ በሲያ አደራ ጋሄተ አግድ፥ በሶናባ ሀንድ ማጫስ ማጫሳራ ጋሄትዶሶና።

²⁷ ሄሳዳካ፥ አደት ባንታዉ በሲያ ማጫሳራ ጋሄተ አግድ፥ አደይ አደራ ጋሄትዶሶና። አደት እሶይ እሱዋራ አሞን ፁገትድ፥ ቦርሶባ ኦዶሶና። ባንታ ኦዳ ናጋራስ በሲያ ፕርዳ ኤክዶሶና።

²⁸ ኤንቲ ፆሳ ኤርሸ፥ ሀር አቶሽን እያባ ቆፓናዉ ኮዮና እፅዳ ግሾ፥ በሶናባ ኦና መላ ፆሳይ ኤንታና ፓና ቆፋስ አድ እሚስ።

²⁹ ኤንታን ጌላተ፥ ኢታተ፥ ዪቀይ፥ ገነይ፥ ቃናተይ፥ ሸምፖ ዎይ፥ ፓላም፥ ጭሞይነ ኢታ አሞይ ኩምስ። ኤንቲ ዝግረይሳታ፥

³⁰ አሳ ሱን ኢሰይሳታ፥ ፆሳ እፀይሳታ፥ ጫየይሳታ፥ ኦቶረይሳታ፥ ጬቀተይሳታ፥ ኢታባ ኦናዉ ኮየይሳታነ ባንታ አየስነ አዋስ ኪተቶናይሳታ፥

³¹ አኬኮናይሳታ፥ ጫቆ መንይሳታ፥ ሲቆይ ባይናይሳታ፥ ቃይ ባይናይሳታ።

³² ሀይሳታ መላ ኦይሳታስ ሀይቆይ በሴስ ግያ ፆሳ ህግያ ኤርሸ፥ ሀይሳታ ኦሶና። ኤንቲ ባንታዉ ኦሶ ፃላላ ግዶናሽን፥ ኦያ ሀራታካ ናሾሶና።