Nahoome 1 - ጌሻ ማፃፋ

ጎዳ ሀንቆይ ናናወ ቦላ

¹ ኤልቆሻ ካታማን ደእያ ናሆም ናናወባ ኦድዳ ቃላይነ በእዳ ቆንጨይ ሀይሳ።

² ጎዳይ ቃናተይሳነ ሀሎ ከይያ ፆሲ፤ ጎዳይ ሀሎ ከየይሳነ ሀንቆን ኩምዳይሳ። ጎዳይ ባራ ኤቀተይሳታ ሀሎ ከዬስ፤ ባ ሞርከታ ሴራናዉ ጊገት ኡትስ።

³ ጎዳይ ሀንቀታናዉ ኤለሰና፤ እያ ዎልቃይ ግታ፤ እ ቆህዳይሳ ሴሮና አገና። ጎዳስ ጎትያነ ሆቢያ ግዶራ ኦገይ ደኤስ፤ ሻራይ እያ ቶሆይ የን ደንድያ ባና።

⁴ እ አባነ ሻፋ ሀንቅድ መልሴስ፤ ባሳነነ ቃርመሎስ ሹሎሶና። ልባኖሰ ጪሻይ ቆቆፈቴስ።

⁵ እያ ስንን ደረት ቃፆሶና፤ ዙማት ትልኦሶና። እ ቆንጭያ ዎደ ቢት ቃፃና፤ ሳአን ደእያ ኡባይ ኮኮራና።

⁶ እያ ሀንቁዋ ስንን ኤቃናይ ኦኔ? እያ ሀንቁዋ ሱሏ ዳንዳአናይ ኦኔ? እያ ሀንቆይ ታማዳ ቡክያ ዎደ ዛላት ዛእድ ጳልቀቶሶና።

⁷ ጎዳይ ሎኦ፤ መቶ ጋላስ ቆሰትድ አትያ በሰ፤ እ ባናን አማነተይሳታ ኤሬስ።

⁸ ሽን እ ባ ሞርከታ ድኦን ሙክድ ይሳና፤ ባራ ኤቀተይሳታ ማን ገልሳና።

⁹ ህንተ ጎዳ ቦላ ማቀተይ አይብሴ? እ ህንተና ኩም ይሳና፤ መቶይ ዛር ደንደና።

¹⁰ ህንተ ማትድ ጋንድጋረይሳት፥ ዎልራ ኦይከትዳ አጉንነ ቡረይ ታማን ፁገትያ መላ ህንተ ታማን ፁገትድ ያና።

¹¹ ናናወ፥ ጎዳ ቦላ ኢታባ ማቀተይነ ኢታ ዞረ ዞረይ ነ ግዶፈ ከይስ።

¹² ጎዳይ፥ “ናናወት ምኖነ ዳሮ ግድኮካ፥ ሾደትድ ያና። ታኒ ካሰ ይሁዳ አሳ ኡንኤስ፥ ሽን ህዛፐ ጉየ ኡንኤከ።

¹³ ታኒ ሀእ አሶረታ ቃምባራ ህንተ ጋናፈ መንና፤ ህንተ ቃሸትዳ ሳንላታ ዱሰረና” ያጌስ።

¹⁴ ናናወ፥ ጎዳይ ነ ቦላ ፕርድዳ ፕርዳይ ሀይሳ: “ህዛፐ ጉየ ነ ሱን ፄግስያ ኮቸ ነዉ ዴና። ነ ፆሳታ ኬን ደእያ ምስለታነ ኤቃታ ታኒ ይሳና። ኔኒ ፓናባ ግድያ ግሾ፥ ታኒ ነ ዱፉዋ ቦካና” ያጌስ።

¹⁵ ሄኮ፥ ሎኦ ዎረ ኦድሸነ ሳሮተ አዋጅሸ ኪተትድ የይሳ ቶሆይ ደርያ ቦላራ ጋክስ። ይሁዳ አሳዉ፥ ህንተ ሞርከት ኩም ይዶሶና፤ ኤንቲ ዛሪድ ህንተ ቢታ ኦልድ ኦይኮኮና። ሄሳ ግሾ፥ ህንተ ባለታ ቦንችተ፤ ህንተ ቃንገ ጋተ።