Milkiyaasa 3 - ጌሻ ማፃፋ

¹ “ሄኮ፥ ታ ስንን ኦገ ጊግሳና መላ ታ ኪታንቹዋ ካሰታዳ ኪታና። ህንተ ኮያ ጎዳይ ቆፖና ደእሽን ባ ኬ ያና። ህንተ ኡፋይሳን ናግያ፥ ጫቆ ኪታንቾይ ያና” ያጌስ ኡባፈ ዎልቃማ ጎዳይ።

² ሽን እ ብራ ሴርስድ ጌሽያ ታማ መላነ ማኡዋ ሜጭያ ሳሙና መላ ግድያ ግሾ፥ እ ያ ጋላሳን ዳንዳእ ኤቃናይ ኦኔ? ቃስ እ ቆንጭያ ዎደ እያ ስንን ኤቃናዉ ዳንዳኤይ ኦኔ?

³ እ ብራ ሼሽያነ ጌሽያ አሳዳ ኡታና። እ ሌወ ኮቻታ ብራዳነ ዎርቃዳ ጌሻና። ሄ ዎደ ኤንቲ ጎዳስ ፅሎተን ያርሾ ያርሻና።

⁴ ሄ ዎደ ይሁዳነ የሩሳላመ ያርሾይ በን ዎደታነ አዳ ላይዳ ጎዳ ኡፋይስያባ ግዳና።

⁵ “ሄሳፈ ጉየ፥ ፕርዳስ ታኒ ህንተኮ ያዳ፥ ብታንቾታ፥ ላመይሳታ፥ ዎርዶን ጫቀይሳታ፥ ኦሳንቾታ ዳሞዘ ድገይሳታ፥ አምኤታነ ይኦታ ኡንኤይሳታ፥ በታንቾታስ ፕርዳ ድገይሳታነ ታዉ ያዮናይሳታ ቦላ ኤሶን ማርካታና” ያጌስ ኡባፈ ዎልቃማ ጎዳይ።

ፆሳባ ካይሶቶ

⁶ “ታኒ ጎዳይ ላመትከ፤ ሄሳ ግሾ፥ ህንተኖ ያይቆባ ኮቻቶ፥ ህንተ ይበከታ።

⁷ ህንተ ማይዛታ ዎደፐ ዶምድ፥ ታ ዎጋፐ ካረ ከይደታ፤ እያ ናግበከታ። ሀእ ታኮ ስምተ፤ ታንካ ህንተኮ ስማና” ያጌስ ኡባፈ ዎልቃማ ጎዳይ። ሽን ህንተ፥ “ኑኒ አይ ኦገን ስምኖ?” ያግድ ኦይቼታ።

⁸ “አስ ፆሰ ካይሶቲ? ሽን ህንተ ታና ካይሶትደታ።” ቃስካ ህንተ፥ “ኑኒ ነና ዋትድ ካይሶትዶ? ያጌታ። “ህንተ አስራታንነ እሞታን ታና ካይስደታ።

⁹ እስራኤለ አሳ ኡባይ ታና ካይሶትዳ ግሾ፥ ህንተ ባደትዳይሳታ።

¹⁰ ታ ኬን ካ ዳና መላ አስራታ ኡባ ሻለን የግተ። ያትድ፥ ታኒ ሳሎ ማስኮትያ ዶያዳ አንጆ ህንተዉ ፓላህሳዳ እሞና እፅኮ ሄሳን ታና ፓጭተ” ያጌስ ኡባፈ ዎልቃማ ጎዳይ።

¹¹ “ካ ሞና መላ ታኒ ህንተ ግሾ፥ ጎንዱዋ ሴራና፤ ጋደን ደእያ ዎይነ አይፈይካ ቆቆፈተና።

¹² ህንተ ቢታይ ዳናዉ እንጀትያ ቢታ ግድያ ግሾ፥ ካዎተት ኡባይ ህንተና አንጀትዳይሳታ ያጋና” ያጌስ ኡባፈ ዎልቃማ ጎዳይ።

¹³ ጎዳይ ሀይሳዳ ያጌስ፦ “ህንተ ታ ቦላ ምኖ ቃላ ኦደትደታ። ያትድ ቃስ፥ ‘ኑኒ ነ ቦላ ዎይግድ ምኖ ቃላ ኦደትዶ?’ ያግድ ኦይቼታ።

¹⁴ “ህንተ፥ ‘ፆሳስ ኦይስ ሀዳ፤ እያ ኪታ ናግድ፥ ኡባፈ ዎልቃማ ጎዳ ስንን አዛንያ አሳዳ ስመረተ ኑና አይ ማድዴ?

¹⁵ ሀእካ ኑኒ ኦቶረይሳታ አንጀትዳይሳታ ጎስ፤ ኢታ ኦይሳት ዱረቶሶና፤ ሀር አቶሽን ኤንቲ ፆሳ ፓጭሸካ ከስ ኤኮሶና’ ያጌታ” ያጌስ ፆሳይ።

¹⁶ ሄ ዎደ ጎዳስ ያየይሳት እሶይ እሱዋራ ኦደትዶሶና፤ ጎዳይካ ሀይዝድ ስእስ። ጎዳስ ያየይሳትነ እያ ሱን ቦንቸይሳት ዶገቶና መላ ኤንታ ሀሳይስያ ማፃፋይ እያ ስንን ፃፈትስ።

¹⁷ “ኤንቲ ታባ ግዳና፤ ታኒ ኦያ ጋላስ ኤንቲ ታዉ ቡዞ ሚሸ ግዳና፤ አው ባዉ ኦያ ባ ናአ ማረይሳዳ ታኒ ኤንታ ማራና።

¹⁸ ሄ ዎደ ህንተ ስሚድ ፅሉዋነ ናጋራንቹዋ ግዶን፥ ፆሳስ ኪተተይሳነ ኪተቶናይሳ ግዶን ደእያ ዱማተ በአና” ያጌስ ኡባፈ ዎልቃማ ጎዳይ።