Qolaasiyasa 4 - ጌሻ ማፃፋ

¹ ጎዳቶ፥ ህንተዉካ ቃስ ሳሎን ጎዳይ ደኤይሳ ኤርድ፥ ህንተ አይለታስ ፅሎተንነ እሱዋ እሱዋፈ ሻኮና ኮሽያባ ኦተ።

² ፆሳ ባርክድ ጋላትሸ ቃንፆና ዎስተ።

³ ፆሳይ ባ ቃላስ ፐንገ ዶያና መላነ ታኒ ሄሳ ጋሶን ቃሾን ደእያ ክርስቶሳ ፁራ አዋጃና መላ ኑስካ ዎስተ።

⁴ ቃስ ታካ በሰይሳዳ ቃላ ቆንጭሳዳ ኦዳና መላ ታዉ ፆሳ ዎስተ።

⁵ እንጀትያ ዎደ ኡባ ጎኤትሸ አማኖና አሳ ማታን ጭንጫተን ደእተ።

⁶ ህንተ አሳ ኡባስ ኮሽያ ዛሮ እሞ ኤራና መላ ህንተ ኦዳይ ኡባ ዎደ አ ኬሀተን ኩምዳይሳነ ማፅነዳ ማልእያባ ግዳናዉ በሴስ።

ሳሮ

⁷ ኑ ሲቆ እሻይ ትክቆስ፥ ታራ እስፈ ጎዳ ኦሱዋን አይለ ግድዳ፥ አማነትያ ኦሳንቾይ፥ ታ ደኡዋባ ህንተዉ ኦዳና።

⁸ ታኒ እያ ህንተኮ ኪትዳይ፥ ኑ ዋንድ ደእያኮ ህንተዉ ኦድድ ህንተና ምንና መላሳ።

⁹ አናስሞስ፥ አማነትያ ሲቆ እሻይ፥ ህንተ ባጋይ፥ እያራ ህንተኮ ቤስ። ኤንቲ ሀይሳን ሀንያባ ኡባ ህንተዉ ኦዳና።

¹⁰ ታራ ቃሸትዳ አርስፅሮኮስነ ባርናባሳ እሻ ናአይ ማርቆስ፥ ህንተና ሳሮ ያጎሶና። ታ ህንተዉ ካሰ ኦድዳይሳዳ ማርቆስ ህንተኮ ቢኮ እያ ሞክተ።

¹¹ የሱሳ ጌተትያ ያስፆስ ህንተና ሳሮ ሳሮ ያጌስ። ፆሳ ካዎተ ግሾ ታራ ኦያ አሳታ ግዶፈ አይሁደ ግድዳይሳት ሀ ሄታ፤ ኤንቲ ታና ዳሮ ምንዶሶና።

¹² ህንተ ባጋይ፥ ክርስቶስ የሱሳ አይለይ፥ ኤጳፍር ህንተና ሳሮ ሳሮ ያጌስ። እ ህንተ ፆሳ ስንን ምንድ ኤቃናዳነ ፆሳ ሸንያ ኤርድ ፖላና መላ ኡባ ዎደ ፆሳ ህንተ ግሾ ዎሴስ።

¹³ እ ህንተ ግሾነ ሎዶቀንነ ህራፖልሳ ካታማን ደእያ አሳ ግሾ ዳሮ ዳቡርዳይሳ ታ ማርካታይስ።

¹⁴ ኑ ሲቆ እሻይ ዶቶረይ ሉቃስነ ዴማስ፥ ህንተና ሳሮ ሳሮ ያጎሶና።

¹⁵ ሎዶቀን ደእያ ኑ እሻታስ፥ ንምፋስነ እ ኬን ሺቅያ አሳስ ኑ ሳሮዋ ኦድተ።

¹⁶ ሀ ዳብዳብያ ህንተ ናባብዳፐ ጉየ፥ ሎዶቀ ዎሳ ኬን ናባብስተ። ህንተካ ሎዶቀ ዎሳ ኬይ ህንተዉ የድያ ዳብዳብያ ናባብተ።

¹⁷ ቃስ አርክጳሳ፥ “ጎዳይ ነዉ እምዳ ኦሱዋ ፖላናይሳ ዶጎፓ” ያግድ ቆፍስተ።

¹⁸ ታኒ፥ ጳዉሎስ፥ ሀ ሳሮዋ ታ ኩሸን ፃፋስ። ታ ቃሹዋ ቆፕተ። ፆሳ አ ኬሀተይ ህንተራ ግዶ።