Nahoome 2 - ጌሻ ማፃፋ

ናናወ ኩንደ

¹ ነኖ፥ ናናወ፥ መንረይስ ከይስ! ሄሳ ግሾ፥ ነ ሚፃ ናጋ፤ ነ ኦግያ ዎቻ፤ ነ ዳንጩዋ ምን፤ ነና ጊግሳ።

² ቦንቀይሳት ቦንቅድ፥ ኤንታ ዎይንያ ይስኮካ፥ ጎዳይ እስራኤለ ቦንቹዋ ዛርዳይሳዳ ያይቆባ ቦንቹዋ ዛራና።

³ ኦላንቾት ዞኦ ጎንዳለ ኦይክዶሶና፤ ዞኦ ማኦ ማእዶሶና። ኤንቲ ኦላስ ጊግያ ዎደ ፓራ ጋረት ቅንኣሮሶና፤ ኤንቲ ባንታ ቶራ ሉፆሶና።

⁴ ፓራ ጋረት ኦግያን አዳርሶሶና፤ ኤንቲ ያነ ሃነ ሄመትሸ ካታማ ኦግያን ዩዮሶና። ቃስ ኤንቲ ላጮይ ሎጩ ግያ ፆምፐ ዳኖሶና፤ ዎልአንዳ ኤለሶሶና።

⁵ ናናወይ ባ ሀላቃታ ፄግድ ሺሻና፥ ሽን ኤንቲ ይሸ ኦገ ቦላ በታና። ኤንቲ ካታማ ግምበ ድርሳኮ ኤለሳና፥ ሞርከታ ቆሁዋፐ ኤንታ ናግያ ጎንዳለይ ጊግስ።

⁶ ሻፋ ባጋራ ደእያ ካታማ ድርሳ ፐንገት ዶየትዶሶና፤ ካዎ ጋይ ዳጋምስ።

⁷ ካውያ ድኤታዳ ባሱ፤ እ ማጫ አይለት አዛንድ ሆለዳ ጉጉማና፤ ባንታ ትራ ባቅሸ ዬካና።

⁸ ተቀትዳ ሃ ዶይ በስን ጎገይሳዳ ናናወ አሳይ ካታማፐ ባቃታና። አስ ኤንታ ባ ቃላ ቁ ኦድ፥ “ኤቅተ! ኤቅተ!” ያግድ ፄጋና፥ ሽን ኦንካ ጉየ ፄለና።

⁹ ሄ ካታማ ሻሉዋስነ፥ እያን ምንጀትዳ ቦንቾ ሚሽያስ ታይቦይ ባዋ። ሄሳ ግሾ፥ ሄ ብራነ ዎርቃ ቦንቅተ!

¹⁰ ናናወይ ባይሳ ግድስ፤ ካይሳትድ፥ ባዞ ግድስ! አሳ ዎዛናይ ያሻን ትልእስ፤ ጋደይ ኮኮርስ፤ ፄሳይ ፃፀትስ፤ ሶምኦይ ቡላትስ!

¹¹ ጋሞት አቅያ በሳይ፥ ዎዳላ ጋሞት ደእያ በሳይ፥ አደይነ ማጫ ጋሞት ባንታ ማራታራ ያሽ ባይና ጉፕያ በሲ ዳንያ ናናወ ካታማይ ሀእ አዉን ደኢ?

¹² ጋሞይ ባ ማራታስ ግድያባ ኦይክስ፤ ባራ ደእያ ማጫ ጋመስ መንረድ እሚስ። ባ ጎንጎሉዋ ዎን፥ ባ ኦላ አሾን ኩንስ።

¹³ ኡባፈ ዎልቃማ ጎዳይ፥ “ሄኮ፥ ታኒ ነ ቦላ ደንዳስ! ታኒ ነ ፓራ ጋረታ ታማን ፁጋና፤ ነ ዎዳላ ጋሞታ ማሽ ማና። ኔኒ ሀራታፐ ኤክዳባ ታኒ ኔፐ ዎስሳና፤ ነ ኪታንቾታ ቃላይ ህዛፐ ስኤተና” ያጌስ።