ዮሃኒሳ ቆንጬ 5 - ጌሻ ማፃፋ

ዶርሳነ ፃ ማፃፋ

¹ ሄሳፈ ጉየ፥ አራታ ቦላ ኡትዳይሳ ኡሻቻ ኩሸን ግዶራነ ካረራ ፃፈትዳ ላፑን ማታመን ጎርደትዳ ፃ ማፃፋ በአስ።

² እስ ምኖ ኪታንቾይ ባ ቃላ ቁ ኦድ፥ “ማታምያ ብላናዉነ ማፃፋ ዶያናዉ በሰይ ኦኔ?” ያግድ አዋጅሽን በአስ።

³ ሽን ሳሎን ግድን ሳአን ዎይኮ ሳአፐ ጋርሳን ግድን ሄ ፃ ማፃፋ ብላናዉነ ግዱዋ በአናዉ ዳንዳኤይ ኦንካ በንትቤና።

⁴ ፃ ማፃፋ ብላናዉነ እያ ግዱዋ በአናዉ በሲያ አስ ይዳ ግሾ ታ ዳሮ ዬካስ።

⁵ ያትን፥ ጭማታፐ እሶይ ታኮ፥ “ዬኮፋ! ሄኮ፥ ይሁዳ ኮቸ ግድያ ጋሞይ፥ ዳዊታ ሼሻይ፥ ላፑን ማታመታ ብላናዉነ ማፃፋ ዶያናዉ ዳንዳእስ” ያግስ።

⁶ ሄሳፈ ጉየ፥ ሹከትዳ ዶርሳይ አራታስ፥ ኦይዱ ደኦን ደእያ መተታስነ ጭማታስ ግዶን፥ ኤቅዳይሳ በአስ። እያዉ ላፑን ካጨትነ ላፑን አይፈት ደኦሶና። ሄሳት ሳአ ኡባ ኪተትዳ ፆሳ ላፑን አያናታ።

⁷ ሄ ዶርሳይ ብድ፥ አራታ ቦላ ኡትዳይሳ ኡሻቻ ኩሸፐ ፃ ማፃፋ ኤክስ።

⁸ እ ሄ ፃ ማፃፋ ኤክዳ ዎደ፥ ደኦን ደእያ ኦይዱ መተትነ ላታማነ ኦይዱ ጭማት ዶርሳ ስንን ኩንድዶሶና። ኤንቲ እሶይ እሶይ ዲነ ጌሻታ ዎሳ ግድዳ እፃነይ ኩምዳ ዎርቃ ሻተ ኦይክዶሶና።

⁹ ኤንቲ፥ “ፃ ማፃፋ ኤካናዉ፥ ማታመታ ብላናዉ ነዉ በሴስ። አይስ ጊኮ፥ ኔኒ ሹከታዳሳ፤ ኮቸ ኡባፈ፥ ዱማ ዱማ ዶናፐ፥ ያራታፐነ ካዎተታ ኡባፈ ነ ሱን ፆሳስ ዎዛዳሳ።

¹⁰ ኤንቲ እያ ፆሳ አዋስ ኦና መላ ኤንታና ካህነ ካዎተ ኦዳሳ። ኤንትካ ቢታ ኡባ ሃራና” ያግድ ኦራ ማዝሙረ የፅዶሶና።

¹¹ ታ በእያ ዎደ ሙኩሉ ቶሆ ሙኩሉነ ታሙ ሙኩሉ ቶሆ ታሙ ሙኩሉ ግድያ ኪታንቾታ ግርሳ ስአስ። ኤንትካ አራታ፥ ኦይዱ ደኦን ደእያ መተታነ፥ ጭማታ ዩሹዋን ኤቅዶሶና።

¹² ሄ ኪታንቾት ቁ ግዳ ቃላን፥ “ሹከትዳ ዶርሳይ ዎልቃ፥ ዱረተ፥ ጭንጫተነ ምኖተ፥ ቦንቾ፥ ሳባነ ጋላታ ኤካናዉ በሴስ” ያግዶሶና።

¹³ ሄሳፈ ጉየ፥ ሳአን፥ ሳሎን፥ ሳአፐ ጋርሳንነ አባ ግዶን ደእያ መተ ኡባይ፥ “አራታ ቦላ ኡትዳይሳስነ ዶርሳስ፥ ጋላታይ፥ ቦንቾይ፥ ሳብነ ዎልቅ፥ መር መርናዉ ግዶ” ያግድ የፅሽን ስአስ።

¹⁴ ኦይዱ ደኦን ደእያ መተት፥ “አምንእ” ያግዶሶና፤ ቃስ ጭማት ጉፋንድ ጎይንዶሶና።