Nahoome 3 - ጌሻ ማፃፋ

ናናወ አየ!

¹ ዳሮ አሳ ሱ ጉስዳ ናናወ ካታማ አየ! ዎርዶይ ኩምስ፤ ቦንቅ ኤክዳ ሻሉዋስ ታይቦይ ባዋ።

² ናናወ ካታመን ልሶ ግርሳይ፥ ገርቶ ጎንዶርሳይ፥ ፓራታ አዳርሶይነ ፓራ ጋረታ ጉፋይ ስኤቴስ።

³ ፓራ አሳት ፒርፆሶና፤ ማሻይ ሎጬስ፤ ቶራይ ጶሌስ። ዳሮ አስ ሀይቅስ! አህ አሀ ቦላ ዶረትስ፤ ሀይቅዳባስ ታይቦይ ባዋ! ያራ ካንድ ብያ አስ አሀን በቴስ።

⁴ ሄስ ኡባይ ሀንዳይ ማር ባይና ናናወ ላይማተ ጋሱዋና። እ ዳሮ ሙሩኖ ኦሱ፤ ካዎተታ ባ ላይማተን፥ አሳ ባ ሙሩኑዋን አይለያሱ።

⁵ ኡባፈ ዎልቃማ ጎዳይ፥ “ሄኮ፥ ታኒ ነ ቦላ ደንዳስ! ታኒ ነ ማኡዋ ኔፐ ቃራና፤ ነ ካሉዋ አሳ፥ ነ ፖኩዋ ካዎተታ በሳና።

⁶ ታኒ ነና ፕቶ የግያ በሲ ከሳና፤ ነና ካና፤ አስ ኡባይ ነና ሚጫናዳ ኦና።

⁷ ነና በእያ ኡባይ ኔፐ ሃክድ፥ ‘ሄኮ፥ ናናወ ካታማይ ባይሳትስ፤ እያዉ አዛናናይ ኦኔ? እያ ምንያ አስ አዉፐ በንታንደሻ?’ ያጋና” ያጌስ።

⁸ ነኖ፥ ናናወ፥ ኔኒ ግብፀን ደእያ ተብሶ ካታማፐ አይ? እያ ናይለ ሻፋ ማታን ደአዉሱ፤ ሃ እ ዩሹዋ ተቅስ፤ ሻፋይ እዉ ሚፃ ግድስ፤ ቃስ ሃይካ እዉ ድርስ።

⁹ ቶጰይነ ግብፀይ እዉ ዛው ባይና ዎልቃ፤ ፑፅነ ሊበይ እዮ ማደይሳታ።

¹⁰ ግዶሽን፥ እያ ድኤታሱ፤ እ ጉ ናይት ደሸትድ፥ ኦገ ጋፃ ኡባን ኩንድዶሶና። እ ቦንቸትዳ አሳታ ቦላ ሳም የገትስ፤ እ ግታ አሳት ኡባይ ሳንላታን ቃሸትዶሶና።

¹¹ ነኖ፥ ናናወ፥ ኔኒ ማትድ ጋንድጋርያ አሳዳ ሀናና። ነ ሞርከታ ስንፈ ባቃታዳ አትያ በሲ ኮያና።

¹² ነ ሚፃት ኡባይ ኮይሮ ቴርዳ አይፈይ ደእያ ባላሰ ም መላ። ባላሰ ም ቃያ ዎደ ቴራይ መይሳ ዶናን ዎስ።

¹³ ሄኮ፥ ነ ኦላንቾት ኡባይ ማጫሳ መላ። ነ ዛዋ ፐንገት ነ ሞርከታስ ዳልግድ ዶየትዶሶና፤ ኮበ ም ታም ምስ።

¹⁴ ነ ሞርከት ነ ዩሹዋ ኡንኤያ ዎደ ኡያና ሃ ሀእ ትካ። ነ ሚፃ ምን፤ ኡርቃ የዳ ፁበ መ፤ ኦቶ ጊግሳ።

¹⁵ ነና ያን ታም ማና፤ ቦለይ ካ መይሳዳ ነና ማሽ ማና። ኔኒ ቦለዳ ዳራ ጎንዶዳ የለታ።

¹⁶ ኔኒ ነ ዛልአንቾታ ሳሎ ፆልንቶታፐ አዳ ዳርሳዳሳ። ሽን ኤንቲ ቦለዳ ኡባ ም ድግድ ፓልድ ያና።

¹⁷ ነ ቶራ ሞጮናትነ ነ ሞርናት ሜጎ ዎደ ድርሳ ቦላ ኡትዳ ቦለ መላ። ኤንቲ አው ከይያ ዎደ ፓልድ ዮሶና፤ ኤንቲ ደእያ በሳ ኤረይ ባዋ።

¹⁸ ነኖ አሶረ ካዋዉ፥ ነ ሀላቃት ስክዶሶና፤ ነ ቦንቸትዳ አሳት ኩንድዶሶና። ነ አሳይ ደረታ ቦላ ላለትስ፤ ኤንታ ሺሽያ አስካ ባዋ።

¹⁹ ኔኒ ዛው ባይና ኢታተፈ ከስ ኤክዳ አስ ባይና ግሾ፥ ነ መኦይ ኮለተና፤ ነ ማዱንይ ፓፀና። ነባ ስእዳ ኡባይ ነ ቦላ ኩሸ ባቃና።