Nahime 6 - ጌሻ ማፃፋ

ናህመ ቦላ መትዳ እፆ

¹ ሳንባላፅ፥ ፆበይ፥ አራበ ቢታ አስ ግድዳ ጌሳመይነ ሀንኮ ኑ ሞርከት ኑኒ ግምብያ ኦድ ፖልዳይሳነ ዶያ በሲ ባይናይሳ ስእዶሶና። ግዶሽን፥ ታ ግምበ ፐንገታስ ሳንቃ አብከ።

² ሳንባላፅነ ጌሳመይ፥ “ኦኖ ደምባን ደእያ ጉታታፐ እሱዋን ያዳ ኑራ ጋሄታ” ያግድ ኪታ የድዶሶና። ሄስ ኤንቲ ታና ቆሀናዉ ማቅዳ ማቆ።

³ ታኒ ኤንታዉ፥ “ታዉ ግታ ኦሶይ ደእያ ግሾ ሄሳ አጋዳ ህንተ ግዳ በሳ ባናዉ ዳንዳእከ። ታኒ ያ ብን፥ ኦሶይ አይስ በቲ?” ያጋዳ ዛራስ።

⁴ ሄ ኪታ ዛር ዛር ኦይዱ ቶሆ ኪትዶሶና፤ ሽን ታኒ እስ ቆሞ ዛሮ ኤንታዉ እማስ።

⁵ እቻሻን ሳንባላፅ ባ አይለታፐ እሱዋ ዶያ ደእያ ዳብዳበ ኦይድ ታኮ ኪትስ። ዳብዳበይ ሀይሳዳ ያግድ ፃፈትስ፤

⁶ “ኔንነ ነ ኮቸ ግድዳ አይሁደት ማካላናዉ ቆፕዳይሳነ ሄሳ ጋሶን ግምብያ ግምበይሳ ሾሮ ቢታን ደእያ አሳ ኡባይ ኦደተይሳ ጌሳመይ ታዉ ኦድስ። ቃስ ኔኒ ነና ካዎ ከሳናዉ ኮየይሳነ

⁷ ኔኒ ይሁዳ ካዎ ግደይሳ የሩሳላመን አዋጃና መላ ናበ ዎዳይሳ ታዉ ኦድስ። ሀ ዎርያ ካዎይ ስአናይስ አተና። ሄሳ ግሾ፥ ታራ ጋሄታዳ ዞረታናዉ ሃያ” ያጌስ።

⁸ ታኒ፥ “ሀ ኔኒ ግያ ኦዳ ኡባይ ቱማ ግዶናባነ ነ ኔፐ መዳባ” ያጋዳ ዛራስ።

⁹ ኑ ኦያ ኦሶይ ፖለቶና መላ፥ “ኤንታ ኩሸይ አርጋጫና፤ ኦሶይካ ፖለቶና ኤቅ አታና” ያግድ ኑና ያሽሳናዉ ቆፕዶሶና። ሽን ታኒ፥ “ፆሳዉ፥ ሀእ ታ ኩሽያ ምን” ያጋዳ ዎሳስ።

¹⁰ ታኒ እስ ጋላስ ሶፐ ከዮና መላ ጎርድ ዎዳ ማሄፃቤላ ናኣ ናኣ ዳላያ ናኣ ሻማያኮ ባስ። እ ታኮ፥ “ቃማ ይድ ኤንቲ ነና ዎናዉ ዳንዳእያ ግሾ ኔራ ታራ ፆሳ ኬ ገልድ፥ ፐንግያ ጎርድድ ቆሰታና” ያግስ።

¹¹ ሽን ታኒ፥ “ታ መላ አስ ያይድ ቆሰቲ? ዎይኮ ታና ዳንያ አስ ባ ሸምፑዋ አሻናዉ ፆሳ ኬ ገሊ? ታ ሄሳ ሀንከ” ያጋስ።

¹² ታ ቆፓ በእያ ዎደ ሻማየይ ፆሳይ ኪትዳ ናበ ግዶናሽን ፆበይነ ሳንባላፅ እያ ሚሸን ሻምድ የድን ታ ቦላ ዎርዶ ትንብተ ኦደይሳ አኬካስ።

¹³ እ ሚሸን ሻመትዳ ጋሶይ ታና ያሽሳናሳ፤ ታ ሄሳ ኦዳ ናጋራን ገላና መላነ ታና ቦርስያባ ደምድ ታና ካዉሻናሳ።

¹⁴ ታኒ፥ “ታ ፆሳዉ፥ ፆበይነ ሳንባላፅ ኦዳባ ኡባ በአ። ኖኣዶ ጌተትያ ማጫ ናብያነ ሀራ ዎርዶ ናበት ታና ያሽሳናዉ ኦዳባ ኡባ በአ” ያጋዳ ዎሳስ።

¹⁵ ግምበ ኦሶይ ዶመትን እሻታማነ ናምኡ ጋላሳፐ ጉየ ኤሉለ ጌተትያ አጌናን ላታማነ እቻሻን ጋላሳን ኦሶይ ፖለትስ።

¹⁶ ኑ ዩሹዋን ደእያ ካዎተታን ደእያ ኑ ሞርከት ሄሳ ስእዳ ዎደ ያይዶሶናነ ዬላትዶሶና። አይስ ጊኮ፥ ኦሶይ ኑ ፆሳ ማደን ፖለትዳይሳ አኬክዶሶና።

¹⁷ ሄ ዎደ ይሁዳ ሹማት ፆቢያስ ዳብዳበ ፃፍሸ ጋምእዶሶና፤ እካ ኤንታዉ ዛርሸ ጋምእስ።

¹⁸ ኤራ ናአይ ሳካን፥ ፆቢያ ቦሎ ግድያ ግሾነ እያ ናአይ ዮሃናን ባራካ ናኣ ማሱላማ ናእዉ ኤክዳ ግሾ፥ አይሁደታፐ ዳሮት እያራ ጫቅድ ደኦሶና።

¹⁹ ሄ አሳት ፆበይ ኦዳ ሎኦባ ኡባ ታ ስንን ናሽድ ሃሳዮሶና፤ ታኒ ግያባ እያዉ ኦዶሶና። ሄሳ ግሾ፥ ፆበይ ኡባ ዎደ ታና ያሽሳናዉ ዳብዳበ ፃፎ አግቤና።