Qolaasiyasa 2 - ጌሻ ማፃፋ

¹ ታ ህንተዉነ ሎዶቀ ካታማን ደእያ አሳስ፥ ሄሳዳካ ታና አይፈን በእቦና አሳ ኡባስ አይ መላ ባፀትያኮ ህንተ ኤራና መላ ኮያይስ።

² ታ ባፀትያ ጋሶይካ ኤንቲ ባንታ ዎዛናን ምንድ፥ ሲቆን ቃሸትድ፥ ፖሎ ግድዳ ኩመ አኬካ ዱረተ ደምድ ፆሳ ፁራ ክርስቶሳ ኤራና መላሳ።

³ እያን ፆሳይ ምንጅዳ ኤራይነ ጭንጫተ ኡባይ ደኤስ።

⁴ ታ ሄሳ ኦንካ ህንተና ጭሞ ቃላን ባለና መላ ኮያዳ ጋይስ።

⁵ ታ ህንተፈ ሃካዳ ደእኮካ አያናን ህንተራ ደአይስ። ህንተ ዱሳ ማራነ ክርስቶሳ ህንተ ምንድ አማነይሳ በአዳ ኡፋይታይስ።

ክርስቶሳን ኩመ ደኦ

⁶ ህንተ ጎዳ ክርስቶስ የሱሳ ኤክዳይሳዳ እያን ደእተ።

⁷ እያን ፃጶ የድተ፤ እያን ኬፀትተ። ህንተ ታማርዳይሳዳ አማኖን ምንተ፤ ፆሳስ ኩምድ ፓላህዳ ጋላታ እምተ።

⁸ ክርስቶሳፐ ግዶናሽን፥ አሳ ዎጋንነ ሀ አላምያ ጮ ዎጋን ካትዳ ትምርተንነ አሳፐ ይዳ ኤራተን ኦንካ ህንተና ጭም ባለድ ድኦና መላ ናገትተ።

⁹ ፆሳ ፆሳተይ ክርስቶሳ አሳተን ኩመ ደኤስ።

¹⁰ ህንተካ ማታስነ ዎልቃ ኡባስ ሁጰ ግድያ ክርስቶሳን ኩምደታ።

¹¹ ህንተ ክርስቶሳ አማንድ ቃፃረትደታ። ሄስካ አሳ ኩሸን ግዶናሽን፥ ህንተና ኢታ ሀኖተፈ ድግያ ክርስቶሳን ኦሰትዳ ቃፃረተ።

¹² ህንተ ፃማቀትዳ ዎደ ክርስቶሳራ እስፈ ሞገትድ፥ ክርስቶሳ ሀይቆፐ ደንዳ ፆሳ ዎልቃ አማንድ፥ ክርስቶሳራ እስፈ ደንድደታ።

¹³ ህንተ፥ ህንተ ናጋራ ግሾነ ህንተ ጬጋ አሳተ ቃፃረቶና ግሾ ሀይቅድ ደእሽን፥ ፆሳይ ህንተ ናጋራ አቶ ግስ። ክርስቶሳራ ህንተዉ ደኦ እሚስ።

¹⁴ እ ኑና ሞትያነ ኑራ ኤቀትያ፥ ኑ ቦላ ፃፈትዳ አጩዋ ዳክድ ማስቃልያ ቦላ ሽድ ኦገፐ ድግስ።

¹⁵ ክርስቶስ ዎልቃታነ ማታታ ማስቃልያን ፆንድ፥ ኤንታ ኦላ ዳንጩዋ ብልስድ፥ ድኤትዳ አሳዳ ኤንታ ቆንጨን ዩሽ በስስ።

¹⁶ ሄሳ ግሾ፥ ምያባን ዎይኮ ኡያባን፥ ባኣለ ጋላስ ዎይኮ አጌን ፄርያ ቃማ ቦንቾን ኦንካ ህንተ ቦላ ፕርዶፎ።

¹⁷ ሀይሳቲ ስንፈ ያናዉ ደእያባታስ ኤሾ፥ ሽን ቱማይ ክርስቶሳ።

¹⁸ ቆፐ ቆሞ አሽከተንነ ኪታንቾ ጎይኖን ጬቀትያ ኦንካ ህንተና ህንተ ዎይቱዋፐ አሾፎ። ሄሳ መላ አስ ባ በእዳ ቆንጨን ናሸትሸ ባ አሾ ቆፋን ጮ ኦቶርቴስ።

¹⁹ ሄሳ መላ አሳስ ሁጰ ግድዳ ክርስቶሳራ ጋሄተ ባዋ። እ አሳተ ኡባ ሻያንነ ከሶን ከሶን ጋ ኦይድ ሙዝድ ድቼስ። ፆሳይ ሄሳ መላ ኦገን አሳተ ኡባስ ድች እሜስ።

ኦራ ደኦ

²⁰ ህንተ ክርስቶሳራ ሀይቅድ ሀ አላምያ ሃርያ አያናታ ዎልቃፈ ላአ ከይደታ። ያትን፥ አይስ ሻከቶና አሳዳ ግድድ ሀ ዎጋታስ ሀረተቲ?

²¹ ሄ ዎጋት፥ “ኦይኮፋ፤ ላጮፋ፤ ቦቾፋ” ጌተተይሳታ።

²² ሀ ኡባይ አሳ ዎጋነ ትምርተ ግድያ ግሾ ኦሶ ቦላ ፔእዳፐ ጉየ ያና።

²³ ሀ ኪታት ቦንቾነ ጭንጫተ ዳንድ በንታናዉ ዳንዳኦሶና። ሀ ዎጋት ፆሰ ዳሮ ዶስስያባ፥ አሽከነ ህንተ አሳተ ሃርስያባ ዳኖሶና፥ ሽን ኑ ኢታ አሞተ ቦላ ኤንታዉ ዎልቅ ባዋ።